ހައްދުންމަތީ ކަލައިދުއާއި، ދަނބިދޫ، ކޯޒްވޭއަކުން ގުޅާލުމަށް ވެފައިވާ ވަޢުދު ތިން އަހަރުވީއިރުވެސް ފުއްދައިނުދޭކަމަށް ބުނެ ކަލައިދޫ ރައްޔިތުން ނިކުމެއި ޙްތިޖާޖުކޮށްފިއެވެ.
ކަލައިދުއާއި، ދަނބިދޫ ކޯޒްވޭއަކުން ގުޅާލުމަކީ ރައީސް އިބްރާހީމް މުޙައްމަދު ޞާލިޙްގެ ރިޔާސީ ވަޢުދުފުޅެކެވެ. ނަމަވެސް ތިން އަހަރު ވީއިރުވެސް އެ ވަޢުދު ނުފުއްދާ، ދައުލަތުގެ ބަޖެޓުގައިވެސް ނެތް މަޝްރޫޢެއްކަމަށްވާ ކޮމަންޑޫއާއި މަތިކޮމަންޑޫ ގުޅުވާލުމުގެ މަސައްކަތް އިއްޔެ ފެށުމުން ރައްޔިތުން ހިތްހަމަ ނުޖެހުން ފާޅުކުރީއެވެ.
ހައްދުންމަތީ ކަލައިދުއާއި، ދަނބިދޫ، ގުޅުވާލުމަށް ބޭނުންވާ ސާރވޭ ހަދާފައި މީވަނަމަވެސް، މިހާތަނަށް ޢަމަލީ މަސައްކަތުގެ އެއްވެސް ކަމެއް ކޮށްފައެއް ނުވެއެވެ. ކަލައިދޫ އާއި ދަނބިދޫ ގުޅާލާނެ ކަމަށް ރައީސް ވިދާޅުވި ނަމަވެސް އެ މަސައްކަތް ކުރުމަށް މިހާތަނަށް އެއްވެސް ކުންފުންޏަކާ ހަވާލެއް ނުކުރެއެވެ.
ރައްޔިތުން ނިކުމެ ޕޯސްޓަރުތަކާ އެކު, އަޑު އުފުލަމުން ބުނެފައި ވަނީ މި ދައުރު ނިމެން ގާތްވެފައިވާތީ ކޯޒްވޭގެ މަސައްކަތް ފަށާނެ ސީދާ ތާރީޚެއް ބޭނުންވާކަމަށެވެ.
ކަލައިދޫ އާއި ދަނބިދޫގެ ދުރުމިނަކީ އެއް ކިލޯމީޓަރެވެ.
ކޮމަންޑޫއާއި މަތިކޮމަންޑޫ މަޝްރޫޢު ދައުލަތުގެ ބަޖެޓްގައި ނުހިމަނާ ކުއްލިއަކަށް މަޝްރޫޢު ފެށުމުން އެއީ ކުރިއަށް އޮތް ކޮމަންޑޫ ދާއިރާގެ އިންތިޚާބަށް ނުފޫޒް ފޯރުވުންކަމަށް ބައެއް ފަރާތްތަކުން ތުހުމަތުކުރެއެވެ.
