ކޯވިޑް19ގައި ރަޝިއާގައި މަރުވި މީހުންގެ އަދަދު 600،000 އަށް އަރާފައިވާ ކަމަށް ރޮއިޓާސްގެ ރަސްމީ ހިސާބުތަކުން ދައްކައިފިއެވެ.
ކޯވިޑް19ގައި ރަޝިއާގައި މަރުވި މީހުންގެ އަދަދު 600،000 އަށް އަރާފައި މިވަނީ ޑެލްޓާ ވޭރިއެންޓަށް ޕޮޒިޓިވްވާ މީހުންގެ އަދަދު އާދަޔާ ޚިލާފަށް ރަޝިއާގައި މަތިވާން ފަށާފައި ވަނިކޮށެވެ.
ރަޝިއާ މިހާރު ހިމެނިގެންދަނީ ދުނިޔޭގެ މިބަލީގައި ތިން ވަނައަށް އެންމެ ގިނައިން މީހުން މަރުވެފައިވާ ގައުމު ކަމުގައެވެ. ރަޝިއާގައި ކޯވިޑް19އަށް ޕޮޒިޓިވްވެގެން 600,434 މީހުން މަރުވެފައިވާއިރު، ދުނިޔޭގައި މިބަލީގައި އެންމެ ގިނަ އަދަދެއްގެ މީހުން މަރުވެފައިވަނީ އެމެރިކާގައެވެ. އެގައުމުގައި 813,000 މީހުން މަރުވެފައިވާއިރު، ދެވަނައަށް އެންމެ ގިނަ އަދަދެއްގެ މީހުން މަރުވެފައިވަނީ ބްރެޒިލްގައެވެ. އެގައުމުގައި 618,000 މީހުންވަނީ މަރުވެފައެވެ.
ޑޭޓާތަކުން ދައްކާ ގޮތުގައި، ދުނިޔޭގެ އެހެން ގައުމުތަކުގައި ބާރު މިނުގައި ފެތުރެމުންދާ އޮމިކްރޮން ވޭރިއެންޓްގެ އަސަރު ރަޝިއާގައި ކޮށްފައިވަނީ ވަރަށް ކުޑަކޮށެވެ. މިގޮތުން ރަޝިއާގެ އޮފިޝަލުން ބުނެފައިވާ ގޮތުގައި، މިހަފްތާގައި ރަޝިއާއިން ފެނިފައިވަނީ އޮމިކްރޮމްގެ އެންމެ 41 ކޭސްއެވެ.
ރަޝިއާގެ ކޮރޯނާ ވައިރަސް ޓާސްކް ފޯސްއިންވަނީ ފާއިތުވި 24 ގަޑިއިރުގެ ތެރޭގައި އެގައުމުގައި 1,002 މީހުން މަރުވެ 25,667 މީހުން ޕޮޒިޓިވް ވެފައިވާ ކަމަށް ބުނެފައެވެ.
