އެންޓި ކޮރަޕްޝަން ކޮމިޝަނަކީ، ދައުލަތުގެ މިނިވަން މުވައްސަސާތަކުގެ ތެރެެއިން އެންމެ މުހިންމު އެއް މުވައްސަސާއެވެ. ސަބަބަކީ އާ ގާނޫނު އަސާސީން އެކުލަވާލި މުވައްސަސާތަކުގެ ތެރެއިން، ދައުލަތުގެ ތެރޭގައި ހިނގާ ކޮރަޕްޝަންގެ ކަންކަމާއި އަދި އެނޫނަސް ޚިޔާނާތާއި ގުޅުންހުރި ހުރިހާ ކަމެއް ބެލުމުގެ ޒިންމާ ގާނޫނު އަސާސީން މަތި ކޮށްފައި އޮތް ހަމައެކަނި މުވައްސަސާއަކީ މި މުވައްސަސާކަމުގައި ވާތީއެވެ.
އަދި އަމުދުން ރާއްޖެފަދަ ގައުމެއްގައި މިފަދަ މުވައްސަސާއެއްގެ މުހިންމުކަން އެތައް ގުނައަކަށް ބޮޑުވަނީ، އަބަދުވެސް އޮންނަ ސަރުކާރެއްގެ މައްޗަށް ކުރެވެމުންދާ ކޮރަޕްޝަންގެ ތުހުމަތުތައް އިންތިހާއަށް ބޮޑުވެފައި، އެކަންކަމުގެ ހަގީގަތް ހޯދާ ބެލުމުގެ މަގުތަށް އޭސީސީ ނޫން މުވައްސަސާއެއް މެދުވެރިކޮށް ބެލުމުގެ ފުރުސަތު އޮންނަ މިންވަރު ހަނިވެފައި އުދަގޫވުމުގެ ސަބަބުންވެސް މެއެވެ.
އެހެންނަމަވެސް ހިތާމައަކީ ފާއިތުވެދިޔަ ހުރިހާ ސަރުކާރެއްގައިވެސް އެންމެ ބޮޑު ގޮންޖެހުމެއްގެ ތެރެއިން ހިގަމުން އައިސްފައިވާ އެއް މުވައްސަސާއަކީ މިމުވައްސަސާކަމުގައި ވެގެން ގޮސްފައިވާކެމެވެ. އަދި ފާއިތުވެދިޔަ ސަރުކާރުގައި އޭސީސީއަކީ އޭރުގެ ސަރުކާތުގެ ބާރު އިންތިހާއަށް އެ މުވައްސަސާއަކަށް ފޯރާ، އަދި ޚުދު އެމުވައްސަސާގައި ތިބި އޭރު ވެރީންގެ މައްޗަށްވެސް ކޮރަޕްޝަންގެ އެތައް ތުހުމަތެއް ކުރެވިގެން ދިޔަ މުވައްސާއަކަށް ވެގެން ގޮސްްފައިވާއިރު، މިހާރު ރައްޔިތުންގެ މަޖިލިހުގައި އޮތް ސުޕަރ މެޖޯރިޓީންއިން މިމުވައްސަސާއަށް އައްޔަން ކުރި މެމްބަރުން މިވަނީ އިސްތިއުފާ ދީފައެވެ. ސުޕަރ މެޖޯރިޓީގެ ޕްރެޝަރުގައި ހުރިހާ މެމްބަރުން މިވަނީ މަގާމަތުތަކުން އިސްތިއުފާ ދީފައެވެ.
އޭގެ ނަތީޖާއެއްގެ ގޮތުން ދައުލަތުގެ އެންމެ މުހިންމު އެއް މިނިވަން މުވައްސަސާ ގާނޫނީ ހުސްކަމެއްގައި އޮންނަތާ މިހާރު މިވަނީ ދޮޅު މަހެއްހާ ދުވަސް ފާއިތުވެގެން ގޮސްފައެވެ.
އިންތިޚާބެއް ނިމިގެން ދިޔައިރުވެސް ގާނޫނީ ހުސްކަމެއްގައި!
އޭސީގެ މެމްބަރުން މަގާމުގައި ދެމި ތިބެގެން އެ މުވައްސަސާ އެކަށީގެންވާ ގޮތެއްގައި ނުހިގާތީ، ނުވަތަ އިންސާފުވެރި ކަމާއެކީ "ބާރު ސްޕީޑުގައި" މިމުވައްސަސާއިން މަސައްކަތް ނުކުރާތީ، ރައްޔިތުންގެ މަޖިލިހުގެ ސުޕަރ މެޖޯރިޓީން އޭސީސީގެ މެމްބަރުން މަގާމުން ވަކި ކުރުމުގެ މަސައްކަތް ކުރިޔަށް ގެންގޮސްފައިވަނީ މަޖިލިސް ރިސެސްގައި ވަނިކޮށެވެ.
