ވެރިކަން ކުރާ ކޯލިޝަންގައި ހިމެނޭ އެންމެ ބޮޑު ޕާޓީ އެމްޑީޕީގެ ޗެއަރޕާސަން އިންތިޚާބު ފެށިގެން އައީ އެ އިންތިޚާބުގައި ގިނަ އަދަދެއްގެ ކެނޑިޑޭޓުންތަކެއް ވާދަ ކުރާނޭކަމުގެ ކޮޅުމަތިވެސް ފެންނަމުންނެވެ.
މިގޮތުން އެންމެ ފުރަތަމަ މި އިންތިޚާބުގައި، ޔޫތު މިނިސްޓަރު ކަމުގެ މަގާމުގައި ހުންނެވި އަހުމަދު މަހުލޫފް ވާދަ ކުރައްވާނޭކަމަށް އަޑު ފެތުރިގެން ދިޔައެވެ. އަދި އެއަށްފަހު އިންތިޚާބުގައި ވާދަ ކުރައްވާނޭކަމަށް އިއުލާން ކުރެއްވީ އެސްޓީއޯގެ އެމްޑީގެ މަގާމުގައި ހުންނެވި ހުސެއިން އަމްރުއެވެ. އަދި އެއަށްފަހު، ފޮރިންގ މިނިސްޓަރ އަބުދުﷲ ޝާހިދުވެސް އެމްޑީޕީގެ ޗެއަރޕަރސަން އިންތިޚާބުގައި ވާދަކުރައްވާނެ ކަމުގެ އަޑުތައް މީޑިއާގައި ފެތުރިގެން ގޮސްފައި ވެއެވެ. އަދި މައުލުމާތު ލިބިފައިވާ ގޮތުގައި މި އިންތިޚާބުގައި ވާދަކުރެއްވުމާއި ގުޅޭގޮތުން ޝާހިދު އަރިސް ބައެއް ފަރާތްތަކާއި މަޝްވަރާވެސް ކުރައްވާފައި ވެއެވެ. އެހެންނަމަވެސް ފަހުން ވަނީ އިންތިޚާބުގައި ވާދަ ކުރައްވަން ގަސްތު ނުކުރައްވާކަން މީޑިއާގައި ހާމަ ކުރައްވާފައެވެ.
ކޮންމެއަކަސް، އެމްޑީޕީގެ އެތެރޭގެ އެންމެ ބާރުގަދަ އެއް މަގާމް ކަމުގައިވާ ޗެއަރ ޕާރސަންކަމުގެ އިންތިޚާބުގައި ވާދަ ކުރައްވާނޭކަމަށް މީޑިއާގައި އާންމުވެގެންދިޔަ ފަރާތްތަކުގެ އިތުރުންވެސް، މިއިންތިޚާބުގައި ވާދަކުރުމުގެ ޝައުގުވެރިކަން ގިނަ ބަޔަކު ފާޅުކުރާނެކަމަށް ބެލެވިފައިވި ނަމަވެސް، މިއިންތިޚާބަށް ފުރުސަތު ހުޅުވާލުމާއި ހަމައިން ފެންމަތިވެގެން ގޮސްފައިވަނީ މުޅިން ތަފާތު މަންޒަރުތަކެއްކަން ފާހަގަ ކޮށްލާން ޖެހެއެވެ.
އެންމެ ފަހުން އިންތިޚާބުގައި ވާދަކުރައްވާނޭކަން އިއުލާން ކުރައްވާފައިވަނީ ރައީސް ސާލިހުގެ ކެބިނެޓުގައި ހުންނެވި، ސާލިހު އެންމެ އިތުބާރު ކުރައްވާ ވަޒީރު ކަމުގައި ގިނަބަޔަކު ދެކޭ، އިކޮނޮމިކް މިނިސްޓަރު ފައްޔާޒް އިސްމާއިލެވެ. އަދި އިކޮނޮމިކް މިނިސްޓަރު ފައްޔާޒު މި އިންތިޚާބުގައި ވާދަކުރައްވާނޭކަމަށް އިއުލާން ކުރެއްވުމާއި ހަމައިން، އެމްޑިޕީގެ ރައީސް ނަޝީދުގެ ތާޢީދާއެކީ މިއިންތިޚާބުގައި ވާދަކުރައްވާކަމަށް ބެލެވެމުން އައި، އެސްޓީއޯގެ އެމްޑީ ހުސެއިން އަމުރު ނަން އަނބުރާ ގެންދަވާ، އިންތިޚާބަށް ނިކުންނެވީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއެވެ.
