ޔުއެފާ ޗެމްޕިއަންސް ލީގު ފުޓްބޯޅަ މުބާރާތުގައި ސްޕެއިންގެ އެތުލެޓިކޯ މެޑްރިޑް ފަސޭހަކަމާއެކު ބަލިކޮށް ލިވަޕޫލް ދެ ވަނަ ބުރަށް ދަތުރުކޮށްފިއެވެ.
އެންފީލްޑްގައި ރޭ ލިވަޕޫލުން އެތުލެޓިކޯގެ މައްޗަށް ކުރިހޯދީ 0-2 ގެ ނަތީޖާއަކުންނެވެ.
ލިވަޕޫލްގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެޓީމުން ޖެހި ދެ ލަނޑުވެސް ކާމިޔާބުކޮށްފައިވަނީ މެޗުގެ ފުރަތަމަ ހާފުގައެވެ. އެގޮތުން ލިވަޕޫލްގެ ފުރަތަމަ ލަނޑު މެޗު ފަށައިގެން 13 ވަނަ މިނެޓުގައި އެޓީމަށް ކާމިޔާބުކޮށްދިނީ، ޑިއޯގޯ ޖޮޓާއެވެ. އަދި އޭގެ އަށް މިނެޓު ފަހުން އާނޯލްޑް ތަނަވަސްކޮށްދިން އިތުރު ފުރުސަތަކުން ލިވަޕޫލަށް ލީޑު ފުޅާކޮށްދިނީ ސަޑިއޯ މާނޭއެވެ.
މި މެޗުގައި އެތުލެޓިކޯއަށް ދިމާވި އެންމެ ބޮޑު އެއްމައްސަލައަކީ މެޗުގެ 36 ވަނަ މިނެޓުގައި އެޓީމުގެ ކުޅުންތެރިއަކަށް ރަތް ކާޑު ދައްކާ ދަނޑުން ފޮނުވާލި ހިސާބުންނެވެ. އެތުލެޓިކޯގެ ފިލީޕޭއަށް ރެފުރީ ރަތް ކާޑު ދެއްކީ ލިވަޕޫލުގެ މާނޭއަށް ކުރި ފައުލަކާ ގުޅިގެންނެވެ.
މި މެޗުގެ އިތުރުން ޗެމްޕިއަންސް ލީގުގައި ލިވަޕޫލް ހިމެނޭ ގްރޫޕް ބީ ގައި އޭސީ މިލަނާއި ޕޯޓޯ ބައްދަލުކުރި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.
މި ނަތީޖާއާއެކު ގްރޫޕް ބީން ޗެމްޕިއަންސް ލީގުގެ ދެވަނަ ބުރުން ޖާގައެއް ޔަގީންކުރިން ފުރަތަމަ ކްލަބަކަށް ލިވަޕޫލް ވެގެންދިޔައިރު، އެޓީމު ވަނީ 4 މެޗުން 12 ޕޮއިންޓް ހޯދާފައެވެ. ދެވަނައިގައި އޮތް ޕޯޓޯއަށް 4 މެޗުން ލިބެނީ 5 ޕޮއިންޓެއެވެ. އަދި ތިންވަނައިގައި އެތުލެޓިކޯ އޮތީ 4 ޕޮއިންޓާއެކުއެވެ. ފުލުގައި އޮތް މިލާނަށް ލިބެނީ 1 ޕޮއިންޓެއެވެ.
