މިވަގުތު އެންމެ ދަތިކަމެއްގެ ގޮތުގައި އޮތީ ހުޅުމާލެ އާއި ގުޅޭ މައްސަލަތައް ކަމަށާއި، މި އަހަރު އެންމެ ބޭނުންވަނީ ހުޅުމާލޭގެ ރައްޔިތުންނަށްޓަކައި، ހުޅުމާލޭގެ މުނިސިޕަލް ޚިދުމަތް މާލެ ސިޓީ ކައުންސިލަށް ކުރެވޭނެ އަހަރަކަށްވުން ކަމަށް މާލެ ސިޓީގެ މޭޔަރ ޑރ. މުޙައްމަދު މުޢިއްޒު ވިދާޅުވެއްޖެ އެވެ. މޭޔަރ ވިދާޅުވީ އެކަން އެގޮތަށް ކުރަން ބޭނުންވަނީ އެއީ ޤާނޫނު ގައި ބުނާ ކަމަކަށް ވާތީކަމަށެވެ. ނަމަވެސް ސަރުކާރުން މި ފުރުޞަތު މާލެ ސިޓީ ކައުންސިލަށް ދީފައިނުވާތީ ހުޅުމާލޭގެ ޕްލޭން އަކީ ކޮބައިކަން ދެންނެވެން ނެތް ކަމަށާއި، މިހާރުވެސް ހުޅުމާލެގެ މުނިސިޕަލް ކަންކަން ކައުންސިލާއި ހަވާލުކޮށްފިނަމަ ކުރަންޖެހޭ ބައިވަރު މަސައްކަތް ހުންނާނެ ކަމަށްވެސް މޭޔަރ ވިދާޅުވިއެވެ.

ކުރަންބޭނުންވާ އެންމެ ދަތި ކަމެއްގޮތުގައި އޮތީ ހުޅުމާލެ އާއި ގުޅޭ މައްސަލަތައް. މި އަހަރު އަޅުގަނޑުމެން ބޭނުންވޭ ހުޅުމާލޭގެ ރައްޔިތުންނަށްޓަކައި،ހުޅުމާލޭގެ މުނިސިޕަލް ޚިދުމަތް މާލެ ސިޓީކައުންސިލަށް ކުރެވޭނެ އަހަރަކަށްވާން.

– މާލޭގެ މޭޔަރު މުޙައްމަދު މުޢިއްޒު

މީގެ އިތުރުން ހުޅުމާލޭގެ ދެވަނަ ފިޔަވަހިން ބޮޑު އަގުގައި ބިން ވިއްކުމާއި ގުޅިގެން ކަންބޮޑުވުން ފާޅުކުރަމުން މޭޔަރ ވިދާޅުވީ މާލޭގެ ނިކަމެތި ރައްޔިތުންނަށް ގޯތި ގެދޮރުގެ މައްސަލަ ހައްލުކުރުމަށް އިސްކަން ނުދެއްވާ ހުޅުމާލޭއިން ބިން ވިއްކުމަށް މާލެ ސިޓީ ކައުންސިލުން އެއްގޮތަކަށްވެސް ތާއީދު ނުކުރާ ކަމަށެވެ.

އަދި އެކަން އޮންނާނީ މާލެ ސިޓީ ކައުންސިލުން ރަސްމީ ސިފައެއްގައިވެސް ބަޔާންކޮށްފައި ކަމަށާއި،މޭޔަރ އަމިއްލަ ފުޅަށްވެސް އެވާހަކަ ދައްކަވާފައި ވާނެ ކަމަށް ވިދާޅުވިއެވެ. މީގެ އިތުރުން ސަރުކާރަށްވެސް އޮންނާނީ މިކަން މިގޮތަށް ކުރިއަށް ނުގެންދިއުމަށް ގޮވާލައްވާފައި ކަމަށް މޭޔަރ ވިދާޅުވިއެވެ.

ހުޅުމާލޭގެ ދެވަނަ ފިޔަވަހިން ގޯތި އަދި ބިން ވިއްކާ ކަމަށް ވަންޏާ ފުރަތަމަ ކުރަންޖެހޭނެ ކަމަކީ މާލޭގެ ރައްޔިތުންނަށް އެތަނުން އަގު ހެޔޮކޮށް، އަތްފޯރާ ފަށުގައި ގޯތި ލިބޭނެ ގޮތް ހަމަޖައްސައި ދިނުން. އެކަމަށް ފުރުސަތު ހުޅުވާލާފަ ނޫނިއްޔާ ހުޅުމާލެއިން ބިން ވިއްކުމަކީ މާލޭ ރައްޔިތުންނަށް ދެވޭ ނިކަމެތިކަމެއް ހަމަ ގައިމުވެސް.

