ރާއްޖޭގެ ޖަލުތަކުގައި ޝަރީއަތެއްނެތި ތިބި މީހުންގެ މައްސަލަތައް އަވަސް ކުރުމަކީ ވަރަށް މުހިންމު ކަމެއްކަމަށާއި، ޖަލުތަކުގެ ހާލަތު ރަނގަޅު ކުރަން ގިނަ މަސައްކަތްތަކެއް ކުރަންޖެހޭ ކަމުގައި އދ. ގެ ވޯކިން ގްރޫޕް އޮން އާބިޓްރަރީ ޑިޓެންޝަނުން ބުނެފިއެވެ.

ރާއްޖޭގެ ޖަލުތަކާއި މީހުން ބަންދުކޮށްފައި ތިބި ތަންތަނުގެ ހާލަތު ބެލުމަށް 10 ދުވަހުގެ ތަހުގީގެއް ކުރުމަށްފަހު ނޫސްވެރިންނާއި ވާހަކަ ދައްކަވަމުން އެކޮމެޓީގެ ޗެއަރ ޑރ. އެލީނާ ސްޓެއިނާޓް ވިދާޅުވީ ޖަލުތަކުގެ ކަންކަން ރަނގަޅު ކުރުމަށް ގިނަ މަސައްކަތްތަކެއް ކުރަންޖެހޭކަމަށެވެ. ޖަލުތަކުގައި ޝަރީއަތެއް ނެތި 4 އަހަރު ވަންދެންވެސް ބައެއް މީހުން ތިބިކަމަށާއި މިމީހުންގެ ހައްގުތައް ކަށަވަރު ކުރުމަށް، ޝަރީއަތް އަވަސް ކުރުމަކީ މުހިންމު ކަމެއްކަމުގައެވެ.

ހަމަ މިއާއިއެކު ޖަލުތަކުގައި ތިބި ޤައިދީންނަށް ފޯރުކޮށްދޭންޖެހޭ ހައްގުތަކުގެ ތެރޭގައި ހިމެނޭ ވަކީލުންގެ ހައްގާއި، ބޭސް ފަރުވާގެ ހިދުމަތް ދިނުމުގައި މައްސަލަތައް ހުރިކަން އޭނާ ފާހަގަކުރެއްވިއެވެ. މީގެ އިތުރުން ޖަލުތައް ފުރިބާރުވެ އެކަށީގެންނުވާ ވަރަށް ޖަލުގޮޅިތަކުގައި މީހުންތިބި ކަންވެސް ވަނީ ފާހަގަ ކުރައްވާފައެވެ. މިޕްރެސް ކޮންފަރެންސްގައި އެލީނާ ވަނީ ރާއްޖޭގެ ޖަލުތަކުގެ ހާލަތު ރަނގަޅު ކުރުމަށް ކަރެކްޝަނުންވެސް ގިނަ މަސައްކަތްތަކެއް ކުރާކަން ފާހަގަ ކުރައްވާފައެވެ. އަދި ތަންފީޒީ އިދާރާތަކުގެ ތެރެއިން ފުލުހުން ޤާނޫނަށް ގެނެވުނު އިސްލާހުތަކާއިއެކު ކުރިއަށް އޮތްތަނުގައި ރަނގަޅު ނަތީޖާތަކެއް ނިކުންނާނެކަމަށް އުންމީދު ކުރައްވާކަމަށެވެ.

ޖަލުތަކުގައި ތިބޭ ގައިދީންނަކީވެސް އދ އާއި އެނޫންވެސް ބައިނަލް އަގުވާމީ މުއާހަދާތަކުގައި ވާގޮތަށް ހައްގުތައް ކަށަވަރުވެގެންވާ ބަޔަކަށްވާއިރު އެމީހުންގެ ހައްގުތައް ނުގެއްލޭގޮތަށް ޖަލުތަކުގެ ހާލަތު ބަދަަލުކުރަންޖެހޭކަމަށް އެލީނާ ވިދާޅުވިއެވެ. ޖަލުތަކާއި ކ.ގުރައިދޫ މަރުކަޒާއި ރީހެބިލިޓޭޝަން ސެންޓަރުތައް ހިމަނައިގެން 14 ފެސިލިޓީއެއް ބަލައި 85 މީހަކާ މި ވަފްދުން ވަނީ ބައްދަލުކޮށް ރިޕޯޓެއް އެކުލަވާލާފައެވެ.

