ރައީސް އިބުރާހިމް މުހައްމަދު ސާލިހުގެ ވެރިކަމަށް ވަޑައިގެންނެވީ ކޯލިޝަންއަކާ އެކީ ވެރިކަން ކުރައްވާނޭ ކަމުގެ ވައުދުތަކާ އެކީއެވެ. އަދި ހަމަ އެއާއެކީ، ކޯލިޝަންގައި ހިމެނޭ ހުރިހާ ޕާޓީތަކެއް އެކުލެވޭ ގޮތުން މެނިފެސްޓޯއެއް އެކުލަވާލައްވާ، މެނިފެސްޓޯ ތަންފީޒުކޮށް، ތަރައްގީގެވެސް ބޮޑެތި ވައުދުތަކާ އެކީވެސްމެއެވެ.
މިގޮތުން 2018 ވަނަ އަހަރު ނޮވެމްބަރުމަހު ވެރިކަމުގެ ހުވާ ކުރެއްވުމަށްފަހު، ސަރުކާރުގެ އާ ކެބިނެޓާއެކީ ހަލުއިކަމާއެކު ތަރައްގީގެ މަސައްކަތް ފެއްޓެވި ނަމަވެސް، ވެރިކަމުގެ ފުރަތަމަ ހާފްގައި އަހަރެއްހާ ދުވަސް ފާއިތުވެގެން ދިޔަތަނާ ކަހަލަ ގޮތަކަށް މުޅި ދުނިޔެއަށް ކުރިމަތިވެގެންދިޔަ ކޯވިޑްގެ އާލަމީ ވަބާއާއި މިސަރުކާރާށްވެސް ކުރިމަތި ލާންޖެހި، ތަރައްގީގެ މަސައްތަކުގެ އިތުރުން، ގައުމު އިގްތިސާދީ ހާލަތަށްވެސް ބޮޑެތި ގޮންޖެހުންތަކާ ކުރިމަތިލާން ޖެހުނެވެ.
މިގޮތުން ކޯވިޑްގެ އާލަމީ ވަބާއާއި ހަގުރާމަ ކުރުމުގައި ސަރުކާރަށް ދޮޅު އަހަރެއްހާ ދުވަސް ގެއްލިގެން ދިޔަ ކަމުގައި ސަރުކާރުން ފާހަގަ ކުރަމުން ދިޔަނަމަވެސް، އަދި އެކަމުގައި ހަގީގަތްތަކެއް އެކުލެވިގެން ދިޔަ ނަމަވެސް، ފާހަގަ ކުރަންޖެހޭ އެންމެ މުހިންމު ނުކުތާއަކީ، ތަރައްގީގެ މަޝްރޫއުތައް ހިންގުމުގައި މި ސަރުކާރަށްވެސް ލިބިގެން ދާނީ ހަމަ 5 އަހަރުގެ ދައުރެއްކަމެވެ. އަދި މި މުއްދަތުގެ ތެރޭގައި ކޯވިޑް މެނޭޖްކޮށް، އަދި ތަރައްގީގެ ގެނެސް، ދައުރު ނިމިގެން ދާއިރު، ތަފާތު ނުދެއްކިއްޖެ ނަމަ، ސަރުކާރުގެ ކާމިޔާބީއާއި ނާކާމިޔާބީ ވަޒަން ކުރުމުގައި، ފާއިތުވެދިޔަ ތަނުގައި ކުރިމަތިވެދިޔަ ގިނަ ގޮންޖެހުންތަކުގެ މަތިން ރައްޔިތުން ހަދާން ނައްތާލުމަކީ ކައިރިކަމެއް ކަމީވެސް، މާޒީގެ ތަޖުރިބާ ތަކަށް ބަލާ، މިއަދު ގަބޫލުކުރަން ޖެހޭ ވަރަށް ބޮޑު ހަގީގަތެކެވެ.
އަދި ހަމަ އެފަދައިން، ތަރައްގީގެ ކުދި ކުދި މަޝްރޫއުތަކުގެ ގޮތުގައި ހިގަމުންދާ، ބަދަރުތައް ހެދުމާއި، ތޮށިތައް ލުމާއި އަދި ފެނާ ނަރުދަމާ ފަދަ މަޝްރޫއުތައް ރަށްރަށުގައި ހުއްޓުމެއް ނެތި ކުރިޔަށް ދިޔަ ނަމަވެސް، ކޮންމެ ސަރުކާރަކުންވެސް، ތަފާތު ދައްކާފައިވަނީ، ދައުރުގެ ތެރޭގައި ކުރިޔަށް ގެންގޮސްފައިވާ ބޮޑެތި "މެގަ" ޕްރޮޖެކްޓް ތަކުންނެވެ.
