ރަސްމީ ފުޓްބޯޅަ ދަނޑު (ގަލޮޅު ދަނޑު) ތަރައްގީ ކުރަން 55 މިލިއަން ރުފިޔާގެ ބޮޑު ބަޖެޓެއް ހަމަޖައްސައިފިއެވެ.
އަންނަ އަހަރަށް ލަފާކުރާ ދަޢުލަތުގެ ބަޖެޓު މިއަދު ރައްޔިތުންގެ މަޖިލީހަށް ހުށަހަޅާފައިވާއިރު، އިންޑިއާގެ އެގްޒިމް ބޭންކުން ދޭ ލޯން އެހީގެ ތެރެއިން 2022 ވަނަ އަހަރު ގަލޮޅު ދަނޑުގެ ތަރައްގީކުރުމަށް ހިމަނާފައިވަނީ 45،494،505 ރުފިޔާއެވެ. އަދި 2023 ވަނަ އަހަރުގެ ބަޖެޓުގައި 10 މިލިއަން ރުފިޔާ ވަނީ ރަސްމީ ފުޓްބޯޅަ ދަނޑު ތަރައްގީ ކުރުމަށް ހިމަނާފައެވެ. އެހެންކަމުން ރަސްމީ ފުޓްބޯޅަ ދަނޑު ތަރައްގީ ކުރުމަށް ޖުމްލަ 55،494،505 ރުފިޔާ ޚަރަދު ކުރާނެއެވެ.
ސަރުކާރުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް މިއަދު ހުށަހެޅީ 36.9 ބިލިއަން ރުފިޔާގެ ބޮޑު ބަޖެޓެކެއެވެ.
ރަސްމީ ފުޓްބޯޅަ ދަނޑު ތަރައްގީ ކުރަން ބަޖެޓުގައި ހިމަނާފައިވަނީ ދަނޑުގެ ދެކުނު ފަރާތް (ސަހާރާ ފަޅި) އަދި އިރުމަތީ ފަރާތުގެ (ބޮޑުގޭޓް ފަޅި) ބޭނުންކުރުން ރައްކާތެރި ނޫން ކަމަށް ޕްލޭނިން މިނިސްޓްރީން އަންގާފައިވަނިކޮށެވެ. ޕްލޭނިން މިނިސްޓްރީން މިކަން އަންގާފައިވަނީ މީގެ ދެ އަހަރު ކުރިންނެވެ. ނަމަވެސް އެންމެ ފަހުން މާލޭގައި ބޭއްވި އުރީދޫ ސާފް ޗެމްޕިއަންޝިޕް ފުޓްބޯޅަ މުބާރާތުގައި ވަނީ މި ދެ ސިޑިބަރި ބޭނުންކޮށްފައެވެ. ސިޑިބަރިތައް ބޭނުންކޮށްފައިވަނީ ކުދިކުދި މަރާމާތުކޮށް އަދި ސިޑިބަރިތަކުގެ ދަށުގައި ޖުންކު ވިއްދުމަށް ފަހުއެެވެ.
ރަސްމީ ފުޓްބޯޅަ ދަނޑުގައި ބޮޑު މަރާމާތެއް އެންމެ ފަހުން ކޮށްފައިވަނީ 2014 ވަނަ އަހަރުގެ އޭއެފްސީ ޗެލެންޖް ކަޕަށެވެ. އެފަހަރު 80 ވަރަކަށް މިލިއަން ރުފިޔާ ހަރަދުކޮށްގެން ދަނޑުގެ ރޮސްޓްރަމް މަތީގައި މީޑިއާ އާއި ވީއައިޕީ އަށް ހާއްސަކޮށް އިމާރާތެއް ހެދިއެވެ. އޭގެ ފަހުން މިދިޔަ މަހު ބޭއްވި ސާފް ޗެމްޕިއަންޝިޕަށް ކުދިކުދި މަރާމާތުތަކެއް ދަނޑުގައި ވަނީ ކޮށްފައެވެ.
