ކޮމަނޑޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެނޑިޑޭޓަށް ކެމްޕެއިން ކުރުމަށް ދައުލަތުގެ ވަޒީރުންނާއި، ސަރުކާރުގެ އިސްވެރިންގެ އިތުރުން ވެރިކަން ކުރާ މައި ޕާޓީގެ ޤައުމީ މަޖިލީހުގެ މެންބަރުން ހިމެނޭ ބޮޑު ޓީމެއް ކޮމަންޑޫއަށް ވަޑައިގެން ކެމްޕެއިން ކުރައްވަމުން އެބަ ގެންދަވައެވެ.
އަންނަ މަހުގެ ފަސް ވަނަ ދުވަހު ޞޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަންގައި ތިން ކެނޑިޑޭޓަކު ވާދަކުރެއެވެ. އެއީ ވެރިކަން ކުރާ މައި ޕާޓީ އެމްޑީޕީގެ ފަރާތުން މުޙައްމަދު ރާޝީދާއި، އިދިކޮޅު ޕީޕީއެމް އިން މޫސާ ފަތުހީ އާދަމާއި، ދާދި ފަހުން އުފެދުނު ސިޔާސީ ޕާޓީ އެމްއެންޕީގެ ޢަބްދުލް ޙަންނާން އިދުރީސްއެވެ.
ވަރަށް ފޯރިއާއި ވާދަވެރިކަމާއެކު ކުރިއަށްދާ ކެމްޕެއިންގައި ސަރުކާރުން ވަނީ އެއް ގިޔަރު ކުރިއަށް ޖައްސާލާފައެވެ. އެގޮތުން ދާދިފަހުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހާއި ކެބިނެޓްގެ ބައެއް ވަޒީރުންނާއި ސަރުކާރުގެ އިސް ބޭފުޅުން ހިމެނިވަޑައިގަންނަވާ ވަފްދެއްވަނީ ރާޝިދުގެ ކެމްޕެއިން ލޯންޗުކުރުމުގެ ޖަލްސާއަށް ކޮމަންޑޫއަށް ވަޑައިގެންފައެވެ. އަދި އެ ދާއިރާއަށް ގިނަ ވަޢުދުތަކެއް ވެވަޑައިގެންފައިވެއެވެ. އެންމެ މުހިންމު މަޝްރޫޢުއެއްގެ ގޮތުގައި އަންނަ ހުކުދުރު ދުވަހު ކޮމަންޑޫއާއި މަތި ކޮމަންޑޫ ގުޅާލުމުގެ ޢަމަލީ މަސައްކަތް ފައްށަވާނެކަން ސަރުކާރުން ހާމަކުރައްވާފައިވެއެވެ.
އެމްޑީޕީގެ ވަޒީރުންގެ ބައެއް ބޭފުޅުންނާއި ގައުމީ މަޖިލިސް މެންބަރުންގެ ޓީމެއް ރައްޔިތުން މަޖިލިސް ކޮމަންޑޫ ދާއިރާގެ ބައި-އިލެކްޝަން އެމްޑީޕީ ކެންޑިޑޭޓް @Rashid141221 ގެ ކެންޕެއިންއަށް ކޮމަންޑޫއަށް ވަޑައިގަތުން. #VoteRashid#Agenda19 pic.twitter.com/GATDfin61N
— MDP Secretariat (@MDPSecretariat) January 12, 2022
މީގެ އިތުރުން އަނެއްކާވެސް މިވަނީ ދައުލަތުގެ ގިނަ ވަޒީރުން އެރަށަށް ވަޑައިގެންފައެވެ. އެގޮތުން އަދ.ގެ ޢާންމު މަޖިލީހުގެ ރައީސް ޢަބްދުﷲ ޝާހިދާއި، ޑިފެންސް މިނިސްޓަރ މާރިޔާ އަޙްމަދު ދީދީއާއި މިނޫނަސް އެމްޑީޕީގެ ޤައުމީ މަޖިލީހުގެ މެންބަރުން ހިމެނޭ ވަފްދެއް ކޮމަންޑޫއަށް ވަޑައިގެން މިހާރު ވަނީ ކެމްޕެއިން އިތުރަށް ފުޅާކުރައްވާފައެވެ.
ކޮމަންޑޫ ދާއިރާގެ ބައި އިލެކްޝަނާއި ދިމާކޮށް ސަރުކާރުން ގިނަ ކަންތައްތަކެއް އެދާއިރާގައި ކުރިއަށް ދަނީ މަސައްކަތް ކުރަމުންނެވެ. ރައީސް ވިދާޅުވީ މިއީ ކެމްޕެއިނަށް ނުފޫޒު ފޯރުވުންކަމަށް ވާދަވެރި ފަރާތްތަކުން ވިދާޅުވަމުން ދިޔަނަމަވެސް އެކަން ހުއްޓާލެވޭކަތް ނެތްކަމަށާއި، އެކަންކަން ދާނީ ބާރު ސްޕީޑުގައި ކުރިއަށްކަމަށެވެ.
