ފާޑުކިޔުން އަމާޒުވި ކަނޑު އުޅަނދު ފަހަރުގެ ސަލާމަތާބެހޭ ޤަވާއިދު ގެޒެޓްކޮށްފި

ދިވެހިރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާބެހޭ ޤަވާއިދަށް އިސްލާހު ގެނެސް މިއަދު ގެޒެޓްކޮށްފިއެވެ.

ޓްރާސްޕޯޓް މިނިސްޓްރީން ގަވާދަށް ގެނެސްފައިވާ އިސްލާހުތައް އަންނަ އަހަރުގެ ޖެނުއަރީ މަހުގެ 16 ވަނަ ދުވަހުގެ ކުރިން ފުރިހަމަ ކުރުމަށް ކަނޑު ދަތުރުކުރާ ފަރާތްތަކަށް ވަނީ އަންގާފައެވެ.

އެގޮތުން މައިގަނޑު 11 ކަމެއް ވަނީ ހިމަނާފައެވެ.

1. ޤަވާއިދުގެ 13 ވަނަ މާއްދާ "ހ" ގެ ދަށުން އޮންނަންޖެހޭ "އޮއިލް ޕޮލިއުޝަން އެންޑް ޕްރިވެންޝަން ސެޓްފިކެޓް" ހެއްދުން

2. ޤަވާއިދުގެ 14 ވަނަ މާއްދާގެ ދަށުން އޮންނަންޖެހޭ "ނުރައްކާތެރި މުދަލާއި ފަސޭހައިން އަލިފާން ހިފާ މުދާ އުފުލުމާއި ބެހޭ ސެޓްފިކެޓް" ހެއްދުން

3. ޤަވާއިދުގެ 16 ވަނަ މާއްދާގެ ދަށުން އޮންނަންޖެހޭ "ސުވޭޖް ސެޓްފިކެޓް" ހެއްދުން

4. ޤަވާއިދުގެ 19 ވަނަ މާއްދާ "ރ،ބ،އަދި ޅި" ގެދަށުން ޖަދުވަލު 5 ގައި ބަޔާން ކުރާގޮތަށް "އުޅަނދުފަހަރު މަރާމާތު ކުރުމަށް އެހެލުމަށްފަހު ދޫކުރާ ލިޔުން" ނެގުން

5. ޤަވާއިދުގެ 24 ވަނަ މާއްދާ "ހ" ގެ 1،2،3،4,5 ގައި ބުނާ ކެޕްޓަނުންނާއި،ފަޅުވެރިން އަދި މެރިން މެކޭނިކުންގެ ގެ އަތުގައި މޯލްޑިވްސް ޓްރާންސްޕޯޓް އޮތޯރިޓީއިން ޤަބޫލު ކުރާ ލައިސަންސް އަދި ސަނަދުތައް އޮތުން

6. ޤަވާއިދުގެ 29 ވަނަ މާއްދާ "ހ" ގައި ބުނާ ބޮޔަންޓް އެޕަރޭޓަސް ހުރުން

7. ޤަވާއިދުގެ 32 ވަނަ މާއްދާ "ނ" ގައި ބުނާ ވެސެލް ޓްރެކިންގ ޑިވައިސް ހަރުކުރުން

8. ޤަވާއިދުގެ 38 ވަނަ މާއްދާގައި ވާގޮތަށް އުޅަނދުގެ މެނިފެސްޓް އެނގެން އޮތުން

9. މި ޤަވާއިދުގެ ޖަދުވަލު 2 ގެ 68 އިން 72 އަށް ކެޓަގަރީގައި ބަޔާންކުރާ ކެޕްޓަނާއި ފަޅުވެރިންގެ މެޑިކަލް އަދި ވަޒީފާގެ އެއްބަސްވުން ހުށަހެޅުން

10. މި ޤަވާއިދުގެ ޖަދުވަލު 9 ގައި ބަޔާންކޮށްފައިވާ ގޮތަށް މުއާސަލާތީ އާލާތްތައް ހުރުން

11. މި ޤަވާއިދުގެ ޖަދުވަލު 7 ގައި ބަޔާންކޮށްފައިވާ މިންގަޑުތަކާއި އެއްގޮތަށް ލައިފް ޖެކެޓް އަދި ލައިފް ބޮއި ހުރުން

ޓްރާސްޕޯޓް މިނިސްޓްރީން ބުނެފައިވަނީ މަތީގައި ބަޔާންކޮށްފައިވާ ކަންތައްތައް ފުރިހަމަ ކޮށްފައިނުވާނަމަ އުޅަނދަށް ދޫކޮށްފައިވާ ސީވާދިނަސް ސެޓްފިކެޓް ބާތިލް ކުރެވޭނެކަމަށެވެ. ރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާބެހޭ ގަވާއިދަށް އިސްލާހު ގެނެސްފައި މިވަނީ އިސްލާހު ގެންނަން ހުށަހެޅިތާ ދެ އަހަރު ފަހުންނެވެ.

ކަނޑުމަތީގައި ފާއިތުވެދިޔަ 4 ވަރަކަށް ދުވަހުގެ ތެރޭގައި ނުރައްކާތެރި ގިނަ ހާދިސާތަކެއް ވަނީ ހިނގާފައެވެ. މިހާދިސާތަކުގެ ތެރެއިން އެއް ހާދިސާގައި އަންހެނަކު ނިޔާވެ، އޭނާގެ ދަރިފުޅު ވަނީ ކަނޑަށް ގެއްލިފައެވެ.