ކުރީ ސަރުކާރަށް ބަލާއިރު، އެސަރުކާރުން އެޅި ބުރިޖް، ދަރުމަވަންތަ ހޮސްޕިޓަލްގެ 25 ބުރީގެ ޓަވަރު، ހުޅުމާލޭގެ ހިޔާ މަޝްރޫއުގެ 16 ޓަވަރުތައް ފަދަ، ލޮލަށް ތާއަބަދަށް ފެންނާން ހުންނާނޭ ގޮތަށް ކުރެވިގެން ގޮސްފައިހުރި ތަރައްގީގެ މަސައްކަތްތައް، ވެގެން ގޮސްފައިވަނީ އެސަރުކާރެ ލެގަސީތައް ކަމުގައެވެ.
ބުރިޖް، ޓްރާންސިޕްމަންޓް ބަދަރު، ހައުސިން މަޝްރޫޢު، މިސަރުކާރުގެ ބަލި ފަޔަކަށް ވެދާނެ!
ރައީސް ޔާމިންގެ ސަރުކާރުގައި ކުރިޔަށް ގެންދިޔަ، މަދު، އެހެންނަމަވެސް ބިޔަ ބޮޑެތި ބައެއް މަޝްރޫޢުތަކުން، ތަރައްގީގެ ލެގަސީއެއް އެސަރުކާރުން ވަނީ ގާއިމް ކޮށްފައެވެ. އެއީ، ދައުރުގެ ތެރޭގައި ބުރިޖް މަޝްރޫޢު ނިންމާ، ބުރިޖް ހުޅުވާ، އަދި އޭގެ އިތުރުން މިހާތަނަށް ރާއްޖޭގައި ހެދުނު އެންމެ އުސް އިމާރާތުގެ ގޮތުގައި، ދަރުމަވަންތަ ހޮސްޕިޓަލްގެ އިމާރާތްވެސް ނިންމާ، އަދި ހަމަ އެއާއެކު، ހުޅުމާލޭގެ ހިޔާ މަޝްރޫއުގެވެސް އިމާރާތްކުރުމުގެ މައިގަޑު ހުރިހާ މަސައްކަތެއް ދައުރުގެ ތެރޭގައި ނިންމާލެވުމެވެ.
މިއީ، މިސަރުކާރުންވެސް ރަށްރަށުގައި ކުރިޔަށް ގެންދާ ތަރައްގީގެ މަޝްރޫއުތައް ފަދައިން، އެސަރުކާރުންވެސް ރަށްރަށުގައި ކުރިޔަށް ގެންދިޔަ ތަރައްގީގެ ކުދިކުދި މަޝްރޫއުތަކުގެ އިތުރަށް އެ ސަރުކާރުން ކުރިޔަށް ގެންގޮސްފައިވާ ބޮޑެތި ބިޔަ މަޝްރޫޢުތަކެވެ.
މިގޮތުން ފާހަގަވާން އޮތް ކަމަކީ، ރައީސް ޔާމިންގެ ސަރުކާރެކޭ އެއްފަދައިން، މިސަރުކާރުންވެސް ތަރައްގީގެ ބޮޑެތި ބައެއް މަޝްރޫޢުތައް މެނިފެސްޓޯގަ ހިމަނާ އިއުލާންވެސް ކޮށްފައި ވާކަމެވެ. މިގޮތުން، ވިލިގިލި ހުރަސްކޮށް، މާލެއާއި ތިލަފުއްޓާ ދެމެދު އެޅުމަށް ހަމަޖެހިފައިވާ ބުރިޖް މަޝްރޫއާއި، ގުޅިފަޅަށް މާލޭ ޕޯޓް ބަދަލުކުރުމުގެ ބިޔަ މަޝްރޫއާއި، ހުޅު މާލޭގައި ކުރިޔަށް ދާކަމަށް ސަރުކަރުން ބުނަމުންދާ 6،000 ހައުސިންގ ޔުނިޓްގެ މަޝްރޫޢު ފަދަ ބައެއް މަޝްރޫއުތައް ފާއިތު ވެދިޔަ ދެ އަހަރު ތެރޭގައިވެސް ރައީސް ސާލިހުގެ ރިޔާސީ ބަޔާނުގައި ހިމަނުއްވައިގެން ވަނީ އިއުލާން ކުރައްވާފައެވެ.
