ސަރުކާރަށާއި، ރައީސުލްޖުމްހޫރިއްޔާ އިބްރާހިމް މިހައްމަދު ޞާލިހަށް ފާޑުކިޔައި ޓުވީޓްކުރި ޖުޑިޝަރީގެ މުވައްޒިފަކު ވަޒީފާއިން ވަކިކޮށްފިއެވެ.
ވަޒީފާއިން ވަކިކޮށްފައިވަނީ ހުޅުމާލޭ މެޖިސްޓްރޭޓް ކޯޓުގައި އޮފިސަރެއްގެ ގޮތުގައި މަސައްކަތް ކުރި މުވައްޒަފެކެވެ. އޭނާ މަޝްހޫރު ވެފައިވަނީ ސޯޝަލް މިޑިއާގައި ޕޮކްމަންގެ ނަމުންނެވެ. ސޯޝަލް މީޑިއާގައި ސަރުކާރުން ކުރާ ނުރަނގަޅު ކަންކަން ފާހަގަކޮށް އެކި ޓވުވީޓުތައް އޭނާ ކުރަމުން ގެންދެއެވެ.
ވަޒީފާއިން ވަކިކޮށްފައިވަނީ އޭނާ ކުރަމުންދާ މިފަދަ ޓުވީޓުތަކުގެ މައްސަލަ ޖުޑީޝަލް އެޑްމިނިސްޓްރޭޝަނަށް ހުށަހަޅައި އޭނާއާ މެދު ފިޔަވަޅު އެޅުމަށް ފުރަތަމަ އެދުނީ ޖުޑީޝަލް ސާވިސް ކޮމިޝަން (ޖޭއެސްސީ) އިންނެވެ. ނަމަވެސް، ޖޭއެސްސީއަކީ ފަނޑިޔާރުންގެ ސުލޫކީ މައްސަލަތައް ބެލުމުގެ އިހްތިސާސް އޮންނަ ކޮމިޝަނެއް ކަމުގައިވީ ނަމަވެސް އެ ކޮމިޝަނަކީ ޖުޑީޝަރީގެ މުވައްޒަފުންގެ ކަންކަން ބެލެހެއްޓުމުގެ އިހްތިސާސް އޮންނަ ކޮމިޝަނެއް ނޫންކަން ފާހަގަ ކުރެވެއެވެ.
އޭނާ ވަޒީފާއިން ވަކިކޮށްފައިވާއިރު، ޤާނޫނު އަސާސީގައި ކޮންމެ ދިވެހި ރައްޔިތަކަށް އެމީހެއްގެ އަމިއްލަ ވިސްނުމާއި ޚިޔާލު ފާޅު ކުރުމުގެ މިނިވަންކަން ލިބިފައިވާކަމަށް ވަނީ ބުނެފައެވެ.
އަދި ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ރައީސުލްޖުމްހޫރިއްޔާ ވިދާޅުވީ ސިޔާސީ ވަކިކަމެއްގައި ނޫޅެގެން ފިޔަވަޅު އެޅި، އެކަހެރިކުރެވި، މަގާމުން ވަކި ކުރުމުގެ ފުރުޞަތު އެއްވެސް ޙާލެއްގައި އޮވެގެން ނުވާނެކަމަށެވެ. ސިވިލްސަރވަންޓުންނަކީ އެމީހަކު ގަބޫލުކުރާ ސިޔާސީ ފިކުރެއްގައި ދެމިތިބެވޭނެ މިނިވަން ބައެއްކަމަށާ، އެއީ ސިޔާސީ މަސައްކަތުގައި ވަކި ބަޔަކަށް ގުލާނުކޮއްދިނުން މަޖުބޫރު ސިޔާސީ ބައެއް ނޫންކަމުގައި ރައީސް ވިދާޅުވިއެވެ.
