މާދަމާ ބާއްވާ ކޮމަންޑޫ ދާއިރާގެ ބައި-އިލެކްޝަންގައި ވީހާވެސް ހެނދުނާ ނިކުމެ ވޯޓުލުމުގެ ކަންކަން ކުރިއަށް ގެންދިއުމަށް އިދިކޮޅު ޕްރޮގްރެސިވް ކޯލިޝަނުން އިލްތިމާސްކޮށްފިއެވެ.
މާދަމާގެ އިންތިޚާބަށް އިދިކޮޅު ކޯލިޝަނުން ވެފައިވާ ތައްޔާރީތަކާއި ގުޅޭގޮތުން އެޕާޓީ އޮފީހުގައި ބޭއްވި ނޫސްވެރިންގެ ބައްދަލުވުމުގައި ކޯލިޝަންގެ ތަރުޖަމާނު ހީނާ ވަލީދު ވިދާޅުވީ އިންތިޚާބުގެ ކެމްޕެއިން ފޯރިއާއިކުކޮށް، މިއިންތިޚާބުގެ ވޯޓުލުމަށް މިހާރު ތައްޔާރުވަމުންދާކަމަށެވެ.
މިއިންތިޚާބުގައި ޕީޕީއެމްގެ ކެނޑިޑޭޓް ފަތުޚީ އިންތިޚާބު ކުރުމަށް ކޮމަންޑޫ ދާއިރާގެ ތިން ރަށުން ކުރަމުންދާ މަސައްކަތަކީ ވަރަށް ޤައުމީ ރޫހެއްގައި ކުރެވެމުންދާ ޤައުމީ މަސައްކަތެއް ކަމަށް ހީނާ ވިދާޅުވިއެވެ. މާދަމާ ވީހާވެސް ހެނދުނާ ނިކުމެ ހުރިހާ ބޭފުޅުންވެސް ފަތުޙީއަށް ވޯޓު ދެއްވުމަށް ހީނާ ވަނީ އެދިފައެވެ. އަދި ހުރިހާ ބޭފުޅުންވެސް މާދަމާ މެންދުރު 12ގެ ކުރިން ވޯޓުލައި ނިންމުމަކީ މުހިންމު ކަމެއްގެ ގޮތުގައި ހީނާވަނީ ފާހަގަ ކުރައްވާފައެވެ.
ކޮމަންޑޫ ދާއިރާގެ ބައި އިލެކްޝަންގައި ޖުމްލަ 7 ފޮށި ބަހައްޓާއިރު، މާލޭގައި 2 ފޮށި ބަހައްޓާނެއެވެ. މާލޭގައި ވޯޓު ފޮށިތައް ބެހެއްޓުމަށް ހަމަޖެހިފައިވަނީ އިސްކަންދަރު ސްކޫލުގައެވެ. ވޯޓުލުން ހެނދުނު 8 ޖަހާއިރު ފަށާއިރު، ވޯޓުމުގެ އެންމެ ފަހު ވަގުތަކީ ހަވީރު 4 ޖަހާއިރެވެ.
ހީނާ ވިދާޅުވީ މިއިންތިޚާބުގައި ޕީޕީއެމްގެ ކެނޑިޑޭޓް މޫސާ ފަތުޙީއަށް ވޯޓު ދެއްވަންވީ އެމަނިކުފާނު ނިކުންނަވަނީ މިޤައުމުގެ މިނިވަންކަމާއި ސިޔާސަދަތާއު އިސްތިޤުލާލު ނެހެއްޓުމަށް ކަމަށްވުމުންނެވެ. އަދި ފަތުޙީއަކީ ޤާނޫނީ އިމުން ބޭރުން ކުރަމުންކަންކަމަށް ނޫނެކޭބުނެ ސަރުކާރު ޖަވާބު ދާރީ ކުރާނެ ބޭފުޅަކަށްވެސް ވާތީކަމަށެވެ. ފަތުޙީއަކީ ލާމަރުކަޒީ ނިޒާމަށް ފަރިތަ އެނިޒާމުގެ ތެރެއިން ކޮމަންޑު ދާއިރާގެ އެކި ރަށްތަކަށް މިހާތަނަށްވެސް ގިނަ މަސައްކަތްތަކެއް ކުރައްވާފައިވާ އަދި މުސްތަގުބަލުގައި އަދި މާގިނަ ޚިދުމަތްތަކެއް ކުރައްވާނެ ބޭފުޅެއްކަމަށް ހީނާ ވިދާޅުވިއެވެ.
އިލެކްޝަން ކޮމިޝަނުން ވަނީ ވޯޓުލުން ކުރިއަށްދާއިރު، އިންތިޚާބާގުޅޭ ޝަކުވާ ނުވަތަ މައްސަލަ ހުށަހަޅަން ބޭނުންވެއްޖެ ހިނދެއްގައި، އިލެކްޝަންސް ކޮމިޝަނަށް މައްސަލަ ހުށަހެޅުމުގެ އިންތިޒާމް ހަމަޖައްސައިފައެވެ. މާދަމާ ބާއްވާ ތިން އިންތިޚާބުގައިވެސް ވޯޓުލުން ކުރިއަށްދާނީ ހެނދުނު 8 އިން ހަވީރު 4 ޖަހަންދެނެވެ. މެންދުރުފަހު 3 އިން ފެށިގެން ވޯޓުލުމަށް ޚާއްސަ ކޮށްފައިވަނީ ކޯވިޑަށް ޕޮޒިޓިވްވެފައިވާ މީހުންނާއި، ކަރަންޓީނުގައި ތިބޭ މީހުންނަށެވެ.