އެހާތަނުން މިއިންތިޚާބުގެ ކެމްޕޭނުގެ މިސްރާބު ބަދަލުވެގެން ދިޔައީ އެންމެ ދެބޭފުޅެއްގެ ދެމެދުގައި ކުރިޔަށްދާ ވާދަވެރި ކެމްޕޭނަކަށެވެ.
ދެފެކްޝަންގެ ވާދަވެރިކަން!
އެމްޑީޕީގެ ރައީސް އަދި ރައްޔިތުންގެ މަޖިލިހުގެ ރައީސް މުހައްމަދު ނަޝީދާއި ރައީސް ސާލިހާއި ދެބޭފުޅުންގެ މެދުގައި ފާއިތުވެދިޔަ އަހަރު އުފެދިގެން ޚިޔާލު ތަފާތުވުމުގައި ޕާޓީ ދެ ފެކްޝަނަކަށް ބެހިގެން ދިޔައެވެ. ވަކީން ޚާއްސަ ގޮތެއްގައި ރައްޔިތުންގެ މަޖިލިހުގައި އޮތް އެމްޑީޕީގެ ސުޕަރ މެޖޯރިޓީ ދެބޭފުޅުންގެ މެދުގައި ބެހި، މަޖިލިސް ދެ ފެކްޝަނެއްގެ ގޮތުގައި މަސައްކަތް ކުރަން ފަށާފައި ވެއެވެ. އަދި މި ބައިބައި ވުމާއި ޚިޔާލު ތަފާތުވުމުގެ ތެރެއިން، މަޖިލިސް ބައެއް މެމްބަރުން މަޖިލިސް ފްލޯގައި ރައީސް ސާލިހުގެ އިސްތިއުފާއަށްވެސް ގޮވާފައިވާކަން ފާހަގަ ކޮށްލާން ޖެހެއެވެ.
އަދި އެއަށްފަހު، މަޖިލިސް މެޖޯރިޓީ އެމަނިކްފާނުގެ އަތްޕުޅުގައި އޮތްކަމަށް ރައީސް ސާލިހު ވިދާޅުވި ހިސާބުން، މަޖިލުހުގެ ތެރޭގައި އޮތް ހަގީގީ ވާދަވެރިކަމަކީ ރައީސް ސާލިހާއި ރައީސް ނަޝީދާއި ދެބޭފުޅުންގެ ދެމެދުގައި އޮތް ވާދަވެރި ކަމެއްކަންވެސް ގިނަ ބަޔަކަށް ޔަގީން ކުރެވިގެން ދިޔައެވެ. ހަމަ އެއާއެކު، ސޯޝަލް މީޑިއާގެ އާންމު ބައެއް ފޯރަމްތަކުގައި މަޖިލިސް ރައީސް މުހައްމަދު ނަޝީދު، ސިޔާސީ ގޮތުން ރައީސް ސާލިހާއެކީ މަސައްކަތް ދެން ނުކުރައްވާނޭކަމަށް ވިދާޅުވި ހިސާބުން، ގިނަ ކަންކަމުގައި މި ދެބޭފުޅުންގެ ޚިޔާލު ތަފާތުވެ، ޕާޓީގެ ތެރޭގައި އުފެދިގެން ގޮސްފައިވާ ދެބަސްވުންތަކާއި ކޯޅުންތަކު ހުޅު ރޯވެގެން ގޮސްފައިވާ މިންވަރު ވަރަށްވެސް ރަގަޅަށް އާންމުވެ ތަމްސީލު ވެގެން ގޮސްފައެވެ.
