ރިޒުގު ދެއްވާނީ އިންޑިއާއިންކަމަށް ދެކިގެން ދިވެހި ރައްޔިތުން ނުތިބޭނެކަމަށް ރައްޔިތުން މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓަރ) ވިދާޅުވެއްޖެއެވެ.

ރާއްޖެއާއި އިންޑިއާއާއިއެކު ވެފައިވާ އެއްބަސްވުންތަކުގައި ޤައުމީ ސަލާމަތަށް، ނުވަތަ މިނިވަންކަމަށް ބުރޫއަރާފަދަ އެއްވެސް އެއްބަސްވުމެއް ނެތްކަމަށާއި، އެންމެ ބޮޑު ބިރުވެރިކަމެއް އޮތީ، ރާއްޖެއާއިމެދު އިންޑިއާއިން ފިޔަވަޅު އަޅާފާނެތީ ކަމުގައި ދިވެހި ސަރުކާރުން ވަނީ ބުނެފައެވެ.

ސަރުކާރުގެ މިވާހަތަކާއި ގުޅިގެން މެމްބަރު ނަޝީދު ވިދާޅުވީ، ސަރުކާރުން ގަބޫލު ކުރަމުންދަނީ އިންޑިއާގެ އެހީ ނުލިއްބިޖެނަމަ ރާއްޖެއަށް އުޅެންވެސް ދަތިވާނެކަމަށެވެ. ނަމަވެސް މީގެ ކުރިންވެސް އިންޑިއާއިން ރާއްޖެއަށް ތަފާތު އެކި ތަކެތި ދިނުމަށް ދެކޮޅު ހެދުމުންވެސް އެތަކެތި ރާއްޖެއަށް ގެނެވޭނެ އިންތިޒާމު ހަމަޖެއްސިކަމަށެވެ. ފިޔާ، އަލުވި، ބިސް ހިމެނޭ ފޮޓޯއަކާއިއެކު މޮސްޓަރ ކުރި ޓުވީޓުގައި ވިދާޅުވީ މިތަކެތި އިންޑިއާއިން ނުދިނަސް ދޭނެ ޤައުމުތައް ހުންނާނެކަމަށެވެ.

މީ ހަމައެކަނި އިންޑިޔާ އިން ހައްދާ ބާވަތްތަކެއް ނޫން ރުފިޔާ ދިނީމަ ދުނިޔޭގެ ކޮންމެ ގައުމަކުން ވެސް މި ގަންނަން ލިބޭނެ. ރިޒުގު ދެއްވަނީ އިންޑިޔާ އަކުން ނޫން. އިންޑިޔާ އިން ދިނަސް ނުދިނަސް މިތަކެތި ކައިގެން ދިވެހިން ތިބޭނީ. ހިލަވެލި ނުވިއްކީމަވެސް ހިލަވެލި ހޯދި ދިވެހިން މީ.

– މޮސްޓަރ ވިދާޅުވިއެވެ.

މީ ހަމައެކަނި އިންޑިޔާ އިން ހައްދާ ބާވަތްތަކެއް ނޫން ރުފިޔާ ދިނީމަ ދުނިޔޭގެ ކޮންމެ ގައުމަކުން ވެސް މި ގަންނަން ލިބޭނެ… ރިޒުގު ދެއްވަނީ އިންޑިޔާ އަކުން ނޫން އިންޑިޔާ އިން ދިނަސް ނުދިނަސް މިތަކެތި ކައިގެން ދިވެހިން ތިބޭނީ… ހިލަވެލި ނުވިއްކީމަވެސް ހިލަވެލި ހޯދި ދިވެހިން މީ…. pic.twitter.com/XeTO7esnZx

— Mohamed Nasheed Abdulla ( MosTaaA ) (@MNA_MosTaaA) February 15, 2022

އިއްޔެގެ މަޖިލީހުގެ ކޮމެޓީގައި ފޮރިން ސެކްރެޓަރީ އަބްދުލްޣަފޫރު މުހައްމަދު ވިދާޅުވީ "އިންޑިއާ އައުޓް"ގެ ސަބަބުން ރާއްޖެއާއި އިންޑިއާއާ ދެމެދު އޮންނަ ގުޅުމަށް އަސަރުކުރާނެ ކަމަށާއި އަދި އެކަން އިންޑިއާ ސަރުކާރާ ހިސާބުން ނުފެށިދާނެ ކަމަށެވެ.

އެގޮތުން މަޖިލީހަށް ހާޒިރުކުރި ފޮރިން މިނިސްޓްރީގެ ޓީމުގައި ހިމެނިވަޑައިގަންނަވާ ތިން ބޭފުޅުން ވެސް ފާހަގަ ކުރެއްވި ގޮތުގައި ވަކި ގައުމެއްގެ ރައްޔިތުންނާއި ދެކޮޅަށް މިގޮތަށް ކުރިޔަށް ގެންދެވޭ ހަރަކާތެއްގެ ސަބަބުން މަޝްރަހު ހޫނުވެއްޖެ ކަމުގައި ވާނަމަ އެކަމުގެ ދައްޗާއި އުނދަގޫ އިންޑިއާގައި ދިރިއުޅެމުން އަންނަ ދިވެހި ރައްޔިތުންނަށް ފޯރާނެއެވެ. އަދި އެގައުމުގައި ދިރިއުޅޭ ރައްޔިތުންގެ ސަލާމަތަށް މިކަމުގެ ސަބަބުން ބޮޑެތި ގޮންޖެހުންތަކަކާއި ކުރިމަތިވެދާނެކަމަށް ފާހަގަ ކުރެއްވިއެވެ. ފޮރިންމިނިސްޓްރީގެ ޓީމުން ބުނެފައިވަނީ "އިންޑިއާ އައުޓް" ކެމްޕެއިންގެ އެއްވެސް އަސަރެއް މި ވަގުތު ނުކުރި ނަމަވެސް ސިޔާސީ މަގްސަދެއްގައި ހިންގާ މި ކެމްޕެއިންގެ ސަބަބުން ގެއްލުންވުމުގެ ފުރުސަތު ބޮޑުކަމަށެވެ.

ފޮރިން ސެކްރެޓަރީ ޣަފޫރު ވިދާޅުވީ އިންޑިއާގެ ޕާލިމަންޓާ ހިސާބަށް މައްސަލަ ގޮއްސި ނަމަ ރާއްޖެއާ މެދު ފިޔަވަޅު އަޅަން މަޖުބޫރުވެ ދެ ގައުމުގެ ގުޅުމަށް ހީނަރުކަން އަތުވެދާނެ ކަމަށެވެ. އަދި ރާއްޖެއަކީ މުޅިންހެން އިމްޕޯޓް މުދަލަށް ބަރޯސާވާ ގައުމަކަށް ވެފައި ކުދިކުދި ކަންކަމުން ވެސް ރާއްޖެއަށް އަސަރުކުރާނެ ކަމަށެވެ. އިންޑިއާ އަކީ މި ސަރަހައްދުގައި ވެސް އެންމެ ބޮޑު ގައުމަށްވާތީ އިންޑިއާއަށް އިންތިހާއަށް ކަންކަމުގައި ބަރޯސާވާންޖެހޭ ކަމުގައިވެސް ވިދާޅުވިއެވެ.