ޑްރާމާ ސިލްސިލާ ތަކުން މަގުބޫލުކަން ހޯދާފައިވާ ތަރި ޝްރައްދާ އާރިޔާ ހަނީމޫނަށް ރާއްޖެ އަތުވެއްޖެއެވެ.
އާމީ އޮފިސަރެއް ކަމަށްވާ ރާހުލް ނަގަލްއާ މިދިއަ ނޮވެމްބަރު މަހު 16 ވަނަ ދުވަހު ކައިވެނި ކުރި ޝްރައްދާ މީގެ ކުރިން ވެސް ވަނީ ރާއްޖެގައި ޗުއްޓީ ހޭދަކޮށްފައެވެ.
އެމީހުން ކައިވެނި ކޮށްފައިވަނީ ނިއު ދިއްލީގައި އާއިލާ އާއި ގާތް ރަހުމަތްތެރިންނާއެކު ޕްރައިވެޓް ހަފްލާއެއްގައި، ހިންދޫ އާދަކާދަ ތަކާއި އެއްގޮތްވާގޮތުގެ މަތިންނެވެ.
ޝްރައްދާ ހަނީމޫން ހޭދަކުރަމުން އަންނަނީ ހައިޑަވޭ ބީޗް ރިސޯޓް އެންޑް ސްޕާގައެވެ. އޭނާ ވަނީ އިންސްޓަގްރާމްގައި ޗުއްޓީގެ ބައެއް ފޮޓޯތަށް ހިއްސާކޮށްފައެވެ.
View this post on Instagram
ބެލުންތެރިންގެ މެދުގައި ޝްރައްދާ މަގުބޫލުވެގެން ދިޔައީ ޑްރާމާ ސިލްސިލާ "ތުމާރާ ޕާކީ" އިންނެވެ. އޭނާ ވަނީ ބައެއް ފިލްމު ތަކުން ވެސް ފެނިގެން ގޮސްފައެވެ. އޭނާ މުނިފޫހިފިލުވުމުގެ ދާއިރާއަށް ނުކުތީވެސް ފިލްމަކުންނެވެ.
ޑްރާމާ ސިލްސިލާގެ އިތުރުން ފިލްމު ތަކާއި ރިއަލިޓީ ޝޯތަކުން ވެސް ފެނިފައިވާ ޝްރައްދާ ވަނީ ބައެއް ޝޯތައް ހޯސްޓްވެސް ކޮށްދީފައެވެ.
ފިލްމުތަކުން މާބޮޑު ތަރުހީބެއް ނުލިބުނު ކަމުގައިވިޔަސް އޭނާގެ ޑްރާމާތައް ބެލުންތެރިންގެ މެދުގައި ވަރަށް ބޮޑަށް މަގުބޫލު ވެގެން ދިއައެވެ. އަދި މިހާރު ސްޓާ ޕްލަސް އިން ދައްކަމުން އަންނަ "ކުންޑަލީ ބާގިޔާ"ގެ ލީޑަކީވެސް އޭނާއެވެ.
