މޫނު ބުރުގާ އެޅުމުގެ މައްސަލާގައި، ކުރިއަށް އޮތް ބައި އިލެކްޝަންގައި އެމްޑީޕީއަށް ވޯޓް ނުދިނުމަށް ދީނީ ޢިލްމުވެރިޔާ ޝައިޚް ޢަލީ ޒައިދު ގޮވާލައްވައިފިއެވެ.
ޝައިޚް ޒައިދަކީ ސަރުކާރު ކޯލިޝަންގައި ހިމެނޭ އަދާލަތުޕާޓީގެ ބޭފުޅެކެވެ. މޫނު ބުރުގާ އަޅައިގެން ކިޔަވައިދިނުމާއި ގުޅޭގޮތުން ޚިޔާލުތަފާތުވެފައިވާއިރު، މޫނު ބުރުގާ އަޅާ ޓީޗަރުންނަށް ހުރަސް ނޭޅުއްވުމަށް ވެރިކަން ކުރާ ކޯލިޝަންގައި ހިމެނޭ އަދާލު ޕާޓީން އެޑިއުކޭޝަން މިނިސްޓްރީގައި ވަނީ އެދިފައެވެ. އެޑިއުކޭޝަން މިނިސްޓްރީން ވަނީ ބައެއް ސްކޫލުތަކުގައި ހަރަކާތްތެރިވާ މޫނު ބުރުގާ އެޅި ޓީޗަރުންނަށް ބުރުގާ ނެގުމަށް އަންގާފައެވެ.
ޢަލީ ޒައިދު ވިދާޅުވީ، މޫނުބުރުގާ މައްސަލަފަދަ ދީނާ ގުޅުންހުރި އެކިއެކި މައްސަލަތަކުގައި އެޑިޔުކޭޝަންއިން ގެންގުޅޭ ދެ ކޮޅުނުޖެހޭ ތަފާތުންކުރުންތައް ހައްދުފަހަނަ އަޅައިގޮސް އެމް.ޑީ.އެން ރިޕޯޓު ތަންފީޒުކުރާތީ، ކޮމަންޑޫ ދާއިރާ އެމްޑީޕީއަށް ނުދޭން އިލްތިމާސްކުރައްވާކަމަށެވެ.
މޫނުބުރުގާ މައްސަލަފަދަ ދީނާ ގުޅުންހުރި އެކިއެކި މައްސަލަތަކުގައި އެޑިޔުކޭޝަންއިން ގެންގުޅޭ 2 ކޮޅުނުޖެހޭ ތަފާތުންކުރުންތައް ހައްދުފަހަނަ އަޅައިގޮސް އެމް.ޑީ.އެން ރިޕޯޓު ތަންފީޒުކުރާތީވެ، ކޮމަންޑޫ ދާއިރާ MDP އަށް ނުދޭން އެދާއިރާގެ ލޮބުވެތި ރައްޔިތުންގެ ކިބައިން އިލްތިމާސްކުރަމެވެ!
— Ali Zaid (@alizaid1000) January 22, 2022
މޫނު ބުރުގާ އަޅައިގެން ސްކޫލްތަކުގައި މަސައްކަތް ކުރުމާއި ގުޅޭ އުސޫލާ ގުޅޭ މަޢުލޫމާތު ޙިއްސާކުރުމަށް އެޑިއުކޭޝަން މިނިސްޓްރީން ނެރުނު ބަޔާނުގައި ބުނީސްކޫލްތަކުގައި މަސައްކަތްކުރާ މުވައްޒަފުންގެ ތެރޭގައި މިވަގުތުވެސް މޫނުބުރުގާ އަޅައިގެން މަސައްކަތް ކުރާ މުވައްޒަފުން ހިމެނޭކަމަށެވެ. އަދި އެފަދަ މުވައްޒަފުންނާ މެދު އާމަލުކުރަނީ މުވައްސަސާގެ އެހެން މުވައްޒަފުންނާ މެދުގައިވެސް ޢަމަލުކުރާ އުސޫލުން، އެއްވެސް ތަފާތުކުރުމެއް ނެތިކަމަށެވެ. އަދި، ޖެނުއަރީ 2019ގެ ފަހުން މިނިންމުމަށް އެއްވެސް ބަދަލެއް ގެނެސްފައިވެސް ނުވާނެކަމަށްވެސް މިނިސްޓްރީން ބުންޏެވެ.
އެޑިއުކޭޝަންގެ ނިންމުމާއި ގުޅިގެން ދީނީ ޢިލްމުވެރިންނާއި އެނޫންވެސް ގިނަ ބައެއްގެ ފާޑުކިޔުން ވަނީ މިނިސްޓްރީއަށް އަމާޒުވެފައެވެ.
