"ދަ ކަޕިލް ޝަރުމާ ޝޯ" ގައި ތަފާތު ކެރެކްޓަރ ތަކަކުން ބެލުންތެރިންގެ ލޯބި ހޯދާފައިވާ ކޮމޭޑިއަން ސުނިލް ގްރޯވާ ހިތުގެ ނާރުތަކެއް ބްލޮކްވެފައި ހުރުމުގެ ސަބަބުން ވަރަށް އަވަހަށް ހިތުގެ އޮޕަރޭޝަނެއް ކުރަން ހަމަޖެހިފައިވާ ކަމަށް ޚަބަރުތަށް ބުނެފިއެވެ.
ކަޕިލް ޝަރުމާ ޝޯގައި ސުނިލް ވަނީ އަންހެން ކެރެކްޓާއެއް ކަމަށްވާ ގުއްތީ އާއި ޑރ ގުލާޓީ ފަދަ ކެރެކްޓާތަކުން ބެލުންތެރިން ހެއްވާލައިފައެވެ. މި މަގުބޫލު ކަމާއެކުގައި އޭނާ ވަނީ ބައެއް ފިލްމްތަކުގައި ސަޕޯޓިންގ ރޯލުތައްވެސް ކުޅެފައެވެ.
ސުނިލްގެ ހިތުގެ ސާޖަރީއެއް ހަދަން ޖެހޭކަން އެނގުނުއިރު އޭނާ ގެންދިޔައީ ވެބް ސީރީޒެއް ޝޫޓްކުރަމުންނެވެ. މީގެ ދެތިން ދުވަސް ކުރިން ސުނިލް ވަނީ އޭޝިއަން ހާޓް އިންސްޓިޓުޓްގައި ހިތުގެ އޮޕަރޭޝަނެއް ކޮށްފައެވެ.
އަދި އޮޕަރޭޝަނަށް ފަހު މިއަދު އޭނާ ވަނީ ހޮސްޕިޓަލުން ދޫކޮށްލާފައެވެ. ހޮސްޕިޓަލުން ދޫކޮށްލުމުގެ ކުރިން ބަލި ހާލަތު ރަނގަޅުވޭތޯ ބެލުމަށް އޭނާ ވަނީ ބާއްވާފައެވެ.
މިއަދު ވަނީ ސުނިލް ގެއަށް ދޫކޮށްލާފައެވެ. މި ދިޔަ މަހުގެ 8 ވަނަ ދުވަހުވެސް އޭނާއަށް ވަނީ މައިނާ ހާޓްއެޓޭކެއް ޖެހިފައެވެ. އަދި ސާޖަރީގެ ކުރިން ކޯވިޑަށް ޕޮޒިޓިވް ވެގެން ވަނީ ފަރުވާދީފައެވެ.
ބަލިން އެއްކޮށް ރަނގަޅުވެ އަލުން އެނބުރި އޭނާ މަސައްކަތަށް ނުކުންނާނެ ދުވަހެއް އަދި ނޭނގެއެވެ.
