އިންޑިއާގެ ކުރީގެ ކްރިކެޓް ކެޕްޓަން ކަޕިލް ދޭވްގެ ދިރިއުޅުމުގެ މައްޗަށް ބިނާކޮށް ހެދި ފިލްމު "83″ އޮންލައިން ޕްރިމިއާ ދެ ޕްލެޓްފޯމެއްގައި އެއްފަހަރާ ކުރަން ނިންމައިފިއެވެ.
އާންމުގޮތެއްގައި އޮންލައިންކޮށް ފިލްމު ގެނެސްދެނީ އެއް ޕްލެޓްފޯމުންނެވެ. ނަމަވެސް ފިލްމު "83″ ނެޓްފްލިކްސް އާއި ޑިޒްނީ ޕްލަސް ހޮޓްސްޓާއިން އެކުގައި ޕްރިމިއާ ކުރުމަށް ވަނީ ނިންމާފައެވެ. ޚަބަރުތައް ބުނާގޮތުގައި ނެޓްފްލިކްސް އިން ގެނެސްދެޭނީ ފިލްމުގެ ހިންދީ ވާޝަނެވެ. އަދި ޑިޒްނީން ދައްކާނީ ފިލްމުގެ ޓެމިލް، ޓެލެގޫ، ކަންނަޑާ އަދި މަލަޔާލަމް ވާޝަނެވެ
މި ފިލްމައަކީ 1983 ވަނަ އަހަރު ވޯލްޑް ކަޕް ކާމިޔާބު ކުރުމަށް ކްރިކެޓް ޓީމުން ކުރި މަސްކަތްތަށް ދައްކުވައިދޭ ފިލްމެކެވެ.
މި ސްޕޯޓްސް ޑްރާމާގެ ލީޑުން ފެނިގެން ދަނީ ރަންވީރު ސިންގްއެވެ. އަދި ހަމަ އެހެންމެ މި ފިލްމްގައި ކަޕިލް ދޭވްގެ އަންހެނުންގެ ގޮތުގައި ދީޕިކާ ވަނީ ފެނިގެން ގޮސްފައެވެ. މިއީ މިދެތަރިން ކައިވެންޏަށް ފަހު ބެލުންތެރިންނަށް އެކުގައި ފެނިގެން ދިޔަ ފުރަތަމަ ފިލްމްވެސް މެއެވެ.
މި ފިލްމު އޮންލައިން ޕްލެޓްފޯމް ގައި ޕްރިމިއާ ކުރަނީ މިމަހުގެ ފަހު ކޮޅުގައެވެ.
ކަބީރު ޚާން ޑައިރެކްޓް ކޮށްފައިވާ މި ފިލްމް ޕްރޮޑިއުސް ކޮށްފައިވަނީ ދީޕިކާ ޕަޑުކޯން، ކަބީރު ޚާން، ވިޝްނު ވަރްދަން އިންދުރީ، ސާޖިދް ނަޑިއާޑުވާލާގެ އިތުރުން ޝީތަލް ވިނޯދް ތަލްވާރް އާއި ރިލަޔަންސް އެންޓަޓައިންމެންޓް އަދި 83 ފިލްމު ލިމިޓެޑުންނެވެ.