ޚާއްސަކޮށް ބިދޭސީންނަށް ގާނޫނީ އެހީތެރިކަން ފޯރުކޮށްދިނުމުގައި އިހުމާލު އޮތްކަމަށް އެ ގްރޫޕުންވަނީ ފާހަގަކޮށްފައެވެ. ބިދޭސީން ގެންގުޅެނީ ވަރަށް އަސާސީ ހައްގުތަކުން ވެސް އެކަހެރިކޮށްގެން ކަމަށާއި ނުރަސްމީ ބަންދު ސެންޓަރެއްގައި ސަރުކާރުގެ ކުންފުންޏަކުންވެސް ގިނަ އަދަދެއްގެ ބިދޭސީން ބަންދުކޮށްގެން ގެންގުޅުނު ކަމަށް އެ ޓީމުން ބުންޏެވެ. އެހެންނަމަވެސް އެއީ ކޮން ކުންފުންޏެއްކަން ހާމައެއް ނުކުރެއެވެ. އެ މީހުން ފަނޑިޔާރެއްގެ ކުރިމައްޗަކަށް ނުގެންދާ ކަމަށާއި، ގާނޫނީ އެހީތެރިކަމެއް ނުލިބޭ ކަމަށްވެސް ޕްރިޔާ ވިދާޅުވިއެވެ. ބިދޭސީން ބަންދުކުރާއިރު އެއް ހަމައަކުން އަމަލު ކުރުމުގެ ބަދަލުގައި ކޮންމެ ކޭހެއްވެސް ވަކިވަކިން ބެލުމަށް އެ ޓީމުންވަނީ އެދިފައެވެ.

ރާއްޖޭގެ ޖަލުތަކުގެ ހާލަތު ރަނގަޅު ކުރުމަށް ސަރުކާރުން މިހާރުވެސް ދަނީ ގިނަ މަސައްކަތްތަކެއް ކުރަމުންނެވެ. ގިނަ އަހަރުތަކެއް ވަންދެން ޖަލުތަކުގައި ވާނުވާގައި ތިބި މީހުންގެ މައްސަލަތައް ހައްލުކުރުމަށް ކުރަމުންދާ މަސައްކަތާއި ގުޅޭގޮތުން ޕީޖީ ޝަމީމް ވިދާޅުވެފައިވަނީ މިހާރު ޖަލުގައި ޝަރީއަތެއްނެތި ތިބި މީހުންނަކީ ބޮޑެތި ކުށްތަކުގައި ހައްޔަރުކޮށްފައިވާ މީހުން ކަމަށެވެ.

ޖަލުތަކުގެ ޖާގަ ބޮޑުކުރުމަށްޓަކައި ނޭކުރެންދޫގައި ޖަލެއް އެޅުމުގެ މަސައްކަތް ސަރުކާރުން ކުރަމުންދާއިރު، ހުޅުމާލޭގެ ޖަލުގެ ޖާގަވެސް ވަނީ ވަރަށް ފަހުން އިތުރުކޮށްފައެވެ. މީގެ އިތުރުން ޖަލުތަކުގައި މަންޑޭލާ ރޫލްސް ތަޢާރަފްކޮށް، ބައިނަލްއަޤްވާމީ މިންގަނޑުތަކާއެއްގޮތަށް ޖަލުގެ ވަޞީލަތްތައް ޤާއިމްކޮށް، ޤައިދީންނާމެދު އަމަލުކުރުމަކީ ސަރުކާރުގެ އަމާޒެވެ.