ޗެލްސީ އާއި އާސެނަލް ލީގު ކަޕްގެ ކުއާޓާ ފައިނަލަށް

އިނގިރޭސި ލީގު ކަޕުގެ ހަތަރު ވަނަ ބުރުގައި ރޭ ކުޅުނު މެޗުތަކުން މޮޅުވެ މުބާރާތުގެ ކުއާޓާ ފައިނަލަށް ޗެލްސީ އާއި އާސެނަލް ދަތުރުކޮށްފިއެވެ.

މުބާރާތުގެ ކުއާޓާ ފައިނަލުން ޗެލްސީ ޖާގަ ހޯދީ ހަތަރު ވަނަ ބުރުގައި ސައުތެމްޓަނާއި ވާދަކޮށް ޕެނަލްޓީ ޖަހައިގެން 3-4 ގެ ނަތީޖާއަކުން ކުރި ހޯދައިގެންނެވެ. އަދި އާސެނަލް ކުއާޓާ ފައިނަލުން ޖާގައެއް ކަށަވަރުކުރީ، ލީޑްސް ޔުނައިޓެޑްގެ މައްޗަށް 0-2 ގެ ނަތީޖާއަކުން ކުރިހޯދައިގެންނެވެ

އިނގިރޭސި ލީގު ކަޕްގެ ހަތަރު ވަނަ ބުރުގައި ރޭ ޗެލްސީ އާއި ސައުތެމްޓަން ބައްދަލުކުރި މެޗުގައި ފުރަތަމަ ލަނޑު ޖަހާ ލީޑު ނެގީ ޗެލްސީންނެވެ. މި ލަނޑު ފުރަތަމަ ހާފް ނިމެން މިނެޓަކަށް ވެފައިވަނިކޮށް އެޓީމަށް ކާމިޔާބުކޮށްދިނީ، ކައި ހަވާޓްޒްއެވެ. ނަމަވެސް ދެވަނަ ހާފް ފަށައިގެން މާ ގިނައިރުތަކެއް ނުވަނީސް ސައުތެމްޓަނުން ވަނީ ލަނޑެެއް ޖަހާ މެޗުގެ ނަތީޖާ ހަމަހަމަކޮށްފައެވެ. މެޗުގެ 47 ވަނަ މިނެޓުގައި މި ލަނޑު ސައުތެމްޓަނަށް ކާމިިޔާބުކޮށްދިނީ،  ޗޭ އެޑަމްސްއެވެ.

މެޗުގެ ފުރިހަމަ ވަގުތު ހަމަވިއިރު، 1-1 ގެ ނަތީޖާއަކުން ދެ ޓީމު އެއްވަރުވެފައި އޮތުމުގެ ސަބަބުން ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ. އެގޮތުން ޕެނަލްޓީގައި ސައުތެމްޓަންގެ މައްޗަށް ޗެލްސީ ކުރިހޯދީ 3-4 ގެ ނަތީޖާއަކުންނެވެ.

އިނގިރޭސި ލީގު ކަޕްގެ ހަތަރު ވަނަ ބުރުގައި ރޭ އަމިއްލަ ދަނޑުގައި އާސެނަލް އާއި ލީޑްސް ޔުނައިޓެޑް ބައްދަލުކުރި މެޗު އާސެނަލްއިން ކާމިޔާބުކުރީ، 0-2 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވޭގޮތްވަނީ ނުވެފައެވެ. ނަމަވެސް ދެވަނަ ހާފް ފަށައިގެން 10 ވަނަ މިނެޓުގައި އާސެނަލުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކަލުމް ޗެމްބާސްއެވެ. މި މެޗުގައި އާސެނަލުން ލީޑު ފުޅާކޮށްފައިވަނީ މެޗުގެ 69 ވަނަ މިނެޓުގައެވެ.  މި ލަނޑު ކާމިޔާބުކޮށްދިނީ އެޑީ އެންކެޓިއޭއެވެ.

މި މުބާރާތުގެ ކުއާޓާގެ މެޗުތައް ކުޅުމަށް ތާވަލުކޮށްފައިވަނީ މި އަހަރުގެ ޑިސެމްބަރު މަހުގެ ތެރޭގައެވެ.