ކޮމެއަކަސް، މި ޚިޔާލު ތަފާތުވުންތަކާއި ކޯޅުންތަކަށްފަހު، 6 މޭގެ ޓެރަރިސްޓު ހަމަލާއިން ގަދަވެ، ރައީސް ނަޝީދު މާލެ ވަޑައިގަތުމަށްފަހު، އެމްޑީޕީގެ އެތެރޭގެ ކޯޅުން ފިނި ކުރެވިގެން ހިގައްޖެކަމަށް ބެލެވިފައިވިގެން ގޮސްފައިވަނީ، ރައީސް ނަޝީދާއި ރައީސް ސާލިހާއި ދެބޭފުޅުން އެކީގައި ކޮމަންޑޫ ދާއިރާގެ ކެމްޕޭނަށް ނިކުމެވަޑައިގަތުމާއި ގުޅިގެންނެވެ. އެހެންނަމަވެ ދެބޭފުޅުންގެވެސް ގާތް ބައެއް ފަރާތްތަކުން ފާހަގަ ކޮށްފައި ވާގޮތުގައި، ޕާޓީގެ އެއްބައިވަންތަކަމަށްޓަކާ ހުރި ޚިޔާލުތަފާތުވުންތައް އެވަގުތަށް އެއްކައިރިކޮށް، ކޮމަންޑޫ ދާއިރާގެ ބައި އިލެކްޝަން ޕާޓީއަށް ކާމިޔާބު ކޮށްދިނުމަށް އެކީގައި ކެމްޕޭނަށް ނިކުންނެވުން ނޫން އިތުރު އިޚްތިޔާރެއް ދެބޭފުޅުންނަވެސް ނެތި، ބައި އިލެކްޝަންގެ ކެމްޕޭން އެކީގައި ކުރެއްވުމަށް އޮތީ ހުރިހާ ގޮތަކުންވެސް ދެބޭފުޅުންނަށް މަޖުބޫރު ވެފައެވެ.
އަދި އެއީ ޕާޓީގެ އެތެރޭގެ ބާރުވެރިކަން ހޯދާ، 2023ގެ ޓިކެޓް ކަށަވަރު ކުރުމަށް ދެބޭފުޅުންމެ ކުރައްވަމުން ގެންދަވާ މަސައްކަތްތަކުގެ ތެރެއިން ހަމަ ދެބޭފުޅުންނަށްމެ ކާމިޔާބު ކުރުން މުހިންމު ގޮނޑިއަކަށް ވެގެން ގޮސްފައިވާ ކަމީވެސް ކަށަވަރުވެ ޔަގީންވާން އޮތް ކަމެކެވެ.
އެހެންނަމަވެސް، ކެމްޕޭނަށް ދެ ރައީސުން އެކީގައި ނިކުމެވަޑައި ގަތެއްކަމަކު، ޕާޓީގެ ތެރޭގައި އޮތް އުދާސްތަކާއި، ޚިޔާލު ތަފާތުވުންތައް ހަގީގަތުގައި އެކައިރި ކުރެވިފައި ނުވާކަން އެންމެ ފުރިހަމަޔަށް ތަމްސީލުވެގެންދާ އެއް ކަމެއްގެ ގޮތުގައި ފެނިގެން ދަނީ، އެމްޑީޕީގެ އެތެރޭގެ އިންތިޚާބުގައި އިކޮނޮމިކްސް މިނިސްޓަރު ފައްޔާޒު އިސްމާއިލާއި މަޖިލިސް މެމްބަރު އިމްތިޔާޒު ފަހުމީ ވާދަކުރައްވާނެކަން އިއުލާން ކުރެއްވި ހިސާބުންނެވެ.
