ކުރީގެ ރައީސް މުހައްމަދު ނަޝީދުގެ ވެރިކަމުގައި ވެލާނާ އިންޓަރނޭޝަނަލް އެއާޕޯޓް އިންޑިއާގެ ޖީއެމްއާރު ކުންފުންޏަށް ދޭން ނިންމި ނިންމުމަކީ ދިވެހިންގެ މިނިވަންކަމަށް އެކަމުން ބޮޑު އަސަރެއް ކުރާފަދަ އެގްރީމަންޓެއް ކަމުގައި ދީނީ އިލްމުވެރިއާ އަދި އަދާލަތު ޕާޓީގެ އިލްމުވެރިންގެ މަޖިލީހުގެ މެމްބަރު ޑރ.މުހައްމަދު އިޔާޒު ވިދާޅުވެއްޖެއެވެ.

ޑރ.އިޔާޒު މިފަދައިން ވިދާޅުވީ އަދާލަތު ޕާޓީން މީގެކުރިން ޤަބޫލުކުރަމުންދިޔަ އަސާސްތައް ދޫކޮށް، ޖާހާއި، މަޤާމަށްޓަކައި، އުސޫލުތައް ދޫކޮށް ނުލުމަށް ގޮވާލައި ކުރެއްވި ޓުވީޓާއި ގުޅިގެންނެވެ. ޑރ.ޝަހީމް ވިދާޅުވެފައިވަނީ ރާއްޖޭގައިތިވި އިންޑިއާގެ އަސްކަރީ ސިފައިން ބޭލުމަށް ރާއްޖޭގެ ގިނަ އަދަދަދެއްގެ ރައްޔިތުން ހިމެނޭހެން، އިދިކޮޅު ކޯލިޝަނުން ފަށަފައިވާ މަސައްކަތް ހުއްޓުވުމަށް ސަރުކާރުން ކުރަމުންދާ މަސައްކަތަށް ފާޑު ވިދާޅުވަމުންނެވެ. އަދި މިމަސައްކަތުގައި އެންމެ އިސްދައުރެއް އަދާލަތު ޕާޓީގެ އިސްބޭފުޅުން ކުރަމުންދާތީ ޑރ.ޝަހީމްގެ ފާޑުކިޔުންވަނީ އެބޭފުޅުންނަށް އަމާޒުވެފައެވެ.

ޑރ.ޝަހީމް ވިދާޅުވީ އަދާލަތު ޕާޓީން މީގެކުރިން ޤަބޫލުކުރަމުންދިޔަ ސިޔާސަތުތަކާއި، އުސޫލުތައް ކުއްލިއަކަށް ދޫކޮށް، ޖާހާ، މަޤާމާއި، ލައްޒަތަށްޓަކައި މަސައްކަތް ކުރާތަން ފެންނަ ކަމަށެވެ. މީގެ ކުރިން ރާއްޖޭގައި އިންޑިއާގެ ޖީއެމްއާރު އެއާޕޯޓްގެ މަސައްކަތް ފެށިހިސާބުން އަދާލަތު ޕާޓީގެ ވެރިން ކުރެއްވި މަސައްކަތާއި، ޖީއެމްއާރު ބޭރުކުރުމަށް ކުރެއްވި މަސައްކަތަކީ ކޮން ނިޔަތެއްގައި ކުރެއްވި މަސައްކަތެއްތޯ މިއަދު ސުވާލު އުފެދޭކަމަށް ޑރ.ޝަހީމް ވިދާޅުވިއެވެ.

ޝަހީމްގެ ވާހަކަތަކާއި ގުޅިގެން ޑރ.އިޔާޒު ވިދާޅުވީ އިންޑިއާގެ ޖީއެމްއާރާއިއެކު އޭރުގެ ސަރުކާރުން ހެދި އެއްބަސްވުމާއި ދެކޮޅަށް ނިކުތީ އޭގައި ޤައުމުގެ މިނިވަންކަމާއި ސިޔާދަތަށް ނުރައްކާވާފަދަ ކަންތައްތަކެއް ހުރުމުންކަމަށެވެ. އަދި އެކަމުގެ ސަބަބުން އެއާޕޯޓްގެ ތަރައްޤީއަށްވެސް ބޮޑެތި ހުރައްތަކެއް ކުރިމަތިވުމުންކަމަށެވެ.

ޖީއެމްއާރު އެއްބަސްވުމުގައި، ޤައުމުގެ މިނިވަންކަމާއި، އިޤްތިޞާދީ ގޮތުން އެތައް ގެއްލުންތަކެއް ހިމެނި، އެއާޕޯޓްގެ 2 ވަނަ ރަންވޭ އަކަށް ހުރަސް އެޅޭ ކަންތައްތަކެއް ހުރި. ޑރ.އިޔާޒު ވިދާޅުވިއެވެ.

އަދާލަތު ޕާޓީއާއި އެޕާޓީގެ އިސްބޭފުޅުންކީ ކުރީގެ ރައީސް މުހައްމަދު ނަޝީދުގެ އެމްޑީޕީގެ ވެރިކަމުގައި ވެލާނާ އިންޓަރޭޝަނަލް އެއާޕޯޓްގެ ހިންގުން ޖީއެމްއާރަށް ދިނުމުން އެކަމާއި ދެކޮޅަށް އެންމެ ފުރަތަމަ ތެދުވި އެއް ޕާޓީއެވެ. އަދާލަތު ޕާޓީގެ ރައީސް ޝައިޚު އިމްރާނާއި، އެޕާޓީގެ އިސްބޭފުޅުން ވަނީ އޭރުގެ މުޒާހަރާތަކުގައި އެތައް ގަނޑިއިރެއް ވަންދެން އަޑުގަދަކޮށް، ޖީއެމްއާރު ބޭލުމަށް ގޮވާލާފައެވެ.

ޖީއެމްއާރު ބޭލުމަށް އެވަރަށް މަސައްކަތް ކުރި ޕާޓީއަކުން މިއަދު ރާއްޖޭގައި އެތައްބައިވަރު އިންޑިއާގެ ސިފައިން ތިބެގެން އެކަމާއި ކަންބޮޑުނުވާތީ އެދުވަހު އެދަލާތު ޕާޓީން ކުރި މަަސައްކަތާއިމެދު ގިނަ ބަޔަކު ދަނީ ސުވާލު އުފައްދަމުންނެވެ.