ރާއްޖޭގެ ސަލާމަތީ ބާރުތަކުން ބަލަހައްޓަންޖެހޭ ކަންކަމާއި، ސިއްރު މައުލޫމާތުތައް ބަލަހައްޓަމުންދަނީ އަވަށްޓެރި އިންޑިއާއިންކަމަށް އިދިކޮޅު ޕްރޮގްރެސިވް ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
މިނިވަންކަމުގެ ދިފާއުގައި އިދިކޮޅު ކޯލިޝަނުން މިރޭ ބާއްވާ ޖަލްސާގައި ވާހަކަ ދައްކަވަމުން އަދުރޭ ވިދާޅުވީ، މިސަރުކާރުން ވެރިކަމާއި ހަވާޅުވެ މިވީ މުއްދަތުގެ ތެރޭގައި ސަރުކާރުގެ އިހުލާސްތެރިކަމުގެ ޒައްރެއްގެ މިންވަރުވެސް ނުފެންނަ ކަމަށެވެ. ފެނިގެންދަނީ އަވަށްޓެރި އިންޑިއާގެ މުށުތެރެއަށް ރާއްޖޭގެ ހުރިހާ ބާރެއް ގޮސް މިނިވަންކަން ނުރައްކަލަކަށް ވެއްޓޭތަން ކަމަށެވެ.
ރާއްޖޭގެ ޤައުމީ ސަލާމަތީ ބާރުތަކުގެ ތެރެއިން ސިފައިންނާއި، ފުލުހުން ބަލަހައްޓަންޖެހޭ ސިއްރު މައުލޫމާތުތަކާއި، ރާއްޖޭގެ ކަނޑުގެ ސަރަހައްދާއި، ވައިގެ ސަރަހައްދުގެ ހުރިހާ ސިއްރު މައުލޫމާތެއް މިހާރު ބަލަހައްޓަމުންދަނީ އިންޑިއާއިންކަމަށް އަދުރޭ ވިދާޅުވިއެވެ. މިއަދު ރާއްޖޭގެ ސަލާމަތީ ބާރުތަކުގެ ހުރިހާ ކޮންޓްރޯލެއް އޮތީ އިންޑިއާގެ އަތުގައިކަމަށް އޭނާ ވިދާޅުވިއެވެ. މިކަންކަމަކީ މިހާރުވެސް ހިނގަމުންދާ ކަންތައްތަކެއް ކަމަށާއި، މިކަމަކީ ސިއްރުކުރެވެން އޮތްކަމެެއް ނޫންކަން ރާއްޖޭގެ ހުރިހާ ހިސާބަކަށް ބަލައިލުމުންވެސް ފެންނާނެކަމަށް އަބްދުއްރަހީމް ވިދާޅުވިއެވެ.
އޭނާ ވިދާޅުވީ ރާއްޖޭ އިތުރާއި ދެކުނާއި، މެދު ރާއްޖެ ތެރޭގައިވެސް ބަރު ހަތިޔާރާއިއެކު އިންޑިއާ ސިފައިން ތިބިކަމީ ދިވެހި ރައްޔިތުން ނުހަނު ކަންބޮޑުވާ ކަމެއްކަމަށެވެ. ދުނިޔޭގެ އެއްވެސް ޤައުމަކުން މިނިވަންކަން އޮތް ޤައުމެއްގެ ރައްޔިޔުން ދިރިއުޅޭ ސަރަހައްދުގައި ހަތިޔާރާއިއެކު އުޅޭ ޤައުމެއް ރާއްޖެ ނޫނީ ނެތްކަމަށެވެ. މިއަދު ރާއްޖޭގެ ރައްޔިތުން ދިރިއުޅޭ ރަށްތަކުގައި އިންޑިއާ ސިފައިން ހަތިޔާރާއިއެކު ތިބިކަމީ ދިވެހިންގެ މިނިވަންކަމާއިމެދު އެތައް ސުވާލެއް އުފެދޭ ކަމެއްކަމަށެވެ.
އަޅުގަނޑު ވަރަށް އިހުލާސްތެރިކަމާއިއެކު އިންޑިއާއަށް މިގޮވާލަނީ މިޤައުމުގައި ތިބި އިންޑިއާ ސިފައިން މިވަގުތުން މިވަގުތަށް މިފަސްގަނޑުން ބާލަން. މިއީ މިނިވަން ދައުލަތެއް. މިޤައުމުގެ މިނިވަންކަމަށް ބުރޫއަރާނެ ކަމަކަށް އިންޑިއާއިން ޖާގަދޭން ބޭނުން ނުވާނަމަ މިވަގުން ވަގުތަށްވެސް އިންޑިއާ ސިފައިން ފައިބާންޖެހޭ.
– އަދުރޭ ވިދާޅުވިއެވެ.
އަބްދުއްރަހީމް ވިދާޅުވީ ދިވެހި ރައްޔިތުން އިންޑިއާއަށް ކިތަންމެ ހެޔޮ އެދުނު ކަމުގައި ވީނަމަވެސް އިންޑިއާއިން ރާއްޖެއަށް ހެޔޮނުދޭނޭކަން މިޤައުމުގެ ފަސްގަނޑުން ފެންނަ ކަމަށެވެ. ރާއްޖޭގެ އެތައް ތަނަކާއި ބިމެއް އިންޑިޔާއަށް މިލްކުވާގޮތަށް ވަގު އެގްރީމަންޓު ހަދައި، ސަރުކާރުން ދިވެހި ރައްޔިތުންނަށް ނުހަނު ބޮޑަށް ހަރާން ކޯރުވެފައިވާކަމަށް އަބްދުއްރަހީމް ވިދާޅުވިއެވެ.
އޭނާ ވިދާޅުވީ ދިވެހިންގެ މިނިވަންކަން ދެމެހެއްޓުމަށް ރައީސް ޔާމީން ނޫނީ އިހުލާސްތެރި މަސައްކަތްތަކެއް ކުރައްވާ ލީޑަރެއް ނުފެންނަކަމަށެވެ. ބަހާއި އަމަލުން ރައީސް ޔާމީން ގެނެދެވީ ޤައުމުގެ ދިފާއުގައި ވެރިކަމުގެ ފަހު ދުވަހާއި ހަމައަށްވެސް މަސައްކަތް ކުރަމުން ކަމަށެވެ. ވެރިކަން ދިފާއު ކުރުމަށް ބޭތުގެ ބާރުތަކުގެ އެހީ ހޯދައިގެން ހުރެވި ދާނެކަމަށާއި، ނަމަވެސް ވެރިކަމާއި ޖާހަތަށްވުރެއް ރައީސް ޔާމީން އިސްކުރައްވަނީ އަބަދުވެސް ދިވެހިންގެ މިނިވަންކަމާއި ސިޔާދަތާއި އިސްތިޤުލާލުކަމަށް އަބްދުއްރަހީމް ވިދާޅުވިއެވެ.
