އަރަމުން އަންނަ ޒުވާން ތަރި ޖާންވީ ކަޕޫރަކީ ރީތިކަމުން ގިނަބަޔަކު މިސާލުނަގާ ތަރިއެކެވެ. ހާއްސަކޮށް އޭނާގެ މަންމަ, ކުރީގެ މަޝްހޫރު ތަރި ޝްރީދޭވީގެ ރީތިކަން ޖާންވީއަށް ލިބިފައި ވާކަމަށް ގިނަބަޔަކު ގަބޫލުކުރެއެވެ.
ޝްރީދޭވީ އާއި ބޯނީ ކަޕޫރުގެ ދޮށީ ދަރިފުޅު ޖާންވީ ދާދިފަހުން ވަނީ އިންޑިއާގެ ސަގާފީ ހެދުމެއް ކަމަށްވާ ސާރީގައި ފޮޓޯ ޝޫޓެއް ކުރިއަށް ގެންގޮަސްފައެވެ. މި ޝޫޓްގެ ފޮޓޯތައް އާންމުވުމާއެކު ގިނަބަޔަކު ބުނަމުން އަންނަނީ، ޖާންވީގެ ފޮޓޯ ތަކުން އޭނާގެ މަންމަގެ ހަދާންތައް އާކޮށްދީފައި ވާކަމަށެވެ.
އާންމުކޮށް ސާރީގައި ވަރަށް ތަފާތު ރީތިކަމެއް ދައްކައިދީފައިވާ ޝްރީދޭވީއަކީ, ސާރީއަކީ ފެޝަނެއްގެ ގޮތުގައި އާންމުންނަށް ދައްކައިދީފައިވާ ތަރިއެކެވެ. އަދި ސާރީގައިވެސް ޒަމާނީ އަދި އަންހެން ވަންތަ ގޮތްތަކަކަށް ފެނެވިދާނެ ކަންވެސް ޝްރީދޭވީ ވަނީ ސާބިތުކޮށްދީފައެވެ.
View this post on Instagram
މި ފޮޓޯ ޝޫޓްގައި ޖާންވީ ފެނިގެންދަނީ މަޑު ކުލައެއްގެ މާޖެހި ސާރީއެއްގައެވެ. މިއީ ރޯ މެންގޯ ބްރޭންޑްގެ ސާރީއެކެވެ. ޖާންވީގެ މި ސިލްކް ސާރީގެ އަގަކީ 19،800 އިންޑިއާ ރުޕީސް، ނުވަތަ 263 ޑޮލަރެވެ.
ފިލްމީ މަސައްކަތް ތަކަށް ބަލާއިރު ޖާންވީ އެންމެ އަވަހަށް ދެން ފެންނާނީ ސިއްދާތު ގުޕްތާ ޑައިރެކްޓްކުރާ ފިލްމު "ގުޑްލަކް ޖެރީ" އިންނެވެ. އޭނާ އެންމެ ފަހުން ފެނިގެން ދިޔައީ މިއަހަރު އެޅުވި ހޮރޯ ކޮމެޑީ "ރޫހީ" އިންނެވެ.
