ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު ހުސެއިން ވަހީދު އަވަހާރަވުމާއި ގުޅިގެން މަޖިލީހުގައި ހަމަހިމޭން ކަމުގެ ސްކޫތެއް ގެނެސްފިއެވެ.
މިއަދު ދައުރުން ބޭރުން މަޖިލީހުގައި ބޭއްވި ޖަލްސާގައި މަރުހޫމް ހުސެއިން ވަހީދު މަޖިލީހުގައި ކުރައްވަމުންދިޔަ މަސައްކަތްތަކާއި، އެމަނިކުފާނު އަދާކުރެއްވި ދައުރު މަޖިލިސް ރައީސް ވާނީ ފާހަގަ ކުރައްވާފައެވެ. އަދި މަރުހޫމް ހުސެއިން ވަހީދަކީ ޚިދުމަތްތެރި ނަމޫނާ މެމްބަރެއްކަން ފާހަކޮށް، މަރުހޫމްގެ ފުރާނަފުޅަށް ސުވަރުގޭގެ މަތިވެރި ނިއުމަތް މިންވަރު ކޮށްދެއްވުމަށް ވަނީ ދުޢާކުރައްވާފައެވެ. މިއަދުގެ ޖަލްސާގައި ސުކޫތައް އެހިއިރު، ޖަލްސާގައި 51 މެމްބަރުން ބައިވެރިވެފައެވެ.
ހުސެއިން ވަހީދު އަވަހާރަވީ ކެންސަރުގެ އާލާސްކަންފުޅުގައި އުޅުއްވާތާ ވަނީ ގިނަ ދުވަސްތަކެއް ވެފައެވެ. ހުސައިން ވަހީދުގެ ކަށުނަމާދު ކުރުމާއި ފަސްދާނުލުން އޮތީ އަންގާރަދުވަހުގެ މެންދުރު ނަމާދަށްފަހުއެވެ. ކަށު ނަމާދުގައާއި ފަސްދާނުލުމުގެ ރަސްމިއްޔާތުގައި ރައީސުލްޖުމްހޫރިއްޔާއާއި މަޖިލީހުގެ ރައީސް މުހައްމަދު ނަޝީދުވެސް ބައިވެރިވެވަޑައިގެންނެވިއެވެ.
ބައްޔަށް ފަރުވާ ހޯއްދެވުމަށް ރާއްޖެއިން ބޭރުގައި އަހަރެއްހާ ދުވަހު ހުންނެވުމަށްފަހު އަލުން މަޖިލީހުގެ ޖަލްސާތަކުގައި ހުސެއިން ބައިވެރިވެޑައިގެންނެވީ މިއަހަރުގެ މާރިޗު މަހުގެ 29 ގައެވެ. އެދުވަހުގެ ޖަލްސާގައި ވާހަކަފުޅު ދައްކަވަމުން ހުސެއިން ވަނީ އާލަސްކަންފުޅާއި އުޅުއްވިއިރު ގިނަ ބައެއްގެ ހެޔޮ ދުޢާއާއި މެސެޖު ލިބުނުކަން ފާހަގަކުރައްވާ އެކަމަށް ޝުކުރު އަދާކުރައްވާފައެވެ. އަދި އަނެއްކާވެސް އެނބުރި އައިސް ރައްޔިތުންނާއި މުޚާތަބްކޮށް ވާހަކަދެއްކޭތީ އެކަމަށް ﷲއަށް ޝުކުރު ކުރާކަމަށް ހުސެއިން ވިދާޅުވިއެވެ.
އަޅުގަނޑު އެންމެ ފުރަތަމަވެސް ވަރަށް ގިނަ ދުވަސް ރާއްޖެއިން ބޭރުން ބޭސްފަރުވާއެއް ކުރުމަށްފަހު މިއަދު އަނެއްކާވެސް މިހިސާބަށް އައިސް ތިޔަ އެންމެބޭފުޅުންނާއި ބައްދަލުވެ އެއްޗެއް ބުނެލަން ލިބުމުން މާތްﷲ ސުބުހާނަހޫ ވަތަޢާލާގެ ހަޒުރަތަށް ޝުކުރު ކުރަން. އަދި ހަމައެއާއިއެކު އަޅުގަނޑު ބޭރުގައި ހޭދަކުރި ދުވަސްތަކުގައި އަޅުގަނޑުގެ ވަރަށް ގާތް ރައްޓެހިންނާއި، ދާއިރާގެ އެކިއެކި ރައްޔިތުންނާއި، ހެޔޮއެދޭ އެތައް މެމްބަރުންނެއް އަޅުގަނޑަށް ގުޅައި ހާލުބަލަމުން ދިޔަ ކަމަށްޓަކައި އުފާކޮށް އެންމެ ބޭފުޅުންނަށް ޝުކުރު ދަންނަވަން. އަދި އަޅުގަނޑަށް ހެޔޮ ދުޢާ ކޮށްދެއްވި އަދި ހެޔޮ ދުޢާކޮށްދެއްވަމުންދާ ހުރިހާ އަހުންނާއި އުހުތުންނަށް ހިތުގެ އެންމެ އަޑިން ޝުކުރު ދަންނަވަން.
– މާރިޗު 29 ގެ ޖަލްސާގައި ހުސެއިން ވަހީދު ވިދާޅުވިއެވެ. މިނޫން އެއްވެސް ވާހަކައެއް އެދުވަހު ހުސެއިން ވިދާޅެއްނުވެއެވެ.
17 ވަނަ ރައްޔިތުންގެ މަޖިލީހުގައިވެސް ކޮމަންޑޫ ދާއިރާ ތަމްސީލުކުރެއްވި މެމްބަރަކީ ހުސެއިން ވަހީދެވެ. އޭގެ ފަހުން އެއް ދައުރުގެ މެދު ކެނޑުމަކަށްފަހު އަނެއްކާވެސް ކޮމަންޑޫ ދާއިރާގެ ގޮނޑި ހުސެއިން ކާމިޔާބުކުރެއްވިއެވެ. ހުސެއިން ވަހީދުގެ އަނބިކަނބަލުންގެ އިތުރުން ފިރިހެން ބޭފުޅަކާއި އަންހެން ދެ ބޭފުޅުން ދުނިޔޭގައި އެބަ ތިއްބެވިއެވެ.
މަރްހޫމް ހުސައިން ވަހީދުގެ ހަނދާނުގައި އިއްޔެ ވަނީ މަޖިލީހުގެ އިދާރާގައި ތަޢުޒިޔާގެ ދަފްތަރެއްވެސް ހުޅުވާފައެވެ.
