ޕީޕީއެމްގެ ސަރުކާރެއްގައި ށ.ދިގުވެލިދޫގައި އެއާޕޯޓެއް އަޅުއްވާނެކަމަށް އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރައީސް އަދި ކުރީގެ ރައީސް ޔާމިން ޢަބްދުލްޤައްޔޫމު ވިދާޅުވެއްޖެއެވެ.
ހުސްވެފައިވާ ކޮމަންޑު ދާއިރާގެ ރައްޔިތުންގެ މަޖިލިސް ގޮނޑީގެ އިންތިޚާބުގައި ވާދަކުރައްވާ ޕީޕީއެމްގެ ކެންޑިޑޭޓު އަލްއުސްތާޛު މޫސާ ފަތުހީ އާދަމަށް ތާއީދު ހޯއްދެވުމަށް ކޮމަންޑޫ ދާއިރާއަށް ރައީސް ޔާމީން ދަތުރުފުޅުގައި އިއްޔެ ކޮމަންޑޫގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް ޔާމީން ވިދާޅުވީ ކޮމަންޑޫއާއި މާލެ އަދި މުޅި ރާއްޖެ ގުޅައިލުމުގެ ގޮތުން ކޮމަންޑޫ ކައިރީގައި އޮންނަ ދިގުވެލިދޫގައި، ޕީޕީއެމް ސަރުކާރެއްްގައި އެއާޕޯޓު ތަރައްޤީކުރައްވާނެ ކަމަށެވެ.
ކޮމަންޑޫއާއި، މާލެ އަދި މުޅި ރާއްޖެ ގުޅައިލުމުގެ ގޮތުން ކޮމަންޑޫ ކައިރީގައި އޮންނަ ދިގުވެލިދޫގައި، މާތްﷲގެ ރަޙުމަތްފުޅާއެކު ޕީޕީއެމް ސަރުކާރެއްްގައި އެއާޕޯޓު ތަރައްޤީކުރައްވާނަން. ނަމަވެސް އެއާޕޯޓް އާރާސްތުކޮށް ކޮޅަށް ޖެހުމުގައި ތިޔަ ބޭފުޅުންގެ އެހީތެރިކަން ބޮޑުވާނެ.
– ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ އެއާޕޯޓެއް އެޅިދާނެ ކަމަށެވެ. ނަމަވެސް އެއާޕޯޓަށް ދަތުރުކުރާ މަތިންދާބޯޓު ޖައްސާ ކުންފުނި (މޯލްޑިވިއަން) މި ވަގުތު އޮތީ ކަނޑު އަޑީގައި ކަމަށާއި، އެ ކުންފުނި އަލުން އާރާސްތުކޮށް ކޮޅަށްޖަހަން ޖެހުމަކީ އެމަނިކުފާނުގެ ސިޔާސީ ހަޔާތްޕުޅު އެ މަސައްކަތްޕުޅަކުން ފެއްޓެވި މަސައްކަތްޕުޅާ ހަމައަށް އަނބުރާ ވަޑައިގަންނަވަން ޖެހުން ކަމަށްވެސް ރައީސް ޔާމީން ވިދާޅުވިއެވެ.
ދިވެހި އެއާލައިން ބަނގުރޫޓުވުމުން އެމަނިކުފާނުގެ އެންމެ ޒުވާން ދުވަސްވަރުގައި އައިލެންޑް އޭވިއޭޝަން ކުންފުނި އުފައްދަވައި އެ ކުންފުނި ވަރުގަދަ ކުރައްވަން ޖެހިވަޑައިގެންނެވި ކަމަށެވެ. މިއަދުގެ ހާލަތަކީ 200 އެތައް މިލިއަން ރުފިޔާގެ ކުންފުނި މިއަދު ހަސަތޭކަ މިލިއަން ރުފިޔާއިން ދަރަނިވެރިވެ ގިނަ މަތިންދާ ބޯޓުތައް މަރާމާތުނުކުރެވި ގުރައުންޑުވެފައި ަކމަށްވެސް ވިދާޅުވިއެވެ. ދެން އޮތީ އަލުން އެ ކުންފުނި ކޮޅަށްޖެހުން ކަމަށެވެ. އެކަމަށް ބޭނުންވަނީ ކޮމަންޑޫ ރައްޔިތުންގެ ތާއީދު ކަމަށްވެސް ވިދާޅުވިއެވެ.
އެމަނިކުފާނުގެ ވެރިކަމުގައި ކޮމަންޑޫގައި ތަރައްޤީގެ ގިނަ މަޝްރޫޢުތަކެއް ހިންގެވިކަން ފާހަގަކުރައްވާފައެވެ. އެގޮތުން ކޮމަންޑޫއަށް ކުރިމަތިވެފައި އޮތް އެންމެ ބޮޑު ދަތިކަމަކީ އެ ރަށުގައި އޮތް ބޯހިޔާވަހިކަމުގެ މައްސަލައިގެ ދަތިކަން އެއިރުގެ ސަރުކާރަށް ފާހަގަކުރެވުމުން ކޮމަންޑޫގައި ބޮޑު ބިމެއް ހިއްކައި، އެ ބިމުގެ ވަށައިގެން ރިވެޓުމެންޓު ޖަހައި އެ ތަން ތައްޔާރުކުރީ އެެ ދަތިކަން އިހުސާސުވުމުން ކަމަށް ރައީސް ޔާމީން ވިދާޅުވިއެވެ. އަދި އެމަނިކުފާނުގެ ސަރުކާރުން ރަށްރަށުގެ ތަރައްޤީއަށް މަސައްކަތްކޮށްފައިވަނީ އިންތިޚާބެއް ބޯމަތިވުމުން ނޫންކަމަށާއި، ރައްޔިތުންނަށް ކަމެއް ދަތިވެ ބޮޑުވެއްޖެކަން އެނގުމާއެކު އެކަމަށް ހައްލު ހޯއްދަވައިދެއްވުމަށް މަސައްކަތްކުރައްވާ ކަމަށް ރައީސް ޔާމީން ވިދާޅުވިއެވެ.
ރައީސް ޔާމީން ކޮމަންޑޫއަށް ވަޑައިގެންނެވުމުން އެރަށުން ވަނީ އެމަނިކުފާނަށް ވަރަށް ހޫނު މަރުހަބާ އެއް ދަންނަވާފައެވެ. ރައީސް ޔާމީންވަނީ ކޮމަންޑޫ ދާއިރާގެ ގޮޑި ޕީޕީއެމްއަށް ކާމިޔާބު ކޮށްދެއްވުމަށް ވަރަށް އިހުލާސްތެރި ކަމާއިއެކު މަސައްކަތް ކޮށްދެއްވުމަށް އެދިވަޑައިގެންފައެވެ.