މިގޮތުން ބަލާއިރު، މާލޭ ޕޯޓު ގުޅީފަޅަށް ބަދަލު ކުރުމަށްޓަކާ، ގުޅީފަޅު ހިއްކުމުގެ މަސައްކަތް މީގެ 9 މަސްކުރިން ސަރުކާރުން ފައްޓާފައިވެއެވެ. އަދި މި މަސައްކަތުގެ ފުރަތަމަ ފިޔަވަކި މިއަރުގެ ޖެނުއަރީމަހު ނިންމާލެވި، ބަދަރު ހެދުމުމުގެ މަސައްކަތް މިއަރުގެ ފަހުކޮޅު ފެށިގެންދާނެ ކަމަށް މީގެ ކުރިން ސަރުކަރުން ބުނެފައިވެއެވެ. އަދި ސަރުކާރުގެ އަމާޒަކީ 2023އަށް މިމަސައްކަތް ނިންމާލުމެވެ. އެހެންނަމަވެސް ސަރުކާރުގެ ތަރައްގީގެ މަސައްކަތުގެ ތާވަލުގައި ހިމެނޭ މިމުހިންމު މަސައްކަތަށް އަމަލީ ސިފަ އަންނަމުން ދާތަން އަދި ފެންނަމުންނެއް ނުދެއެވެ.
ހަމައެއާއެކު ފާހަގަވާން އޮތް އަނެއް ބިޔަ މަޝްރޫޢަކީ، ސަރުކާރުން މިހާރު އެއްބަސްވުމުގައި ސޮއި ކޮށްފައިވާ ބްރިޖް މަޝްރޫއެވެ. މި ސަރުކާރުން ކުރިޔަށް ގެންދާކަމަށް ބުނާ ތަރައްގީގެ އެންމެ ބިޔަ މަޝްރޫޢު އިންޑިއާ ކުންފުނަނަކަށް އެވާޑް ކުރެވިފައި ވާތާ 3 މަސްދުވަސް ފާއިތުވެގެން ދިޔައީއެވެ. އަމަލީ މަސައްކަތުގެ އެއްވެސް ނިޝާނެއް އަދި ފެންނާކަށް ނެތެވެ. ނަތީޖާއެއްގެ ގޮތުން، ރައީސް ޔާމިންގެ ވެރިކަމުގައި އަޅާ ނިންމާ، އެ ސަރުކާރުން ވައުދުވީ ގޮތަށް، ދައުރު ނިމުމުގެ ކުރިން ބުރިޖް މަތިން ދުއްވާލުމުގެ ފުރުސަތު ފަހިވެގެން ދިޔަ މަންޒަރު، ތަފާތެއްގެ ގޮތުގައި މާޒީގެ ސަފުހާތަކުން ފެންނާން އެބަ އޮތެވެ. އެހެންނަމަވެސް، 2021 ނިމި، 2022 އަށް އަލިވިލުމަށް ތައްޔާރު ވަމުންދާއިރު، ބްރިޖްގެ މަޝްރޫއަށް އަމަލީ ސިފައެއް ގެނެވިދާނެ ކަމާމެދު އާންމުންގެ ހިތްތަކުގައި އުފެދިފައިވާ ޝައްކުތަކަށް ތަސައްލީއެއް ލިބޭނޭ ވަރުގެ ތަފާތެއް އަދި ފެންނާން ނެތްކަމުގައި ދަންނަވަން ޖެހެއެވެ.
ދުވެލި ބާރު ކޮށްގެން މެނުވީ ސަލާމަތެއް ނެތް!
