ލީގު ކަޕްގެ ސެމީ ފައިނަލުގެ ފުރަތަމަ ލެގުން ޗެލްސީއަަށް މޮޅެއް

އިނގިރޭސި ލީގު ކަޕްގެ ސެމީ ފައިނަލުގެ ފުރަތަމަ ލެގުގައި ރޭ ޓޮޓެންހަމްގެ މައްޗަށް ޗެލްސީ ކުރިހޯދައިފިއެވެ.

ޗެލްސީގެ އަމިއްލަ ދަނޑުގައި ކުޅުނު މި މެޗު އެޓީމުން ކާމިޔާބުކުރީ 0–2 ގެ ނަތީޖާއަކުންނެވެ.

ޗެލްސީގެ ފަރާތުން މޮޅު ކުޅުމެއް ފެނިގެންދިޔަ މި މެޗު ފަށައިގެން މާ ގިނައިރުތަކެއް ނުވަނީސް އެޓީމުން ވަނީ ލަނޑު ޖަހާ ލީޑު ނަގާފައެވެ. މި ލަނޑު މެޗުގެ 5 ވަނަ މިނެޓުގައި ކާމިޔާބުކޮށްދިނީ، ކައި ހަވާޓްޒްއެވެ. މި މެޗުގައި ފެނިގެންދިޔަ ޗެލްސީގެ ދެވަނަ ލަނޑަކީ، ޓޮޓެންހަމުގެ ބެން ޑޭވިސް އަތުން ބައިކޮޅަށްވަން ލަނޑެކެވެ.

މި ނަތީޖާއާއެކު އިނގިރޭސި ލީގު ކަޕްގެ ސެމީ ފައިނަލުގެ ފުރަތަމަ ލެގު ކާމިޔާބުކޮށް ފައިނަލާއި ގާތަށް ޗެލްސީ ޖެހިލިއިރު، މި ދެ ޓީމު ވާދަކުރާ ސެމީގެ ދެވަނަލެގު ކުޅުމަށް ހަމަޖެހިފައިވަނީ މި މަހުގެ 13 ވަނަ ދުވަހު ޓޮޓެންހަމުގެ ދަނޑުގައެވެ.