ގިނަ ދުވަސްތަކެއް ވަންދެން ޤައުމަށް ގިނަގުނަ ޚިދުމަތްކުރައްވާފައިވާ ނިޝާން ޢިއްޒުއްދީންގެ ޢިއްޒަތުގެ ވެރިޔާ އުމަރު ޒާހިރަކީ ޒަމާނީ ދިވެހި ރާއްޖެ ބިނާކުުމުގެ އެންމެ އިސްދައުރެއް އަދާކުރެއްވި ހިއްސާދާރެއް ކަމުގައި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އުމަރު ޒާހިރު އަވަހާރަވީ ކޯވިޑް-19ގެ އާލާސްކަންފުޅަށް ދަރުމަވަންތަ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް މިއަދު މެންދުރު 2 ޖަހާ އެހާކަށްހާއިރު ކަމަށް އެޗްޕީއޭއިން ހާމަކުރައްވައެވެ.
ޢުމަރު ޒާހިރު ކޯވިޑަށް ޕޮޒިޓިވްވެފައިވާކަން އެނގުނީ މީގެ ދެހަފްތާއެއްހާ ދުވަސް ކުރިން ކޯވިޑަށް ޓެސްޓްކުރެއްވުމުންނެވެ. ޢުމަރު ޒާހިރުގެ ޢާއިލާއިން މީގެ ކުރިން މަޢުލޫމާތު ދެއްވިގޮތުގައި އެމަނިކުފާނުގެ އަމިއްލަފުޅު ޚަރަދުގައި ފުވައްމުލަކުގައި ބިނާކުރެއްވި މިސްކިތް ހުޅުވުމަށް އެރަށަށް ކުރެއްވި ދަތުރުފުޅަށްފަހު އެނބުރި މާލެވަޑައިގެންވި ފަހުން އުޅުއްވީ އާލާސްކަންފުޅާއެވެ. ގަދަ ހުމުގެ އާލާސްކަންފުޅެއް ޖެހި، ހިންގަވައި އުޅުއްވުމަށްވެސް އެމަނިކުފާނަށް އުނދަގޫފުޅުކަމަށް ޢާއިލާއިން ކުރިން މަޢުލޫމާތު ދެއްވާފައިވެއެވެ. އަދި އެމަނިކުފާނުގެ ހާލުކޮޅު އިތުރަށް ގޯސްވެ، ދަރުމަވަންތަ ހޮސްޕިޓަލުގައި ފަރުވާ ދޭން ފަށާފައިވަނީ މިމަހުގެ 14ވަނަ ދުވަހުއެވެ.
އުމަރު ޒާހިރު އަވަހާރަވުމުގެ ހިތާމާގައި ބައިވެރިވެ، އާއިލާއަށް ކެތްތެރިކަން ދެއްވުމަށް އެދި ރައީސް ނަޝީދު ވަނި ދުޢާކުރައްވާފައެވެ. އަދި މަރުހޫމްގެ ފުރާނަފުޅަށް ސުވަރުގެ ދެއްވުމަށް ވަނީ ދުޢާ ކުރައްވާފައެވެ. ރައީސް ނަޝީދު ވިދާޅުވީ މަރުހޫމް އުމަރު ޒާހިރަކީ ދިވެހި ރާއްޖެ ބިނާކުރުމުގައި އެންމެ އިސްދައުރެއް އަދާކުރެއްވި އެއް ހިއްސާދާރު ކަމަށެވެ. އެމަނިކުފާނަކީ އެކި ދާއިރާތަކުން ޤައުމަށް ޚިދުމަތް ޚިދުމަތް ކުރެއްވުމުގައި ނަމޫނާ ބޭފުޅެއް ކަމުގައި ރައީސް ނަޝީދު ވިދާޅުވިއެވެ.