– މާލޭގެ މޭޔަރު މުޙައްމަދު މުޢިއްޒު

މީގެ އިތުރުން މޭޔަރ މުޢިއްޒު ވިދާޅުވީ މާލޭގެ ރައްޔިތުންނަށް ދިމާވެފައިވާ ގޯތި ގެދޮރުގެ މައްސަލައަށް އެކަށީގެންވާ ހައްލެއް ހޯދުމަށް ކިރިޔާވެސް އިމްޕެކްޓެއް ލިބޭވަރު ކަމެއް ހިނގީ މިދިޔަ ސަރުކާރުގައި ހުޅުމާލެ ދެވަނަ ދިޔަވަހީގައި އެޅި ފްލެޓުތަކުގެ ސަބަބުން ކަމަށެވެ. ނަމަވެސް އަދިވެސް މާލޭގެ ރައްޔިތުންގެ ބޯހިޔާވަހިކަމުގެ މައްސަލައަށް ފުރިހަމަ ހައްލެއް ލިބިފައި ނުވާއިރު މި ސަރުކާރު އައި ފަހުން އެއާ ގާތްކުރާ ވަރުގެ އެއްވެސް ކަމެއް ހިނގަން ފަށާފައިވެސް ނެތްކަމަށްވެސް މޭޔަރ މުޢިއްޒު ވިދާޅުވި އެވެ.

މާލޭގެ ރައްޔިތުންނަށް ދެން އެންމެ ބޮޑަށް ބޭނުންވަނީ މާލެ ކައިރީގައި ހުރި ފަޅުތައްވެސް، ހާއްސަ ގޮތެއްގައި ގުޅިފަޅަކީ މާލެ ރައްޔިތުންނަށް ގޯތި ލިބޭ ތަނަކަށް ހަދަން ކަމަށާއި، މިހާރުވެސް އެދެމުން މި ދަނީ ގުޅީފަޅުގެ ބިން ހިއްކާފަ އެތަނަކީ މާލެ ރައްޔިތުންގެ ގެދޮރުގެ މައްސަލައަށް ހައްލު ގެނެސްދޭ ތަނަކަށް ހަދައިދިނުމަށް ކަމަށް މޭޔަރ މުޢިއްޒު ވިދާޅުވި އެވެ.

ނަމަވެސް ގުޅީފަޅުގައި ޕޯޓެއް އެޅުން ފިޔަވާ އިތުރު ވިސްނުމެއް ސަރުކާރުގެ  ނެތް ކަމަށް މޭޔަރ މުޢިއްޒު ވިދާޅުވި އެވެ.

މޭޔަރ މުޢިއްޒު އިތުރަށް ވިދާޅުވީ ޤާނޫނު އަސާސީގައިވެސް މާލޭގެ ގޮތުގައި ބަޔާންކޮށްފައި ވަނީ މާލެ، ހުޅުމާލެ، އަދި ވިލިމާލެ ކަމަށާއި، ރައީސުލް ޖުމްހޫރިއްޔާ ކަނޑައަޅުއްވާފައިވާ ޗާޓުގައިވެސް މާލެ ސިޓީކަމަށް ކަނޑައަޅުއްވާފައި ވަނީ މާލެ، ހުޅުމާލެ، އަދި ވިލިމާލެ ސަރަޙައްދު ފަޅުތައްވެސް ހިމެނޭގޮތަށް ކަމަށެވެ.

މޭޔަރ ވިދާޅުވީ ވިލިމާލެ އަކީވެސް ވަރަށް ގިނަ ޚިދުމަތްތަކަކަށް ބޭނުންވެފައި އޮތް ތަނަކަށްވާއިރު، ވިލިމާލޭގެ މުނިސިޕަލް ޚިދުމަތްތަކުގެ ތެރޭގައި ހިމެނޭ ގިނަ ކަންކަންވެސް މިއަހަރުތެރޭގައި ހައްލުކުރުމަށް ސިޓީ ކައުންސިލުން އަމާޒު ހިފާފައިވާކަމަށެވެ.

އޭގެތެރޭގައި ވިލިމާލޭގެ ޕާކުތައް ހެދުމާއި، މަގުހެދުން އަދި ބޯހިޔާވަހިކަމުގެ މަޝްރޫޢު ކުރިއަށް ގެންދިއުންވެސް ހިމެނޭކަމަށް މޭޔަރ ވިދާޅުވިއެވެ.