ޔުއެފާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި މިރޭ އެތުލެޓިކޯ މެޑްރިޑާއި މެންޗެސްޓަރ ޔުނައިޓެޑް ބައްދަލުކުރި މެޗު އެއްވަރުވެގެން ނިމިއްޖެއެވެ.
އެތުލެޓިކޯގެ ދަނޑުގައި ކުޅުނު މި މެޗު ނިމުނީ 1-1 ގެ ނަތީޖާއަކުންނެވެ.
މި މެޗު ފަށައިގެން ފުރަތަމަ ހާފުގެ ކުރީކޮޅު އެތުލެޓިކޯއިން ވަނީ ލަނޑެެއް ޖަހާ ލީޑު ނަގާފައެވެ. މި ލަނޑު މެޗުގެ 7 ވަނަ މިނެޓުގައި އެޓީމަށް ކާމިޔާބުކޮށްދިނީ، ޔާއޯ ފެލިކްސްއެވެ. އޭނާ މި ލަނޑު ޖެހީ ރެނާން ލޯޑީ ނަގައިދިން ޕެނަލްޓީ އޭރިޔާ ތެރެއަށް ނަގަދިން ބޯޅަ ބޮލުން ޖަހާ ގޯލުގެ ތެރެއަށް ފޮނުވާލައިގެންނެވެ.
މެޗުގެ ފުރަތަމަ ހާފުގައި ޔުނައިޓެޑްގެ ފަރާތުން މާ ރަނގަޅު ކުޅުމެއް ފެނިގެން ގޮސްފައެއް ނުވެއެވެ. މި މެޗުން ޔުނައިޓެޑް ބަލިނުވެ ސަލާމަތްވީ ދެވަނަ ހާފުގައި ރަޝްފޯޑްގެ ބަދަލުގައި ކުޅެން ނުކުތް ޒުވާން ކުޅުންތެރިޔާ އެންތަނީ އެލަންގާ ކާމިޔާބުކޮށްދިން ލަނޑުންނެވެ. މެޗުގެ 80 ވަނަ މިނެޓުގައި ބްރޫނޯ ފެނާންޑޭޒް ދިން ބޯޅަ އެލަންގާ ހަމަޖެހިލާފައި ފޮނުވާލީ ގޯލުގެ އަރިމަތީ ތިރީ ކަނަށެވެ. މި ލަނޑަކީ ޔުނައިޓެޑުން ޗެމްޕިއަންސް ލީގުގައި ޖެހި 500 ވަަނަ ލަނޑުވެސް މެއެވެ.
މެންޗެސްޓަރ ޔުނައިޓެޑާއި އެތުލެޓިކޯ މެޑްރިޑް ބައްދަލުކުރާ ދެވަނަ ލެގުގެ މެޗު އަންނަ މަހުގެ 15 ވަނަ ދުވަހު އޮންނާނީ ޔުނައިޓެޑްގެ ދަނޑުގައެވެ.
