ސުޕަސްޓަރ އާމިރް ޚާންގެ އުންމީދީ ފިލްމް "ލާލް ސިންގް ޗައްޑާ" އަންނަ އަހަރުގެ އެޕްރިލް 14 އަށް ރިލީޒް ކުރުމަށް ނިންމައިފިއެވެ.
އަމިރްގެ އިތުރުން ކަރީނާ ކަޕޫރު ޚާން ލީޑްރޯލުން ފެނިގެންދާ މި ފިލްމް ރިލީޒް ކުރުން މީގެ ކުރިން ވަނީ އެތައް ފަހަރެއްގެ މަތިން ފަސްކޮށްފައެވެ. ކޯވިޑް-19 ގެ ސަބަބުން ފިލްމް އިންޑަސްޓްރީއަށް ވަނީ ގިނަ ގުނަ ނޭދެވޭ އަސަރުތަކެއް ކޮށްފައެވެ. އެގޮތުން ގިނަ ފިލްމް ތަކެއް، ކުރިން އަންދާޒާކޮށްފައިވާ ޝެޑިއުލްތަކަށް މަސައްކަތްތައް ނުގެންދެވިފައި ވެއެވެ.
"ލާލް ސިންގް ޗައްޑާ" އަންނަ އަހަރުގެ 14 ގައި އެޅުވުމަށް ތާވަލް ކޮށްފައިވީ ނަމަވެސް އެދުވަހު ވެސް ފިލްމު ފެންނަވަރު ވާނޭކަމާމެދު ގިނަ ބަޔަކު ޝައްކުކުރެއެވެ. ސަބަބަކީ މި ތާރިހުގައި ބޮޑެތިި އިތުރު ފިލްމްތަކެއް ވެސް މިހާރު ރިލީޒް ކުރުމަށް ތާވަލުކޮށް އިއުލާން ކޮށްފައިވުމެވެ.
އަދުވައިތު ޗަންދަން ޑައިރެކްޓްކުރާ މި ފިލްމަކީ 1994 ގައި ރިލީޒްކުރި ހޮލީވުޑްގެ ފިލްމު "ފޮރެސްޓް ގަމްޕް" އަސްލަކަށް ބަލައިގެން ހަދާފައިވާ ފިލްމެކެވެ.
މި ފިލްމު ހާއްސަވާ އެއް ކަމަކީ ސައުތުގެ މަޝްހޫރު އެކްޓަރ ނާގަ ޗައިތަނިޔާ މިފިލްމުން ބޮލީވުޑަށް ތާއާރަފް ވާ ކަމެވެ. މީގެ އިތުރުން ބޮލީވުޑްގެ ކިންގް ޚާނުން ކަމަށްވާ އާމިރް ޝާހްރުކް އަދި ސަލްމާން އެއް ފިލްމަކުން ފެނިގެންދާނެ ފުރަތަމަ ފިލްމެވެ.
މި ފިލްމުގައި ޝާހްރުކް ޚާން ކުޅުމަށް ހަމަޖެހިފައި ވަނީ އޭނާގެ މަޝްހޫރު ފިލްމު "ދިލްވާލޭ ދުލްހަނިޔާ ލޭ ޖައެންގޭ" ގައި އޭނާ ކުޅުނު "ރާޖް"ގެ ރޯލެވެ. އަދި ސަލްމާން ޚާން ފެނިގެންދާނީ 90ގެ އަހަރުތަކުގައި އޭނާ މަޝްހޫރު ކަން ހޯދި "ޕްރޭމް"ގެ ގޮތުގައެވެ.
