ރައީސް ޔާމީންގެ ވެރިކަމުގައި ރައްޔިތުންގެ ބޯހިޔާ ވަހިކަމަށް ތަރައްޤީ ކުރި "ހިޔާ" ފްލެޓުގެ ފިނިޝިން މަސައްކަތަށް ބޭނުންވާ ތަށި މުށި ގަތުމަށް ރައީސް ޔާމީންގެ ގެކޮޅު ވިއްކާލުމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ގޮވާލައިފިއެވެ.
ރޮޒޭނާ މިފަދައިން ވިދާޅުވީ ހިޔާ ފްލެޓް ލިބުނު ކޮންމެ މީހަކަށް ފްލެޓްގެ ފިނިޝިން މަސައްކަތާއި، ކުރިން ކަނޑައެޅި ކުލި ކަނޑައެޅުމަށް ދައުލަތުގެ ބަޖެޓްގައި ފައިސާ ހިމެނުމަށް ޕީޕީއެމްގެ ޕާލިމަންޓްރީ ގްރޫޕްގެ ލީޑަރު އަދި އޭދަފުށީ ދާއިރާގެ މެންބަރު އަޙްމަދު ސަލީމް ގޮވާލުމާއި ގުޅިގެންނެވެ.
ބަޖެޓް ބަހުސްގައި ރޮޒޭނާ މިއަދު ވިދާޅުވީ ހިޔާ މަޝްރޫއުގެ ފްލެޓްތަކުގެ ފިނިޝިން ނުނިމި ދިޔައީ ކުރީގެ ސަރުކާރުން އެ މަޝްރޫއު ރާވާފައި އޮތް ގޮތުން ކަމަށެވެ. އެ މަޝްރޫއުގައި ވެސް ޚިޔާނާތްތެރިވުމާއި ކަންކަން އޮޅުވާލުމުގެ ކަންކަން އޮތް ކަމަށް ރޮޒެއިނާ ތުހުމަތު ކުރެއްވިއެވެ. ރޮޒެއިނާ ވިދާޅުވީ އެ މަޝްރޫއަށް ހޭދަކުރި ފައިސާއަކީ އޭގެ ތިން ތަން ފިނިޝިންއާއެކު ވެސް ނިންމޭނެ ވަރަށް، އެންމެ ތަނެއް ފިނިޝިން ވެސް ނުލާ ނިންމާފައި އޮތް ކަމެއް ކަމަށެވެ.
ދެން މި ތަނަށް އައިސް ޕީޕީއެމްގެ މެންބަރުން ތަށިމުށި ގަނެދޭށޭ އައިސް ބުނީމަ ލަދު ގަންނަން ޖެހޭ، ތަށިމުށި ޖަހާނެ ފައިސާ ވަން ތަނެއް ވެސް ހޯދަން އެބަ ޖެހޭ، މިއީ އަޅުގަނޑުމެން އަސްލު ބަލަންވީ ކަމަކީ، ތަށިމުށި ޖަހަންވީ ފައިސާއިން އެ ހުރީ އަތިރިމަތީގައި ބޮޑު އިމާރާތެއް ހަދާފައި.
– ރޮޒޭނާ ވިދާޅުވިއެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށައަޅަފައިވާ ބަޖެޓަށް ވާހަކަފުޅު ދައްކަވަމުން ސަލީމް (ރެޑްވޭވް ސަލީމް) ވިދާޅުވީ، ހިޔާ ފްލެޓްތަކުގެ ފިނިޝިން ނުންމާ ރައްޔިތުންނަށް ހަވާލުކުރީ ސަރުކާރުގެ ޖެއްސުންކުރުމުގެ މަޤްޞަދުގައިކަމަށެވެ. ސަލީމް ވިދާޅުވީ ހިޔާ ފްލެޓްތަކުގެ ކުލުި ކުޑަކުރުމަށް ބޭނުންވާ ގާތްގަނޑަކަށް 130 މިލިއަން ރުފިޔާ އަކީ، ދައުލަތުގެ ބޭކާރު ޚަރަދުތައް ކުޑަކޮށްގެންވެސް ކުރެވިދާނެކަމެއްކަމަށެވެ. އޭނާ ވަނީ ހިޔާ ފްލެޓް ލިބުނު ކޮންމެ އާއިލާއަކަށް އެއްލައްކަ ރުފިޔާ ދައުލަތުގެ ބަޖެޓުން ދިނުމަށް ގޮވާލައްވާފައެވެ.
އަޅުގަނޑު ގޮވާލަން މިހާރުން މިހާރަށްވެސް މިދައުލަތުގެ ބަޖެޓަށް ކޮންމެ ފެމިލީއަކަށް 1ލައްކަ ރުފިޔާ މިބަޖެޓްގައި ހިމަނަން. މި ބަޖެޓްގައި އެބަހުރި ބޮޑެތި ޢަދަދުތަކުން ފައިސާ ހިމަނާފަ އެކި ދިމަދިމާގަ. އޭގެތެރެއިން ފައިސާ ގެނެވިދާނެ. މިހާރުގަ މިމީހުން އުޅެންޖެހޭނީ ކިތައް އަހަރުކަމެއް އަހަރެމެންނަކަށް ނޭނގެ. އެއީ އެކި މީހުންނަށް މި ހެދެނީ. އަދި 100ވަރަކަށް އާއިލާ އެތަނަށް ވަންކަމެއް ނޭނގޭ.
– އަޙްމަދު ސަލީމް
ސަލީމް ވަނީ ދައުލަތުގެ ބަޖެޓުގެ ދަރަނި ބޮޑުކަމުން އެކަމަށްވެސް ފާޑުވިދާޅުވެ ވާހަކަފުޅު ދައްކަވާފައެވެ.
ހިޔާ ފްލެޓް ލިބުނު ކޮންމެ އާއިލާއަކަށް 1 ލައްކަ ރުފިޔާ ދިނުމަށް ސަލީމް ގޮވާލައްވާފައިވާއިރު، ފްލެޓްތަކުގެ ފިނިޝިން ނުނިންމާ ހަވާލުކުރުމުން ރައްޔިތުންނަށް ބޮޑެތި ަޚަރަދުތަކެއް ކުރަންޖެހިފައިވާކަމަށްބުނެ ފާޑުކިޔުން ވަނީ ސަރުކާރަށް އަމާޒުވެފައެވެ. ބައެއް އާއިލާތަކުން މިހާރުވަނީ ހިޔާ ފްލެޓަށް ބަދަލުވެފައެވެ. ފްލެޓް ލިބުނު ފަރާތްތަކުން ވަނީ ފްލެޓްގެ އަގު ކުޑަކުރުމަށް ސަރުކާރަށް ގޮވަލާފައެވެ. ސަރުކާރުން ހިޔާ ފްލެޓަށް ކަނޑައަޅާފައިވަނީ މަހަކު 8500 ރުފިޔާއެވެ. ނަމަވެސް އެ އަދަދު 5400އަށް ކުޑަކުރެވޭނެކަމަށް ކުރީގެ ސަރުކާރުގެ ވެރިން އަންނަނީ ބުނަމުންނެވެ.
