މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ނުލިބި އުޅެނިކޮށް، ކުއްލި ގޮތަށް ހުޅުމާލެއިން ބިން ވިއްކުމަށް ސަރުކާރުން ނިންމި ނިންމުމާއި ދެކޮޅަށް އެމްޑީޕީގެ ރައީސް މުހައްމަދު ނަޝީދު ނިކުންވައިފިއެވެ.
މިދިޔަ ހަފްތާގައި މާލޭގެ ރައްޔިތުންނާއި ބައްދަލު ކުރައްވައި ނަޝީދު ވަނީ މާލޭގައި ދިރިއުޅޭ ރައްޔިތުންގެ ތެރެއިން ދަތި ހާލުގައިތިބި މީހުންނަށް ގޯތި ކަނޑާފައި ދޭންޖެހޭކަމަށެވެ. އެދި އެސިޔާސަތަށް ސަރުކާރުން އަމަލު ކުރުމަކީ މުހިންމު ކަމެއްކަމަށް ނަޝީދު ވަނީ ވިދާޅުވެފައެވެ.
ނަޝީދު މިގޮތަށް ވާހަކަ ދައްކަވާފައި ވަނިކޮށް އެޗްޑީސީން ވަނީ 1603.07 އަކަފޫޓުގައި 2633.93 އަކަ ފޫޓާ ދެމެދުގެ 60 ބިން ވިއްކުމަށް ބީލަމަށް ހުށަހެޅުމުގެ ފުރުސަތު ހުޅުވާލާފައެވެ. ބިންތައް ވިއްކަން ނިންމާފައިވަނީ ހުޅުމާލޭގެ އަތިރިމަތީ "ބީޗް ފްރޮންޓު" ސަރަހައްދުންނާއި އަދި އަތިރިމަތި ކައިރިން "ބީޗު ސައިޑު" ނެވެ. މީގެ ތެރެއިން "ބީޗް ފްރޮންޓު" ސަރަހައްދަށް ބީލަށް ފޯމް އަންނަ ފެބްރުއަރީ ހައެއްގެ ކުރިން ހުށަހަޅަން ޖެހޭއިރު "ބީޗު ސައިޑު" އަށް ބީލަން ފޯމް ހުށަހެޅުމުގެ ފުރުސަތު ފެބްރުއަރީ 16އާ ހަމައަށް ވަނީ ހުޅުވާލައިފަ އެވެ.
މިކަމާއި ވަރަށް ބޮޑަށް ދެކޮޅު ހައްދަވައި މިވަގުތު އިނގިރޭސި ވިލާތުގައި ނުރަސްމީ ދަތުރުފުޅެއްގައި ހުންނެވި ރައީސް ނަޝީދު ވިދާޅުވީ މާލޭ ސަރަހައްދުގައި ދިރިއުޅޭ ރައްޔިތުންނަށް ގޯތި ނުލިބި އެހެން ބަޔަކަށް ގޯތި ލިބޭނެހެން ސިޔާސަތު ކަނޑައެޅުމަކީ ބަލައި ގަނެވޭނެ ކަމެއްނޫންކަމަށެވެ.
މާލެ ސަރަހައްދުގައި ދިރިއުޅޭ އާމްދަނީ މަދު މީހުންނަށް ބިން ލިބޭނެ ގޮތެއް ނެތި ހުޅުމާލެ އިން ބިން ވިއްކުމަކީ ބަލައިގަނެވޭނެ ކަމެއްނޫން. މި ސިޔާސަތު ބަދަލު ކުރުމަށް ސަރުކާރަށް ގޮވާލަން.
– ނަޝީދު ވިދާޅުވިއެވެ.
މިސަރުކާރުން ވެރިކަމަށް އައުމަށް ވެފައިވާ ވައުދުތަކުގެ ތެރެއިން މާލޭގެ ރައްޔިތުންނަށް ބޯހިޔާވަހިކަން ފޯރުކޮށް ދިނުމަކީ މިހާތަނަށް ނުފުއްދިފައިވާ ވައުދެކެވެ. މާލޭގެ ރައްޔިތުންނަށް ގޯތި ދޭނެކަމަށް ސަރުކާރުން ބުނަމުން ދިޔަނަމަވެސް މިހާތަނަށް އެކަމުގެ އަލިމަގެއް ނުފެނެއެވެ.
