ޑިސެމްބަރުން ފެށިގެން އިންޑިއާގައި ކޯވިޑްގެ ކޭސްތަށް އިތުރު ވަމުން އަންނަ އިރު މިކަމުގެ އަސަރު އެންމެ ބޮޑަށް ކޮށްފައިވަނީ ސިނަމާ ތަކަށެވެ.
ކޯވިޑްގެ ހާލަތު ރަގަޅުވުމުން ސިނަމާ ތަކަށް ގެނައުމަށް ގިނަ ފިލްމު ތަކެއް ކިއު ގައި އޮތް އިރު އަނެއްކާވެސް ކޯވިޑު ފެތުރޭ މިންވަރު އިތުރުވިމާއެކު ބޮޑެތި ފިލްމު ތަކެއް އެޅުވުން މިވަނީ ފަސްކުރަން ޖެހިފައެވެ.
އެގޮތުން ރީތީގެ ރާނީ މަނޫޝީ ޗިއްލަރު ބޮލީވުޑަށް ތައާރަފް ކުރާ ފިލްމް "ޕްރިތުވީރާޖް" ވެސް ރިލީޒް ކުރުން މި ވަނީ ފަސްކޮށްފައެވެ. މި ފިލްމުގައި މަނޫޝީ ފެނިގެން ދާނީ އަކްޝޭ ކުމާރާ އެކުގައެވެ. އަދި މުހިންމު ރޯލަކުން ސޯނޫ ސޫދުވެސް ފެނިގެން ދާނެއެވެ.
View this post on Instagram
ޔަޝްރާޖް ފިލްމް (ވައިއާރްއެފް)ގެ ކުޑައިގެ ދަށުން ނެރުމަށް ހަމަޖެހިފައިވާ މި ފިލްމަށް އެންމެ ފަހުން ކަނޑައަޅާފައި އޮތް ތާރީހަކީ މިމަހުގެ 21 ވަނަ ދުވަހެވެ. ނަމަވެސް މިހާރު ވަނީ ފިލްމު ރިލީޒްކުރުން ވަކި މުއްދަތެއް ނެތް ގޮތަށް ފަސް ކޮށްފައެވެ.
ޑރ. ޗަންދްރަޕްރަކާޝް ދިވިވޭދީ ލިޔެ ޑައިރެކްޓް ކޮށްފައިވާ މި ފިލްމު އެޅުވުމުގެ ހުރިހާ ތައްޔާރިތަކެއް ވަނީ ވެފައެވެ. އެގޮތުން ޓްރޭލާ އާއި ޓީޒާ އާންމުކޮށް އެންމެ ފަހުގެ ހުރިހާ މަސައްކަތެއް ނިމިފައި ވީކަމުގައިވިޔަސް (ވައިއާރްއެފް) އިން ރިސްކެއް ނަގަން ބޭނުން ނުވާތީ ފިލްމް ވަނީ ފަސްކޮށްފައެވެ.
އުންމީދީ ބޮޑު ފިލްމެއް ކަމުގައިވާ "އާރްއާރްއާރް" ވެސް މިހާރު ވަނީ ވަކި މުއްދަތެއް ނެތް ގޮތަށް ފަސްކޮށްފައެވެ. ޑައިރެކްޓަރު ރާޖާމޯލީގެ މި ފިލްމު އެންމެ ފަހުން ތާވަލް ކޮށްފައި އޮތީ މިމަހުގެ 7 ވަނަ ދުވަހަށެވެ. އަދި ހަމަ އެހެންމެ ޝާހިދު ކަޕޫރުގެ "ޖާޒީ" ވެސް ވަނީ ހަމަ މިފަދައިން ފަސްކޮށްފައެވެ.
ކޯވިޑްގެ ސަބަބުން ވާނުވާނޭނގޭ ލިސްޓުގައި ބޮލީވުޑްގެ އޭ ލިސްޓްގެ ތަރިންގެ ފިލްމުތައް އެބަހުއްޓެވެ. ނިމިދިއަ 2021 ގައި ވެސް ކޯވިޑްގެ ސަބަބުން ރިލީޒް ނުކުރެވި ދިގުދެމިގެން ދާ ފިލްމުތައް އަންނަނީ ދުވަހެއް ދުވަހަކަށް ގިނަ ވަމުންނެވެ. އެގޮތުން ބައެއް ފިލްމުތައް ވަނީ އޮންލައިން ޕްލެޓްފޯމް ތަކުގައި ވެސް ރިލީޒް ކޮށްފައެވެ.
