އ.ދ.ގެ ޗާޓަރާއި، އެ ޗާޓަރުގެ މަޤްޞަދުތަކާއި، އެ ޗާޓަރުގެ އުޞޫލުތަކަށް ފުރިހަމައަށް ޢަމަލުކުރުމަކީ، ދާއިމީ ޞުލްޙައެއް ކަށަވަރުކުރުމަށް އޮތް ހަމައެކަނި މަގުކަމަށް އދގެ އާއްމު މަޖިލީހުގެ ރައީސް އަދި ރާއްޖޭގެ ޙާރިޖީ ވަޒީރު ޝާހިދު ވިދާޅުވެއްޖެއެވެ.
އދގެ އާއްމު މަޖިލީހުގެ ރައީސް ޝާހިދު މިހެން ވިދާޅުވީ ހިފާފައިވާ ޔޫކްރެއިންގެ ބިންތަކާއި ގުޅޭގޮތުން، އދ.ގެ އާންމު މަޖިލީހުގައި ދެއްވި ބަޔާނުގައެވެ. ޝާހިދު ވިދާޅުވީ އ.ދ.ގެ ޗާޓަރުގެ ފުރަތަމަ އިބާރާތުގައި ވަނީ، "ހަނގުރާމައިގެ ނުރައްކަލުން އަންނަން އޮތް ޖީލުތައް ސަލާމަތް ކުރުން" ކަމަށްވާއިރު އެއިބާރާތަކީ އ.ދ އުފެއްދުމުގެ އެންމެ ބޮޑު ހިތްވަރުކަމަށެވެ. 1945 އާއި ހަމައަށް ދުނިޔެ އައި އިރު، މި ޖަމްޢިއްޔާގެ ފައުންޑަރުން ދުނިޔޭގެ ދެ ބޮޑު ހަނގުރާމައިގެ ގެއްލުމާއި، ހަލާކާއި، ކެކުޅުމާއި، ވޭން ވަނީ ތަހައްމަލުކޮށްފައިކަމަށް ޝާހިދު ވިދާޅުވިއެވެ.
އ.ދ.ގެ ޗާޓަރުގެ 1 ވަނަ މާއްދާގައި، އ.ދ.ގެ މެންޑޭޓްގެ ގޮތުގައި ކަނޑައަޅާފައިވަނީ، ޞުލްޙަ މަސަލަސްކަން ނަގާލެވިދާނެ ފަދަ ދެބަސްވުންތައް ނުވަތަ ޙާލަތްތައް ޞުލްޙަވެރި މަގުން އަދި ޢަދުލު އިންޞާފާއި ބައިނަލްއަޤުވާމީ ޤާނޫނުތަކާއި، އޭގެ އުޞޫލުތަކާ އެއްގޮތްވާ ގޮތުގެ މަތިން ޙައްލުކުރުމެވެ. އެހެންކަމުން، ޤާނޫނުގެ ޙުކޫމަތާއި އެއްގޮތްވާ ގޮތުގެ މަތިން، އަމަންއަމާންކަން ދެމެހެއްޓުމަކީ، އ.ދ.ގެ އެއް މަޤްޞަދެވެ.
އ.ދ.ގެ ޙަޔާތުން ވޭތުވެގެން ދިޔަ 76 އަހަރު ދުވަހުގެ ތެރޭގައި އެއްވެސް ފިލާވަޅެއް ލިބިފައިވާނަމަ، އެފިލާވަޅަކީ؛ ދާއިމީ ޞުލްޙައަކީ، ޢަސްކަރީ މުޢާމަލާތްތަކުން ނުވަތަ ހަނގުރާމައިން ޙާޞިލުކުރެވޭ ނުވަތަ ދެމެހެއްޓޭނެ ޞުލްޙައެއް ނޫންކަމާއި، ޙައްލު ގެނެވެން އޮތީ ސިޔާސީ ގޮތުންކަމަށް ޝާހިދުގެ ބަޔާނުގައި ވިދާޅުވިއެވެ.
އަދި އިންސާނުން ތަހައްމަލް ކުރަންޖެހޭ އަނިޔާއާއި ވޭން ކުޑަކުރުމަށާއި، ހަނގުރާމައިން ލިބިގެންދާ އިގްތިޞާދީ ނިކަމެތިކަމާއި، އަދި ހަނގުރާމައަށް ފަހު، އިޤުތިޞާދު ރުޖޫޢަކުރުމަށް އަދާކުރަންޖެހޭ ޚަރަދާއި އެތަކުލީފުން މިންޖުވެވެން އޮތް އެންމެ އެކަށޭނެ ގޮތަކީ، ހަނގުރާމައަށް މަގު ހުޅުވޭ ފިތުނަތަކުން، އެންމެ ފުރަތަމަވެސް ރައްކާތެރިވެގެން ތިބުންކަމަށް ޝާހިދު ވިދާޅުވިއެވެ.
ލޮބުވެތި އެކުވެރިންނޭވެ! ދެބަސްވުންތައް ހައްލުކުރަން ބޭނުންވާވަސީލަތް އަޅުގަނޑުމެން ރުކުރުވާލަމާތޯއެވެ! ޑިޕްލޮމަސީއާއި، އިސް ފަރާތްތަކުގެ މަދަދާއި، ސުލްހައިގެ މެދުވެރިއެއްގެ ރޯލުއަދާކުރުމަށް ތިބި ފަރާތްތަކަށް އިސްކަން ދެމާތޯއެވެ؟ ޞުލްޙައަށް ޙައްޤުވާ ހުރިހާ ފުރުޞަތެއް އަޅުގަނޑުމެން ދޭމާތޯއެވެ؟
– ޝާހިދު ވިދާޅުވިއެވެ.
އ.ދ.ގެ ޗާޓަރާއި، އެ ޗާޓަރުގެ މަޤްޞަދުތަކާއި، އެ ޗާޓަރުގެ އުޞޫލުތަކަށް ފުރިހަމައަށް ޢަމަލުކުރުމަކީ، ދާއިމީ ޞުލްޙަ އެއް ކަށަވަރުކުރުމަށް އޮތް ހަމައެކަނި މަގުމަށް ޝާހިދު ވިދާޅުވިއެވެ. އަދި ހުރިހާ ފަރާތްތަކަށްވެސް ގޮވާލަނީ، މަޝްވަރާތައް އިތުރަށް ވަރުގަދަކޮށް، މަޝްވަރާތައް މެދުވެރިކޮށް، ހަމަ ނުޖެހުންތައް ކުޑަކުރުމަށް ކަމުގައެވެ.
ޝާހިދުގެ ބަޔާން ނިންމާލާނީ، މީގެ 68 އަހަރު ކުރިން، ކުރީގެ ސެކްރެޓަރީ ޖެނެރަލް ދާގް ހަމްމަރޝްޖޯލްޑް ވިދާޅުވި ވާހަކައެއް ދަންނަވާލަމުންނެވެ. އޭނާ ވިދާޅުވެފައި ވަނީ "އ.ދ.އަކީ އިންސާނާ ގޮވައިގެން ސުވަރުގެ އަށް ދާން އުފެއްދި ތަނެއް ނޫން، ނަމަވެސް މި މުއައްސަސާ އުފެއްދީ އިންސާނިއްޔަތު ނަރަކައިން ސަލާމަތް ކުރުމަށް" ކަމަށެވެ.