ދައުރުން ބޭރުގެ ޖަލްސާއެއް ބާއްވާއިގެން، އޭސީސީގެ މެމްބަރުން މަގާމުން ދުރުކުރުމަށް މަޖިލިސް ފްލޯއިން ނިންމާ، މެމްބަރުންގެ މައްސަލަ ކޮމިޓީއާއި ހަމައަށް ފޮނުވުމަށްފަހު، އޭސީސީގެ މެމްބަރުންނަށް ޖަވާބު ދާރީވުމަށްވެސް ކޮމިޓީން ދީފައިވަނީ އެންމެ 5 ދުވަހެވެ.
އޭސީސީގެ މެމްބަރުން މަގާމުގައި އިތުރަށް ދެމި ތިބެއްޖެނަމަ ކުރާނޭ ގެއްލުން ބޮޑުވެގެން، އަދި ކޮރަޕްޝަންގެ މައްސަލަތައްވެސް އެކަށީގެންވާ ގޮތެއްގައި ކުރިޔަށް ނުގެންދެވޭނެތީ، ދައުރުން ބޭރުގައި ވަކިކުރުމުގެ މަރުހަލާ ކުރިޔަށް ގެންދަނަ ޖެހުނީ މެމްބަރުން މަގާމުގައި ދެމިބެގެން ދައުލަތަށް ވަރަށް ބޮޑު ގެއްލުމެއް ލިބިގެންދާނެތީ ކަމުގައި ގަބޫލު ކުރަން ޖެހެއެވެ. އަދި ހަމަ އެފަދައިން، އޭސީސީގައި ހުރި މައްސަލަތައްވެސް ނުބެލި، ލަސްވެގެން ދިއުމުގެ ސަބަބުންވެސް ބޮޑެތި ގެއްލުންތަކެއް ލިބި، މިމައްސަލަތައްވެސް ވަރަށްވެސް ބޮޑަށް އަވަސް ކުރަން މަޖިލިސް މެމްބަރުން ބޭނުންވެފައި ތިބިލެއް ބޮޑުކަމުން ކަމުގައިވެސް ގަބޫލު ކުރަން ޖެހެއެވެ.
ސަބަބަކީ މެމްބަރުން މަގާމުތަކުން ވަކިކުރުމުގެ މުޅި މަރުހަލާއަކީވެސް ދައުރުން ބޭރުގައި މަޖިލިހުން ކޮށްފައިވާ މަސައްކަތްތަކަށް ވާތީއެވެ.
އެހެންނަމަވެސް، މަޖިިސް މެމްބަރުންގެ ޕްރެޝަރަށް އޭސީސީގެ މެމްބަރުން މަގާމުން އިސްތިއުފާ ދިނުމާއެކު ދެން ތަމްސީލުވެގެން ދިޔައީ، އިސްވެ ބަޔާން ކުރެވުނު ހީތަކާއި، އަދި ފެނިގެންދިޔަ މަންޒަރުތަކާއި އެއްގޮތް ކަންކަމުގެ ގޮތުގައި މިއަދު ބެލެވޭނެ ޖާގަ އޮތް ކަމަކަށް ނުބެލެވެއެވެ. ސަބަބަކީ އޭސީސީގެ މެމްބަރުން މަގާމުން ވަކި ކުރެވުމަށްފަހު، މަގާމަށް އައްޔަން ކުރުމުގެ މަރުހަލާގެ ތެރެއިން، އޭސީސީފަދަ މުހިންމު މުވައްސަސާއެއް ގާނޫނީ ހުސްކަމެއްގައި އޮތުންވެސް މަޖިލިސް މެމްބަރުންނަށް ވަރިހަމަ ވެގެން ގޮސްފައި ވާތީއެވެ.
އަދި ވަކީން ޚާއްސަ ގޮތެއްގައި، ރައްޔިތުންގެ މަޖިލިހަށް މެމްބަރަކު އިންތިޚާބު ކުރުމަށްޓަކާ، ފޯރިގަދަ، އަދި ނުފޫޒާއި ކޮރަޕްޝަންގެ އެތައް ތުހުމަތުތަކެއް ކުރެވުނު އިންތިޚާބެއް ނިމިގެން ދިޔައިރު، މިމައްސަލަތައް ބަލާނޭ މުވައްސަސާ ގާނޫނީ ހުސްކަމެއްގައި އޮތުމުގެ ކަންބޮޑުވުމެއް ސުޕަރ މެޖޯރިޓީއަށް ނެތިގެން ދިއުމަކީ، އޭސީސީގެ މެމްބަރުން ގޯސްވެގެން، "ކުއްލި ހާލަތުގައި" އެ މެމްބަރުން މަގާމުން ވަކި ކުރި ސުޕަރ މެޖޯރިޓީގެ އިޚްލާސްތެރިކަން ވަޒަން ކުރެވިގެން ދިޔަ ކަމެއްގެ ގޮތުގައި މިއަދު ގިނަ ބަޔަކު ދަނީ ފާހަގަ ކުރަމުންނެވެ.