ކޮންމެއަކަށް، މިސަރުކާރުން ހުޅުމާލޭގައި ކުރިޔަށް ދާކަމަށް ބުނާ 6،000 ހައުސިންގ ޔުނިޓްތަކުގެ މަސައްކަތް ކުރިޔަށް ދާކަމަށް ހައުސިން މިނިސްޓަރު ވިދާޅުވުމުން، ބައެއް ފަރާތްތަކަށް އެކަން ޖޯކަކަށް ވެގެންދަނީ ސަބަބުތަކެއް ހުރެގެން ކަމުގައި މިއަދު ގަބޫލުކުރަން އެބަ ޖެހެއެވެ. އެއީ، އެފަދަ ބިޔަ ބޮޑު މަޝްރޫޢަކުން އިމާރާތް ކުރަމުންދާ އެތައް ހާސް ފްލެޓްތަކެއް ހިމެނޭ އިމާރާތް ނުވަތަ ޓަވަރުތަކެއް، އާންމުންނަށް ފެންނާނޭ މިންވަރަކަށް އަދި އިމާރާތް ކުރެވިފައި ނެތުމުންކަމަށް ވެދާނެއެވެ. އެހެންކަމަށް ވާނަމަ، މި ފަދަ ބިޔަ މަޝްރޫއެއް ކުރިޔަށް ދިއުމުގައި އާދަޔާ ޚިލާފު ލަސްކަމެއް ހުރި ކަމުގައި ގަބޫލުކުރަން ޖެހެއެވެ. ނުވަތަ މިއީ ހަގީގަތުގައިވެސް ކުރިޔަށްދާ މަޝްރޫއު ތަކެއްކަން އެގޭވަރު ވާން އެބަޖެހެއެވެ.
ރަށްރަށުގައި ކުރިޔަށްދާ ތަރައްގީގެ މަސައްކަތްތަކަކީ، ހުރިހާ ސަރުކާރަކުންވެސް ކުރިޔަށް ގެންދާ މަސައްކަތްތަކަކަށް ވާތީ، މިއީ އެއްވެސް ސަރުކާރަކަށް ތަފާތު ދެއްކެން އޮތް މަޝްރޫޢުތަކަކަށް ވެގެން ނުދާނެއެވެ. އޭގެ ބަދަލުގައި، ތަރައްގީގެ ރޮގުން ތަފާތު ދެއްކެން އޮންނާނީ، ގައުމީ ތަރައްގީއާއި ގުޅުންހުރި، ބިޔަ ބޮޑެތި މަޝްރޫއުތަކުންނެވެ. އެއީ މިސަރުކާރުން ނަމަ، މިސަރުކާރުން އިއުލާން ކޮށްފައިވާ ބުރިޖް މަޝްރޫއެވެ. ޕޯޓުގެ މަޝްރޫޢެވެ. ހައުސިން މަޝްރޫއުތަކެވެ. އަދި މިނޫނަސް ތަރައްގީއާއި ގުޅުންހުރި، މިފަދަ އެހެން މަޝްރޫއުތަކެއް ވާނަމަ އެ މަޝްރޫއުތަކެވެ.
އެހެންނަމަވެސް، ފެންނާން އޮތް މަންޒަރަކީ، ދައުލަތުގެ ވަޒީރުންނާއި އަދި އެކިއެކި މުވައްސަސާތަކުގެ އިސްވެރިން، މި މަޝްރޫއުތައް 2023 އަށް ނިމޭނެ ކަމަަށް ވިދާޅުވެ ދައްކަވަމުން ގެންދަވާ ވާހަކަތަކާއި ވެވަޑައިގަންނަވަމުން ގެންދަވާ ވައުދުތަކެވެ. މަގުސަދަކީ، މިވާހަކަތަކުން ރައީސް ސާލިހުގެ ހިތްޕުޅަށް ތަސައްލީއެއް ހޯއްދަވާ ދެއްވުން ކަމުގައި ވެދާނެއެވެ. އެހެންނަމަވެސް ފެންނާން އޮތް މަންޒަރަކީ، އަމަލީ މަސައްކަތް ކުރިޔަށް ނުދާތަނެވެ.
2023އާއި ބައްދަލު ވާން ދެން އޮތީ އެންމެ އަހަރެކެވެ. ތަފާތު ނުދެއްކެވިއްޖެ ނަމަ ޒިންމާ އުފުއްލަވަން ހުންނަވާނީ ރައީސް ސާލިހެވެ. މިއީ މިއަދު ފުންކޮށް ނުވިސްނަވައިފިނަމަ، ނުވަތަ އަވަސް ފިޔަވަޅުތަކެއް ނާޅުއްވައިިނަމަ ވަގުތު ފާއިތުވުން ވަރަށް ކައިރީގައި އޮތް ދުވަހެއްކަމީ ކަށަވަރުވެ ޔަގީންވާ ކަމެކެވެ.
