ކުރީގެ ރައީސް އަބްދުﷲ ޔާމީނަށް މަތިމައްޗަށް ދައުވާ އުފުލައި، އަނިޔާވެރިވަމުންދާއިރު، އެމަނިކުފާނަށް އިންސާފު ލިބުމަށް އެދެނީ މުޅި ދިވެހި ޤައުމުކަން މިހާރު އޮތް ސަރުކާރުން ދަންނަންޖެހޭ ކަމުގައި އިދިކޮޅު ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
ޔޫތު މިނިސްޓަރ އަހުމަދު މަހުލޫފަށް ދައުވާ ކުރުމަށް އިއްޔެ ނިންމައި، ކޯޓަށް މައްސަ ހުށަހެޅުމާއި ގުޅިގެން ޝިޔާމް ވިދާޅުވީ މިއީ ސަރުކާރުން ވަރަށް ނުބައި ނިޔަތެއްގައި ރައްޔިތުންގެ ލޮލުގައި އަނދުނެއް އެޅުވުމަށް ކުރި ދައުވާއެއް ކަމަށެވެ. މިއީ އިންސާފުވެރި ސަރުކާރެއްކަން ދައްކައި، ރައީސް ޔާމީނަށް އަނިޔާ ދިނުމުގެ ނުބައި ނިޔަތުގައި ސަރުކާރުން ވަރަށް ރޭވުންތެރި ކަމާއިއެކު ކުރަމުންދާ ކަންތައްތަކެއްކަމަށް ޝިޔާމް ވިދާޅުވިއެވެ.
ދައުލަތުން މަހުލޫފްގެ މައްޗަށް ދައުވާ އުފުލީ ހިތުން ރައްޔިތުންގެ ލޮލުގައި އަނދުން އެޅުވައި މާއިންސާފުވެރި ބައެއްކަމަށް ދެއްކަން. އަޑީގައި އޮތީ ރައީސް ޔާމީނަށް އަނިޔާ ދިނުމުގެ ނުބައި ވިސްނުން އެކަނި. ރައީސް ޔާމީނަށް އިންސާފު ލިބުމަށް އެދެނީ ޕީޕީއެމް، ޕީއެންސީ އެކަނި ނޫންކަމާއި މުޅި ޤައުމުކަން ދަންނަންޖެހޭ.
– ޝިޔާމް ވިދާޅުވިއެވެ.
މަހުލޫފްގެ މައްޗަށް ދައުވާ ކުރަން ފޮނުވާފައިވާއިރު، އިއްޔެ ވަނީ ރައީސް ޔާމީނަށް ވ.އަތޮޅު އާރަށް ވިއްކާލައިގެން ލިބުނު 1 މިލިއަން ޑޮލަރު ކުރީގެ ރައީސް ޔާމީންގެ އަމިއްލަފުޅު އެކައުންޓަށް ޖަމާކޮށް އެފައިސާ ލޯންޑަރކުރެއްވިކަމަށް ތުހުމަތުކުރެވޭ މައްސަލާގައި ދައުވާކުރުމަށް ކްރިމިނަލް ކޯޓަށް ހުށަހަޅައިފައެވެ.
އާރަށުގެ މައްސަލައިގައި ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށްކުރީ މަނީ ލޯންޑްރިންގއާއި ރިޝްވަތު ޤަބޫލުކުރުމުގެ ކުށުގެ ދަޢުވާއެވެ. އެއްމިލިޔަން ޑޮލަރުގެ މައްސަލައިގައި ރައީސް ޔާމީންގެ މައްޗަށް ދައުވާކުރުމަށް ފޮނުވާފައި މިވަނީ މަނީލޯންޑަރިންގެ ކުށް ސާބިތުވެ، އެމަނިކުފާނުގެ މައްޗަށް 2019ވަނަ އަހަރު 5 އަހަރުގެ ޖަލު ހުކުމެއް އިއްވައި އެޙުކުން ތަންފީޒުކުރައްވަމުން ގެންދަވަނިކޮށެވެ.
ދަށުކޯޓުގެ އެ ނިންމުން ހައިކޯޓުގައި އިސްތިއުނާފުކުރުމަށްފަހު ރައީސް ޔާމީންގެ ފަރާތްޕުޅުން މިހާރުވަނީ އެމައްސަލަ އިސްތިއުނާފްކުރުމަށް ސުޕްރީމް ކޯޓަށްވެސް ހުށައަޅާފައެވެ. އަދި ސްޕްރީމް ކޯޓުގައި ދެން އޮންނާނީ މިމައްސަލައިގެ ޙުކުމް އިއްވުމެެވެ.
މީގެ އިތުރުން ރ. ފުއްގިރި ވިއްކައިގެން ލިބުނު މިލިއަނަކަށްވުރެ ގިނަ ޑޮލަރު އަމިއްލަފުޅު އެކައުންޓަކަށް ޖަމާކުރި މައްސަލާގައިވެސް ރައީސް ޔާމީންގެ މައްޗަށް ކްރިމިނަލް ކޯޓުގައިދަނީ ޝަރީޢަތް ހިންގަމުންނެވެ.