އެހެންނަމަވެސް ގަބޫލު ކުރަންޖެހޭ އެއް ހަގީގަތަކީ، ރައްޔިތުންގެ މަޖިލިހަށް މެމްބަރަކު އިންތިޚާބު ކުރުމަށް ބައި އިލެކްޝަނެއް ބޭއްވިގެން ދިޔައިރު، އޭސީސީފަދަ މުހިންމު މުވައްސަސާއެއް ގާނޫނީ ހުސްކަމެއްގެ ތެރޭގައި އޮތުމަކީ ހަގީގަތުގައިވެސް ވަރަށް ބޮޑު ގޯހެއް ކަމެވެ. އަދި ހަގީގަތުގައި މިއީ މިބީދައިން އިންތިޒާމް ކުރެވިގެން ވާނޭ ކަމެއްވެސް ނުމެ ނޫންކަމެވެ. އަދި މިފަދަ ބީދައަކުން، ކުރިޔަށް ވާދަވެރި ބައި އިލެކްޝަނެއް ބޯމަތި ވެފައިވަނިކޮށް، މި މުވައްސަސާގެ މެމްބަރުން މަގާމުން ދުރުކުރުމަށް ދައުރުން ބޭރުގައި މަޖިލިހުން ކުރިޔަށް ގެނެދިޔަ މަރުހަލާއަކީވެސް ޒިންމާދާރުކަން ކުޑަކޮށް ކުރިޔަށް ގެންގޮސްފައިވާ މަރުހަލާއެއް ކަމުގައިވެސް ގިނަ ބަޔަކު މިއަދު ދަނީ ގަބޫލުކުރަމުންނެވެ.
އައްޔަން ކުރުން ބަރަވެލި ސްޕީޑުގައި!
ދިހެވިރާއްޖޭގެ ރައްޔިތުންގެ މަޖިލިހުން ނިންމާ ނިންމުން ތަކުގައި ސިޔާސީ ކުލަޖެހި، އަދި ކަންކަން ޒާތީ ތައްސުބުގެ ތެރެއަށް އަބަދުވެސް ފެތިފައި އޮންނަކަމުގެ އެއް ހެއްކަކީ، އޭސީސީގެ މެމްބަރުން މަގާމުން ވަކިކުރުން "ރޮކެޓް ސްޕީޑުގައި" ކުރިޔަށް ގޮސްފައި، މި މަގާމްތަކަށް މެމްބަރުން އައްޔަން ކުރުން "ބަރަވެލި ސްޕީޑުގައި" ކުރިޔަށް ދާތީއެވެ. އަދި އަމުދުން، ބޮޑު ބައި އިލެކްޝަނެއް ނިމިގެން ދިޔައިރު، މިފަދަ މުހިންމު މުވައްސަސާއެއް ގާނޫނީ ހުސްކަމެއްގައި އޮތް އޮތުންވެސް "ވަރިހަމަ" ވެގެން ދިއުމުންނެވެ.
މަޖިލިސް ރިސެސްގައި ވަނިކޮށް، މިމެމްބަރުން މަގާމުން ވަކި ކުރުމުގެ މަރުހަލާ ކުރިޔަށް ގެންގޮސް، އޭގެ ނަތީޖާއެއްގެ ގޮތުން މެމްބަރުން ފާއިތުވެދިޔަ ޑިސެމްބަރމަހުގެ 27ވަނަ ދުވަހު މަގާމުން އިސްތިއުފާ ދެއްވިދާ މިހާތަނަށް ދޮޅުމަސް ދުވަސް ވެގެން ގޮސްފައި ވާއިރު، މިއަދާހަމައަށްވެސް، އަލަށް ކުރިމަތި ލީ މީހުންގެ ނަންތައްވެސް ކުޑަވެގެން މަޖިލިހުގެ ފްލޯއާއި ހަމައަށްވެސް ގޮސްފައެއް ނުވެއެވެ. އަދި މެމްބަރުން މަގާމުން ވަކި ނުކުރެވިގެން އެކަމާ ކަންބޮޑުވުން ފާޅުކުރަމުން އައި މެމްބަރުންގެވެސް އެއްވެސް ޝަކުވާއެއްވެސް ނެތެވެ.
ބޭނުން ނުވާބަޔަކު މުވައްސަސާތަކުގައި ތިބެގެން ހިންހަމަ އެއް ނުޖެހެއެވެ. ދެން އޮތީ ވަރިހަމަ ކޮށްލުމެވެ. ކުރީ ސަރުކާރުތަކުން މިނިވަން މުވައްސާތަކުގެ މެމްބަރުން މަގާމުން ވަކިކުރުމާއި އައްޔަން ކުރުން "އޯވަރ ނައިޓެއްގެ" ތެރޭގައި ކުރިޔަށް ދިޔަކަމުގެ ޝަކުވާ އެންމެ ބޮޑަށް ކުރަމުން އައި ފަރާތްތަކަށް މިއަދު މިއޮތީ މި މުވައްސަސާ ގާނޫނީ ހުސްކަމެއްގައި އޮތުންވެސް ވަރިހަމަ ވެފައެވެ. ފެނިގެން ދަނީ ވަރަށްވެސް އާދަޔާ ޚިލާފު މަންޒަރެކެވެ. ވަކިކުރުން "އޯވަރ ނައިޓަކުން" ނިންމާ އައްޔަން ކުރުން "ބަރެވެލި ސްޕީޑުގައި" ކުރިޔަށް ދާތަނެވެ.
