ބޮލީވުޑް ސުޕަސްޓަރ ސަލްމާން ޚާނަށް ބޮޑުބޭބެ ކިޔާ އަލިޒޭ އަގްނިހޯތުރީ ބޮލީވުޑަށް ތަޢާރަފްކުރާ ފިލްމު މިމަހު އިއުލާން ކުރުމަށް ސަލްމާން ތައްޔާރުވެއްޖެއެވެ.
ސަލްމާންގެ ފިލްމު ކުންފުނި، އެސްކޭއެފް އާއި އަލިޒޭގެ މައިންބަފައިން ކަމަށްވާ ޕްރޮޑިއުސަރ އަތުލް އަގްނިހޯތުރީ އާއި އަލްވިރާ ޚާންގެ ފިލްމު ކުންފުނި ރީލް ލައިޕް ޕްރޮޑަކްޝަން ގުޅިގެން ހަދަން ނިންމާފައިވާ މި ފިލްމު މި މަހު އިއުލާންކުރި ނަމަވެސް ފިލްމުގެ ޝޫޓިންގ ފަށަން ހަމަޖެހިފައިވަނީ އަންނަ އަހަރުއެވެ. އަދި މި ފިލްމު ބެލުންތެރިންނާ ހަމައަށް އަންނާނީ 2023 ވަނަ އަހަރުއެވެ.
އަލިޒޭގެ މަންމަ އަލްވިރާ އަކީ ސަލްމާންގެ އެއްބަނޑު އެއްބަފާ ކޮއްކޮއެވެ. މިއީ ސަލަމާންގެ އާއިލާއިން މިހާތަނަށް އެކްޓްކުރުމުގެ ދާއިރާއަށް ނުކުންނަ ފުރަތަމަ އަންހެން ތަރިއެވެ.
View this post on Instagram
ޕިންކް ވިލާ އިން ރިޕޯޓްކޮށްފައިވާ ގޮތުގައި އުމުރުން 21 އަހަރުގެ މި ސްޓަރ ކިޑް ބޮލީވުޑަށް ނުކުންނަ މި ފިލްމަކީ ރޮމޭންޓިކް ޑްރާމާއެކެވެ. ސަލްމާން ބޭނުންވަނީ މި ފިލްމު ޚުދު އޭނާ އަމިއްލައަށް އިއުލާން ކުރާށެވެ.
އަލިޒޭ ފާއިތުވި 2 އަހަރެއްހާ ދުވަސް ވަންދެން އެކްޓުކުރުމާއި ނެށުމާއި ޑްރާމާ ކުލާސްތަކުގައި އަންނަނީ ބައިވެރިވަމުންނެވެ. އެހެންކަމުން އޭނާގެ މައިންބަފައިންނާއި ބޮޑުބޭބެ ގަބޫލުކުރާގޮތުގައި މިހާރު އޭނާހުރީ ބޮލީވުޑަށް ތަޢާރަފްވުމަށް ތައްޔާރުވެފައެވެ.
މި ފިލްމަށް ޑައިރެކްޓަރަކާއި ކާސްޓުން ނެގުމުގެ މަސައްކަތް މިހާރު ކުރިއަށް ގެންދާކަމަށްވެސް ޕިންކް ވިލާއިން ވަނީ ރިޕޯޓްކޮށްފައެވެ.