އޮނަރަބަލް އުމަރު ޒާހިރަކީ ޒަމާނީ ދިވެހި ރާއްޖެ ބިނާކުރުމުގެ އެންމެ އިސް ދައުރެއް އަދާކުރެއްވި ހިއްސާދާރެއް. އިޤްތިޞާދީ އަދި ސިޔާސީ ކަންކަމުގައިވެސް އެމަނިކުފާނުގެ ބައިވެރިވުން އެހާމެބޮޑު. މާތް ﷲ މަރުހޫމަށް ސުވަރުގެ މިންވަރު ކުރައްވައި، އާއިލާއަށް ކެތްތެރިކަން ދެއްވާށި، އާމީން.
– ރައީސް ނަޝީދު ކުރެއްވި ޓުވީޓުގައި ވިދާޅުވިއެވެ.
އުމަރު ޒާހިރު އަވަހާރަ ވުމާއި ގުޅިގެން ދައުލަތުގެ ވެރިންނާއި، އާންމު ރައްޔިތުން ދަނީ އެމަނިކުފާނަށް ހެޔޮދުއާކޮށް މެސެޖްތައް ހިއްސާ ކުރަމުންނެވެ. ނައިބް ރައީސް ފައިސަލް ނަސީމްވެސް ވަނީ އުމަރު ޒާހިރު އަވަހާރަވުމުގެ ހިތާމާގައި ބައިވެރިވެ އާއިލާއަށް ކެތްތެރިކަން ދެއްވުމަށް އެދި ދުޢާކުރައްވާފައެވެ.
ދިވެހި ޤައުމަށް އަގު ނުކުރެވޭ ފަދަ ގިނަގުނަ ޚިދުމަތްތަކެއް ކޮށްދެއްވި، އޮނަރަބަލް ޢުމަރު ޒާހިރު (ނ.ޢ.ޢ.ވ)ގެ ފުރާނަފުޅަށް، ސުވަރުގޭގެ ދާއިމީ ނިޢުމަތް މިންވަރު ކުރެއްވުން އެދި މާތްالله ގެ ޙަޟްރަތަށް ދުޢާ ދަންނަވަން. آمين.
– ނައިބް ރައީސް ފައިސަލް ނަސީމް ކުރެއްވި ޓުވީޓުގައި ވިދާޅުވިއެވެ.
ޢުމަރު ޒާހިރަކީ ޤައުމީ ބޮޑެތި މަސައްކަތްތައް ޢަމަލީގޮތުން ހިންގެވުމާއި އެމަސައްކަތްތައް ހިނގާނުހިނގާގޮތް ބެއްލެވުމާއި، އިޖުތިމާޢީ އަދި ޤައުމީ އެންމެހައި ކަންކަމުގައި ޙަރަކާތްތެރިވެވަޑައިގަތުމުގެ ލާމަސީލު ނަމޫނާ ޝަޚްޞިއްޔަތެކެވެ. އެމަނިކުފާނު ދުނިޔޭގެ އަލިކަން ދެކެވަޑައިގަތީ 26 އޮކްޓޫބަރު 1936ގައެވެ.
އެމަނިކުފާނު ވަނީ ދިވެހި ދަޢުލަތަށް 50 އަހަށްވުރެ ގިނަ އަހަރު ޚިދުމަތް ކުރައްވާފައެވެ. އެގޮތުން 1953 އިން ފެށިގެން 2008ވަނަ އަހަރާހަމައަށް ސަރުކާރުގެ އެކި ފަންތީގެ 26 މަޤާމެއް ފުރުއްވާފައިވެއެވެ. ޢުމަރު ޒާހިރަށް، ނިޝާން ޢިއްޒުއްދީންގެ ޢިއްޒަތްތެރި ވެރިކަމުގެ ލަޤަބު ލިބިވަޑައިގެންނެވީ 2008ވަނަ އަހަރުގެ ނޮވެމްބަރުމަހުގެ 10ވަނަ ދުވަހުއެވެ.
