މަސްވެރިން އުޅެމުންދާ ހާލާއި، މަސްވެރިންގެ ދަތިތަކަށް ހައްލު ހޯދުމަށް މިސަރުކާރުން އެއްވެސް މަސައްކަތެއް ނުކުރާކަމަށްބުނެ މަސްވެރިންތަކެއް ފިޝަރީޒް މިނިސްޓަރ ޑރ.ހުސެއިން ރަޝީދަށް ހޫނު ރައްދުތަކެއް ދެއްވައިފިއެވެ.

އަތޮޅު ތެރޭގެ ރަށެއްގައި މަސްވެރިންތިބި ދޯންޏެއްކައިރިއަށް ވަޒީރު ޑރ.ހުސެއިން ވަޑައިގެންނެވުމުން މަސްވެރިން ވަނީ ވަޒީރަށް ވަރަށް ބޮޑަށް ނުރުހުންވެ، ބަހުގެ ހަމަލާތަކެއް ބަދަލުކޮށްފައެވެ. މަސްވެރިން ބުނަމުން ދިޔައީ މިވީ ތިން އަހަރު މަސްވެރިންނަށް ދިމާވި ދަތިތަކާއި، އުޅެމުންދިޔަ ހާލަތު ނޭގޭ ވަޒީރަކު މަސްވެރިންގެ ވާހަކަ އަޑުއަހަންޖެހޭ ސަބަބެއް ނެތްކަމަށެވެ.

މަސްވެރިން ކުރާ މަސައްކަތާއި، މަސްވެރިން އުޅެމުންދާ ހާލަކީ މިއަދު ނުހަނު ދަތިހާލަތަކަށްވާއިރު، އެއްވެސް ހައްލެއް ހޯދައި ނުދެއްވައި އަޑު އިވެނީ ހުސްވާހަތަކެއް ދައްކަވަމުންދާތަން ކަމަށެވެ. މަސްވެރިންވަނީ ވަޒީރު މަސްވެރިންގެ ވާހަކަ އަޑުނާހައި ކޮޓަރި ކޮޅުގައި އިންނެވުމަށް ދަންނަވައި އެސަރަހައްދުން ވަޒީރު ދިއުމަށް ގޮވާލާފައެވެ. މިއާއިއެކު ވަޒީރު ހުސެއިން ވަނީ އެސަރަހައްދުން މަޑުމަޑުން ދުރައްޖެހިލާފައެވެ.

މިކަމާއި ގުޅިގެން ޕީއެންސީގެ ނައިބް ރައީސް އިބްރާހިމް ޝުޖާ ކުރެއްވި ޓުވީޓުގައި ވިދާޅުވީ މަސްވެރިންގެ އަޑުއަހަން ވަޒީރު މިއަދު ވަޑައިގެންނެވިއިރު، ބޭނި މަސްކޮޅަށް ހަމަ އަގު ނުދެވުނު އިރު، ބޭނި މަސްކޮޅަށް ލާރި ކޮޅު ނުދީ ކަރުދާސް ކޮޅެއްދިން ހަނދާން ވަޒީރު ހުރިތޯއެވެ. މަސް ކިރޭނެ ގޮތެއް ނެތި، އައިސް ކޮޅު ލިބޭނެ ގޮތެއް ނެތި މަސްވެރިން ކިޔުގައި 2-3 ބޭތިއްބި ހަނދާން ނުވާ ވަޒީރަކު މަސްވެރިންގެ ވާހަކަ އަޑުއެހުމަށް ދިއުމަކީވެސް ކަންބޮޑުވާކަމެއްކަމަށެވެ.

މަސްވެރިންގެ ހާލު ބަލަން ވަޒީރު @DrHussainHassan މަސްވެރިންގެ ގާތައް ވަޑައިގެންނެވި އިރު،މަސްވެރިން މި ޕެންޑަމިކުގައި އުޅުނު ހާލާއި މިހާރު އުޅެމުންދާ ހާލު އެގޭބާ؟ކޮންފަދަ އަނިޔާ އެއްތޯ މަސްވެެރިންނަށް މިސަރުކާރުން ދެއްވީ.@FishermensUnion 1/2 pic.twitter.com/nL60u36zZE

— Ibrahim Shujau (@IbrahimShujaau) January 11, 2022

ސަރުކާރުން މަސްވެރިންނަށް ދިމާވެފައިވާ ދަތިތަކަށް ހައްލު ހޯދައި ދެއްވާނެކަމަށް ވިދާޅުވެމުން ދިޔަ ނަމަވެސް އެކަށީގެންވާ ހައްލެއް ނުލިބި މަސްވެރިންނަށް ދަތިތައް ކުރިމަތިވާ އެކި ކަންކަން ކުރިމަތިވާތީ ގިނަ މަސްވެރިން ތިބީ ސަރުކާރާއިމެދު ވަރަށް ބޮޑަށް ހިތްހަމަ ނުޖެހިފައެވެ. ދާދިފަހުންވެސް މިސްކޯއިން ވަނީ މަސްވެރިން ބާނާ މަސް ކިރުމަށްވެސް ލިމިޓްކޮށްފައެވެ. އަދި އައިސް ލިމުގައާއި، ތެޔޮ ލިބުމަށްވެސް މަސްވެރިންނަށް ބޮޑެތި ދަތިތަކެއް އެބަހުއްޓެވެ.