ޑްރަގާއި ދެކޮޅަށް ނަތީޖާ ނެރެވޭނީ ހުރިހާ މުއައްސަސާއަކުން ގުޅިގެން ކުރެވޭ މަސައްކަތަކުން ކަމުގައި ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވެއްޖެއެވެ.
ރާއްޖޭގައި ޑްރަގުގެ ވަބާގައި ޖެހޭ ޒުވާނުންގެ އަދަދު ގިނަވެ. މުޖުތަމައުގެ ބޮޑު ނުރައްކަލަކަށް ޑްރަގުގެ ވަބާ ވެފައިވާއިރު، މިކަން ހައްލު ކުރުމަށް ކަމާއި ގުޅުންހުރި ފަރާތްތަކުން ގުޅިގެން މަސައްކަތް ނުކުރެވޭކަން ގިނަ ބަޔަކު ފާހަގަ ކުރެއެވެ. ޚާއްސަކޮށް މިފަދަ ގިނަ މައްސަލަތަކާއި ޝަކުވާތައް އެންމެ ގާތުން އަޑުއަހާ މަޖިލިސް މެމްބަރުންނަށް މިކަމުގައި ހުރި ގޮންޖެހުންތައް އެބޭފުޅުން ދަނީ މަޖިލިސްގެ ޖަލްސާތަކުގައާއި ކޮމެޓީތަކުގައިވެސް ފާހަގަ ކުރަމުންނެވެ.
މެމްބަރުން އަހުމަދު އަބްދުﷲ ކުރެއްވީ ޓުވީޓުގައި ވިދާޅުވީ ރާއްޖޭގައި ޑްރަގުގެ ހާލަތު އޮތް ހިސާބަށް ބަލާއިރު ހުރިހާ މުއައްސަސާއަކުން ގުޅިގެން ކުރެވޭ މަސައްކަތަކުން ނޫނީ ނަތީޖާ އަކާއި ހަމައަށް ދިއުމަކީ ވަރަށް އުދަނގޫ ކަމެއްކަމަށެވެ. ރާއްޖޭގެ މުއްތަގުބަލު ގުޅިފައިވަނީ ޒުވާނުންނާއި ކަމަށްވާއިރު ޒުވާނުންގެ މުސްތަގުބަލު އުޖާލާ ކޮށްދެވޭނީ އެންމެންގެ މަސައްކަތުންކަމަށް އަހުމަދު ވިދާޅުވިއެވެ.
ޑްރަގާއި ދެކޮޅަށް ހުރިހާ މުއައްސަސާއެއް އެކުގައި މަސައްކަތް ކޮށްގެން ނޫނީ ނަތީޖާއެއް ނުނެރެވޭނެ. ޤައުމުގެ މުސްތަޤުބަލުގެ ކުރިއެރުމާއި ތަރައްޤީއަށް އެންމެ މުހިންމު މަސައްކަތެއްކޮށް ދެވޭނީ މިއަދުގެ ޒުވާނުންނަށް.
– އަހުމަދު އަބްދުﷲ ވިދާޅުވިއެވެ.
ނޭޝަނަލް ޑްރަގް އެޖެންސީ ރީސްޓްރަކްޗަރކުރުމާއި، ގުޅޭގޮތުން މިނިސްޓަރ އޮފް ހެލްތުގެ ފަރާތުން މަޖިލީހަށް ވަނީ ވަރަށް ތަފްސީލީ ޕްރެޒެންޓޭޝަނެއް މިއަހަރުގެ ސެޕްޓެމްބަރު މަހު ހުށަހަޅާފައެވެ. ޕްރެޒެންޓެޝަނުން ދައްކާގޮތުން ޑްރަގުގެ ވަބާގައި ޖެހެމުންދާ މީހުންގެ އުމުރު ފުރާއާއި، ޑްރަގް އެތެރެކުރާ މިންވަރާއި، ގޮތްތަކަށް ބަލާއިރުވެސް ވަރަށް ބޮޑަށް ތަފާތުވަމުންދާކަން ވަނީ ދައްކާފައެވެ. އަދި ފާއިތުވެދިޔަ 2014 ވަނަ އަހަރަށް ބަލާއިރު ޑްރަގުގެ ވަބާގައި ޖެހިފައިވާ މީހުންގެ އުމުރަކީ 22 އާއި 37 އަހަރާއި ދެމެދު ކަމަށާއި ނަމަވެސް މިއަހަރު އުމުރު ފުރާއަށް ބަލާއިރު 17 އަަހަރާއި 68 އަހަރާއި ދެމެދު މީހުން މި ވަބާގައި ޖެހިފައިވާކަން ފާހަގަވެއެވެ.
މިހާރު ރާއްޖޭގައި ވަރަށް ކުޑަކުދިންވެސް މިވަބާގައި ޖެހިފައިވާއިރު، އެގޮތުން 8 އަހަރުގެ ކުދިންވެސް މި ވަބާގައި މިހާރު ޖެހިފައިވާކަމަށް ޕްރެޒެންޓޭޝަނުން ދައްކައެވެ. އަދި ރާއްޖެއަށް ޑްރަގް އެތެރެ ކުރުމުގައި ޒަމާނީ އުކުޅުތަކާއިއެކު މެއިލް މެދުވެރިކޮށްވެސް ޑްރަގު އެތެރެކުރަމުންދާކަމަށާއި ރާއްޖެއަށް ޑްރަގު އެތެރެކުރުމުގައި މައިގަނޑު ގޮތެއްގައި ހަރަކަތްތެރިވަނީ ދިވެހިންނެވެ.
ރާއްޖޭގައި ޑްރަގުގެ ވަބާ އޮތް މިންވަރުން ހާލަތު ބަދަލު ކުރުމަށް ކުރެވޭ މަސައްކަތަކީ މުޅި ރާއްޖޭގައި ވަރަށް ފުޅާކޮށް ހިންގުމަށް ނިންމާފައިވާ މަސައްކަތެއްކަމަށް މިނިސްޓަރ ނަސީމް ވިދާޅުވިއެވެ. މިމަސައްކަތުގައި ޖަލުތަކުގައާއި، އަތޮޅުތެރޭގެ ރަށްތަކުގައިވެސް ޚާއްސަ ޕްރޮގުރާމުތަކެއް ހިންގުމަށް ހަމަޖެހިފައިވާކަމަށް ނަސީމް ވިދާޅުވިއެވެ.
ހެލްތު މިނިސްޓްރީން ވަނީ، މަސްތުވާތަކެތީގެ ވަބާއިން އަރައިގަތުމަށް ބޭނުންވާ މީހުންނަށް އެހީވުމަށް ރާއްޖޭގެ މީހުން ދިރިއުޅޭ ކޮންމެ ރަށަކުން ޓީމްތަކެއް ނެގުމަށް ނިންމާފައެވެ. މި ޓީމްތަކަކީ މުޖުތަމަޢާ ގާތުން، އަދި މިފަދަ ވަބާތަކަށް ހުށައެޅުމުގެ ކުރިންވެސް ބޭނުންވާ އެހީ ފޯރުކޮށްދިނުމަށް ޓްރެއިންކުރާ ޓީމްތަކެކެވެ. މި މަސައްކަތް ފެށުމުގެ ތައްޔާރީތައް މިހާރު ދަނީ ހެލްތު މިނިސްޓްރީން ކުރިއަށްގެންދަމުންނެވެ.
