ބިރު ދެއްކިޔަސް، ދަތްޕިލާ ދުއްވާލިޔަސް، އަދި ކިތަންމެ އަނިޔާއެއް ދިން ނަމަވެސް ރައްޔިތުންގެ ޚިދުމަތުގައި ސާބިތުވެ ހުންނަވާނެކަމަށް ކޮމަންޑޫ ދާއިރާއަށް ވާދަކުރައްވާ އިދިކޮޅު ކެނޑިޑޭޓް މޫސާ ފަތުހީ ވިދާޅުވެއްޖެއެވެ.
ކޮމަންޑޫ ދާއިރާގެ ރައްޔިތުންނާއި މުޚާތަބު ކުރައްވައި ވާހަކަ ދައްކަވަމުން ފަތުހީ ވިދާޅުވީ އޭނާ މަޖިލިސް އިންތިޚާބުގައި ކޮމަންޑޫ ދާއިރާއަށް ވާދަކުރައްވަނީ، ޤާނޫނުގައި މަތިކޮށްފައިވާ ޒިންމާ އަދާކުރުމަށް ވަރަށް ސާބިތު ކަމާއިއެކުގައި ކަމަށެވެ. ރައްޔިތުންނަށް ބޭނުންވާ ހައްގުތައް ކަށަވަރު ކޮށްދިނުމަށް ވާންޖެހުނު ކޮންމެ ގުރުބާނީއެއް ވެވަޑައިގަންނަވާނެކަމަށެވެ.
ޤާނޫނު އަސާސީން މަތިކޮށް، ރައްޔިތުންގެ ހައްގުތައް ހޯދުމުގައި ސަރުކާރު ޒިންމާދާރުކޮށް ޖަވާބުދާރީ ކުރުމަށް ކުރަންޖެހޭ ކޮންމެ ކަމެއް ކުރާނެކަމަށް އޭނާ ވިދާޅުވިއެވެ. މިކަމުގައި މީހާށް ލިބޭ އަނިޔާއަކަށް އެއްވެސް ބެލުމެއްނެތި އިސްކުރާނީ ޤައުމާއި، ރައްޔިތުންގެ ހައްގުތައް ކަމަށް ފަތުޙީ ވިދާޅުވިއެވެ.
އަޅުގަނޑަށް އެނގޭ ޤާނޫނު އަސާސީގެ 75 ވަނަ މާއްދާގައި ބުނަނީ ރައްޔިތުންގެ މަޖިލީހުގެ މަސައްކަތް، ރިޢާޔަތް ކުރަންޖެހޭނެ ހަމަތައް. އެހަމަތަކުގެ މަތީގައި ސާބިތު ކަމާއިއެކީގައި، މިސަރުކާރުން ކުރާ ކޮންމެ ކަމަކަށް ބިރު ދެއްކިޔަން، ދަތްޕިލާ ދުއްވާލިޔަސް، އަތް ބިންދާލިޔަސް، އަބުރު ކަތިލިޔަސް، ވަކާލަތުކުރާނެ ކަމުގެ ޔަގީންކަން ތިޔަ ލޮބުވެތި އަހުންނާއި އުހުތުންނަށް އަރުވަން.
– ފަތުހީ ވިދާޅުވިއެވެ.
ފަތުހީ ވިދާޅުވީ އޭނާގެ ޤައުމީ ޚިދުމަތުގެ 32 އަޖަރުގައި ކުރެއްވި ކޮންމެ ޚިދުމަތެއް ކޮށްދެއްވާފައިވާނީ އިހުލާސްތެރި ކަމާއިއެކުގައި ކަމަށެވެ. އަދި ދާއިރާގެ ރަށްތަކަށް ތަރައްޤީ ހޯދުމަށާއި، ގެނައުމަށް، ހީލަތެއް، މަކަރެއް ނެތްކަން ދާއިރާގެ ރައްޔިތުންނަށް ކަށަވަރުވާނެކަމަށެވެ.
ކޮމަންޑޫ ދާއިރާގެ ތަރައްޤީއާއި ގުޅިފައިވަނީ ޕީޕީއެމްގެ ރައީސް ޔާމީންގެ ފިކުރުކަމަށާއި، ރައީސް ޔާމީން ވަނީ ކޮމަންޑޫ ދާއިރާގެ ރައްޔިތުންގެ ހައްގުތައް ކަށަވަރު ކުރުމަށް ބަޖެޓުން ބޮޑު އަދަދެއްގެ ނިމިދިޔަ ވެރިކަމުގައި ހޭދަ ކޮށްފައިކަމަށް ފަތުހީ ވިދާޅުވިއެވެ. މިއަދު ކުއްލިއަކަށް އިންތިޚާބު ބޯމަތިވުމުން މިސަރުކާރަށް ކޮމަންޑޫ ދާއިރާ އޮތްކަން އެގުނު ނަމަވެސް މިއީ ރައީސް ޔާމީންގެ ތަސައްވަރާއި ތަރައްޤީގެ މަސައްކަތް އެކުލެވޭ އުންމީދު އޮތް ދައިރާއެއް ކަމަށް ފަތުހީ ވިދާޅުވިއެވެ.