މިގޮތުން، މި ކެމްޕޭން މިހާރު ފެށިގެން ކުރިޔަށް ދާއިރު، ދެ ކެނޑިޑޭޓުންނަށް ތާޢީދު ކުރާކަން ހާމަ ކުރަމުންދާ ފަރާތްތަކަށް އެކަނި ބަލާލުމުންވެސް، މި ކެމްޕޭނު ހަގީގަތުގައިވެސް މިސްރާބު ހިފާފައި ހުރީ ދެފެކްޝަންގެ ގަދަ ހިފުމަކަށްކަން ކެމްޕޭންގެ ފެށުމާ ހަމައިންވެސް އޮތީ ވަރަށްވެސް ރަގަޅަށް ހާމަވެ ފެންނާށެވެ.
ހަގީގީ ވާދަވެރިކަމަކީ 2023އަށް އޮތް ވާދަވެރިކަން!
އެމްޑީޕީގެ ޗެއަރޕާރަސަންގެ އިންތިޚާބުގެ މިސްރާބު އެންމެ ފަހުން ބަދަލުވެގެން ދިޔަ ގޮތުން، ގިނަބަޔަކު މިއަދު ބަގޫލު ކުރަމުންދަނީ، މި އިންތިޚާބުގައި އިކޮނޮމިކްސް މިނިސްޓަރ ފައްޔާޒު އިސްމާއީލާއި މަޖިލިސް މެމްބަރު އިމްތިޔާޒު ފަހުމީ ވާދަކުރެއްވި ނަމަވެސް، މިއިންތިޚާބަކީ ހަގީގަތުގައިވެސް ރައީސް ސާލިހާއި ރައީސް ނަޝީދާ ދެބޭފުޅުންގެ މެދުގައި އޮތް ވާދެވެރި އިންތިޚާބެއްގެ ގޮތުގައެވެ.
ސަބަބަކީ އިންތިޚާބުގައި ވާދަކުރާނެ ކަމަށް އެންމެ ފުރަތަމަ އަޑު ފެތުރިގެންދިޔަ އެއްވެސް ބޭފުޅަކު އިންތިޚާބުގައި ވާދަނުކޮށް، އަދި ވާދަކުރައްވާނޭކަމަށް އިއުލާން ކުރެއްވި އެސްޓީއޯގެ އެމްޑީ ހުސެއިން އަމުރުވެސް އެންމެ ފަހުން ވާދަ ނުކުރައްވަން ނިންމަވާ، ރައީސް ސާލިހާއި ރައީސް ނަޝީދާއި ދެބޭފުޅުންގެ އެންމެ އަރިސް ދެ ބޭފުޅުން އެންމެފަހުން އިންތިޚާބުގައި ވާދަ ކުރެއްވުމަށް ނިންމެވުމާއި ގުޅިގެންނެވެ.
އެހެންކަމުން، މިއަދު ކަށަވަރުވެ ޔަގީންވާން އޮތް އެއް ކަމަކީ، މިއިންތިޚާބަކީ ހަގީގަތުގައވެސްި 2023ގެ ރިޔާސީ އިންތިޚާބުގެ ވާދަވެރިކަމާއި ގުޅި ލާމެހިފައި އޮތް އިންތިޚާބެއް ކަމެވެ. އަދި 2023އަށް ޕާޓީގެ ޓިކެޓް ކަށަވަރު ކުރުމާއިވެސް ގުޅި ލާމެހިފައި އޮތް އިންތިޚާބެއް ކަމެވެ. ހަމައެއާއެކު، މިއީ އެމްޑީޕީގެ އެތެރޭގައި އުފެދިފައި އޮތް ދެފެކްޝަންގެ ވާދަވެރިކަން ވަރަށްވެސް ރަގަޅަށް ތަމްސީލު ވެގެންދާނެ އިންތިޚާބަކަށް ވެގެން ދިއުމުގެ އިތުރުން، މިއިންތިޚާބު ނިމިގެންދާ ގޮތެއްގެ މައްޗަށް އެމްޑީޕީގެ އަމާޒު 2023އަށް ހިފާފައި ހުރީ ކޮންގޮތަކަށްކަން ވަރަށްވެސް ރަގަޅަށް ވަޒަން ކުރެވިގެން ދާނޭކަމަށްވެސް ގިނަބަޔަކު ދަނީ ދެކެމުންނެވެ.
