ސިވިލް ސާރވިސް ޤަވާއިދު އަލުން އިޞްލާހުކުރުމަށް ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ގޮވާލައްވައިފިއެވެ. އޭނާ މިކަމަށް ގޮވާލެއްވީ، ސިވިލް ސާރވިސް މުވައްޒަފުން ސިޔާސީ ހަރަކާތްތަކުގައި ބައިވެރިވާނަމަ ވަޒީފާ ގެއްލޭގޮތަށް ސިވިލް ސާރވިސްގެ ޤަވާއިދު އިޞްލާހުކުރުމުން އެކަމަށް ފާޑުވިދާޅުވެއެވެ.
އާދަމް ޝަރީފް ވަނީ ސަރުކާރުން ޤަވާއިދު އިސްލާހުނުކޮށް އާންމު ކުރަނީ ކީއްވެތޯ ސުވާލުކުރައްވާފައެވެ. އޭނާ ވިދާޅުވީ "އެހެން މީހުންގެ ބޮލަށް ކެނޑުމަކީ" އެންމެ ނާޤާބިލު ސިފަކަމަށް ވިދާޅުވެ މުވައްޒަފުންގެ ހައްގުތައް ގެއްލުމުގައި ސިވިލް ސާރވިސް ކޮމިޝަންގެ އިހްމާލު ބޮޑުކަމަށް ހާމަކުރައްވާފައެވެ.
އާދަމް ޝަރީފް ވިދާޅުވީ، ސަރުކާރުގެ މިސްރާބު ހުރީ ސިވިލް ސާރވިންޓުނަށް ބިރުދައްކައި ސިވިލް ރައިޓްސްއިން މަޙްރޫމްކުރުމަށްކަމަށެވެ. ސިޔާސީ ކަންކަމުގައި ބައިވެރިވުމުން ވަޒީފާ ގެއްލޭގޮތަށް ޤަވާއިދު ބަދަލުކުރުމަކީ ޑިމޮކްރަސީއާއި ބީރައްޓެހި ނާތަހުޒީބު އަމަލެއްކަމަށާއި، އަލުން އިސްލާހުކުރުމަށް ގޮވާލާކަމަށް އާދަމް ޝަރީފް ވިދާޅުވިއެވެ.
ސިވިލް ސާރވިސްގެ އައު އިޞްލާހުގައި ބުނެފައިވާގޮތުގައި މަސައްކަތުގެ ރަސްމީ ނުވަތަ ނުރަސްމީ ގަޑީގައިވެސްމަސައްކަތުގައި އުޅޭ އެއްވެސް ވަގުތެއްގައި، އެއްވެސް ސިޔާސީ ހަރަކާތެއްގައި ބައިވެރިވުން ވަނީ ކުށެއްގެ ގޮތުގައިކަމަށް ކަނޑައަޅައި، އެއީ ވަޒީފާއިން ވަކިކުރެވޭފަދަ ކުށެއްގެ ގޮތުގައި ބަޔާންކޮށްފައެވެ.
އަދި ސިވިލް ސާރވިސް މުވައްޒަފެއް އޭނާގެ މަގާމުގެ މަސްއޫލިއްޔަތު އަދާކުރާއިރު ވަކި ފަރާތަކަށް ޖެހި ހުންނަކަން ދޭހަވާ ފަދަ ގޮތަކަށް ނުވަތަ އެ މުވައްޒަފެއްގެ ވާޖިބުތަކާއި މަސްއޫލިއްޔަތުތަކަށް ހުރަސްއެޅޭ ފަދަ ގޮތަކަށް އެއްވެސް ސިޔާސީ ހަރަކާތެއްގައި ބައިވެރިވުން ވެސް ވަނީ ވަޒީފާއިން ވަކިކުރެވޭ ކުށެއްގެ ގޮތުގައިވެސް އައު އިޞްލާހުގައި ކަނޑައަޅައިވެއެވެ. މީގެ އިތުރުން މަގާމު އަދާކުރުމުގައި ނުވަތަ މަގާމުގެ ގޮތުން އެހެން މީހުންނަށް ހިދުމަތް ދިނުމުގައި ސިޔާސީ ފިކުރާ ގުޅުވައި ތަފާތުކުުރުން ގެންގުޅުމަކީ ވެސް ވަޒީފާއިން ވަކިކުރެވޭ ކުށެއްްގެ ގޮތުގައިވަނީ ކަނޑައަޅައިފައިވާއިރު، މި ގަވާއިދާއެކު ސިވިލް ސާވިސް މުވައްޒަފުންނަށް މަސައްކަތުގައި އުޅޭ ވަގުތު ސިޔާސީ ހަރަކާތްތަކުގައި ބައިވެރިވުމަކީވެސް މަނާކަމެއްކަމަށް ބަޔާންކޮށްފައިވެއެވެ. ނަމަވެސް މަސައްކަތު ވަގުތު ނޫން ވަގުތުތަކުގައި ސިޔާސީ ހަރަކާތްތަކުގައި ބައިވެރިވުމަށް މި ޤަވާއިދު ހުރަހެއް ނާޅައެވެ.
ސިވިލް ސާރވިސްގެ އައު އިޞްލާހާއި ގުޅިގެން ގިނަބައެއްގެ ފާޑުކިޔުން ވަނީ އަމާޒުވެފައެވެ.
