އިންޑިއާގެ ޓެމިލްނާޑުގެ ރެފިއުޖީ ކޭމްޕްތަކުން ފިލައިގެން، ރާއްޖޭގެ ކަނޑުގެ ސަރަހައްދަށް ވަދެ އުޅުނު ސްރީލަންކާގެ ރެފިއުޖީންގެ ބަޔަކު ރާއްޖޭގެ ސަރުކާރާ ހަވާލުކޮށްފިއެވެ.
އިންޑިއާގެ ނޫހެއް ކަމަށްވާ ޓައިމްސް އޮފް އިންޑިއާ ގައި ރިޕޯޓް ކޮށްފައިވާ ގޮތުގައި ލަންކާގެ ތަމަޅައިންގެ 85 މީހަކު އެމެރިކާގެ ސިފައިން އަތުލައިގެންފައިވާ ކަމަށެވެ. އެ މީހުންގެ ތެރޭގައި 59 ރެފިއުޖީއަކު ވެސް ހިމެނޭ ކަމަށެވެ. މި މީހުންނަކީ މަދުރާއީ އާއި ޓްރިޗީގެ ރެފިއުޖީ ކޭމްޕްތަކަކުން ފިލައިގެން ދިޔަ ބަޔަކު ކަމަށް ބެލެވޭ ކަމަށް ވެސް ރިޕޯޓް ކޮށްފައި ވެއެވެ.
ޓެމިލްނާޑުގެ ފުލުހުން ބުނީ އެ މީހުން މަސައްކަތްކުރީ ކެރެލާއިން ސައުތް އެފްރިކާއާ ދިމާލަށް ދަތުރުކޮށް ކެނެޑާއަށް އެތެރެވެ، އެ ގައުމުން ހިމާޔަތް ހޯދަންށެވެ. ނަމަވެސް މޫސުން ގޯސްވުމުގެ ސަބަބުން ރާއްޖެއާ މޮރީޝަސްއާ ދެމެދަށް އިންޑިއާ ކަނޑަށް ފެރީ ހުއްޓުނެވެ. އެ މީހުން ސަލާމަތްކުރީ ޑިއަގޯ ގާސިޔާގައި ހަރަކާތްތެރިވާ އެމެރިކާ ސިފައިންނެވެ.
އޭގެ ތެރެއިން ގިނަ މީހުންގެ އަތުގައި ސައްހަ ޕާސްޕޯޓްވެސް ނެތް ކަމަށް ރާއްޖޭގެ އޮފިޝަލުންނާ ހަވާލާދީ އިންޑިއާގެ ނޫސްތަކުން ވަނީ ރިޕޯޓްކޮށްފައެވެ. އަތުލައިގަނެވުނު މީހުންގެ މައުލޫމާތު ދިވެހި ސަރުކާރުން، ޓެމިލްނާޑުގެ ކަމާ ބެހޭ ފަރާތްތަކާއި އަދި ލަންކާގެ ސަރުކާރާ މިހާރު ވަނީ ހިއްސާކޮށްފައެވެ. އެމެރިކާ ފުލުހުން އަތުލައިގަތް މީހުންގެ އަތުގައި ކާކުކަން ދެނެގަނެވޭ ފަދަ އެއްވެސް ލިޔުމެއް ނެތް މީހުން ވެސް ހިމެނޭ ކަމަށް ރާއްޖޭގެ ފުލުހުންނާ ހަވާލާދީ ބުނެފައި ވެއެވެ. މިކަމާއި ގުޅިގެން ދިވެހި ފުލުހުން އަދި އެއްވެސް އެއްޗެއް ބުނެފައި ނުވެއެވެ.
