އެންމެ ފަހުގެ ޗެމްޕިއަން ސިޓީ ކަޓުވާލުމަށްފަހު ވެސްޓް ހޭމް ކުއާޓާ ފައިނަލަށް

އިނގިރޭސި ލީގު ކަޕްގެ އެންމެ ފަހުގެ ޗެމްޕިއަން މެންޗެސްޓަރ ސިޓީ ކަޓުވާލުމަށްފަހު ވެސްޓް ހޭމް ޔުނައިޓެޑް މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.

މުބާރާތުގެ ހަތަރު ވަނަ ބުރުގައި ރޭ ވެސްޓް ހޭމް ޔުނައިޓެޑް އަތުން ޗެންޕިއަން ސިޓީ ބަލިވީ ޕެނަލްޓީ ޖަހައިގެން 3-5 ގެ ނަތީޖާއަކުންނެވެ. މި މެޗުގެ ފުރިހަމަ ވަގުތު ހަމަވިއިރު ދެ ޓީމުން ކުރެ އެއްވެސް ޓީމަކަށް ލަނޑެއް ނުޖެހުމުން ނަތީޖާ ނެރުމަށް ޖެހުނީ ޕެނަލްޓީ ޖަހާށެވެ.

ޕެނަލްޓީ ޝޫޓްއައުޓްގައި ވެސްޓް ހޭމް ޔުނައިޓެޑުން ޖެހި ފަސް ޕެނަލްޓީ ވެސް ވަނީ ކާމިޔާބުކޮށްފައެވެ. ސިޓީން ޖެހި ޕެނަލްޓީގެ ތެރެއިން ނާކާމިޔާބުވީ، ފިލް ފޮޑެން ޖެހި ޕެނަލްޓީއެވެ.

ވެސްޓް ހޭމް އަތުން ބަލިވެ، ލީގު ކަޕުން ސިޓީ ކަޓާފައިވާއިރު، މިއީ މި މުބާރާތުގެ ނޮކްއައުޓް މެޗަކުން ސިޓީ ބަލި މިވީ ފަސް އަހަރު ތެރޭ ފުރަތަމަ ފަހަރަށެވެ. ވެސްޓް ހޭމް އިން މި ވަނީ މި ފަހަރުގެ ލީގު ކަޕްގައި މެންޗެސްޓާ ޔުނައިޓެޑާއި ސިޓީ ވެސް ކަޓުވާލައިފަ އެވެ.

ސިޓީ އަކީ އެންމެ ފަހުން ހަ އަހަރުގެ ތެރޭ ލީގު ކަޕްގެ ތަށި ފަސް ފަހަރު އުފުލާލި ޓީމުކަންވެސް ފާހަގަކޮށްލެވެއެވެ.

މި މެޗުގެ އިތުރުން ލީގު ކަޕްގައި ރޭ ލިވަޕޫލުން ވަނީ ޕްރެސްޓަން ނޯތު އެންޑް ބަލިކޮށް ލީގު ކަޕުގެ ކުއާޓާ ފައިނަލުން ޖާގައެއް ކަށަވަރުކޮށްފައެވެ.

ޕްރެސްޓަންގެ ދަނޑުގައި ކުޅުނު މި މެޗު ލިވަޕޫލުން ކާމިޔާބުކުރީ 0-2 ގެ ނަތީޖާއަކުންނެވެ.

މި މެޗުގައި ލިވަޕޫލުން ޖެހި ދެ ލަނޑުވެސް ކާމިޔާބުކޮށްފައިވަނީ މެޗުގެ ދެވަނަ ހާފުގައެވެ. މި ދެ ލަނޑު ލިވަޕޫލަށް ކާމިޔާބުކޮށްދިނީ، ޓަކޫމީ މިނަމީނޯ އަދި ޑިވޮކް އޮރިގީއެވެ.

މި މުބާރާތުގެ ކުއާޓާގެ މެޗުތައް ކުޅުމަށް ތާވަލުކޮށްފައިވަނީ އަންނަ ޑިސެމްބަރު މަހުގެ ތެރޭގައެވެ.