ރާއްޖޭގެ ރައްޔިތުންގެ މަޖިލީހުގައި ޤާނޫނު އަސާސީއާއި ޚިލާފްވެ، ރާއްޖޭގައި ދީނީ މިނިވަންކަމަށް ގޮވާލައި ހިތުހުރި ވާހަކައެއް ލައިވްކޮށް މުޅި ރާއްޖެއަށް ދައްކަމުންދިޔަ ޖަލްސާގައި ކާށިދޫ ދާއިރާގެ މެމްބަރު ދެއްކެވި ވާހަކަ މަޖިލިސް ރިޔާސަތުން ނުހުއްޓުވި މައްސަލަގައި ގިނަ ބަޔަކު ކަންބޮޑުވުން ފާޅުކޮށްފިއެވެ.
މިއަދުގެ މަޖިލިސްގެ ޖަލްސާގައި، ހެއްކާއިބެހޭ ބިލަށް ވާހަކަ ދައްކަވަމުން ޖާބިރުވަނީ ރާއްޖޭގައި ދީނީ މިނިވަންކަން އޮންނަންޖެހޭ ކަމަށް ވިދާޅުވެ ވާހަކަ ދައްކަވާފައެވެ. ފަހަކަށް އައިސްގެ ޖާބިރުގެ އަމަލުތަކާއި، ވާހަކަތައް ދިވެހި ރާއްޖޭގެ ޤާނޫނު އާސާސީއާއި، ޤާނޫނުތަކުން ބޭރުވެ ހިތުހުރި ގޮތަކަށް އުޅެމުންދާއިރު އޭނާއާއިމެދު އެއްވެސް ފިޔަވަޅެއް އަޅާތަން ނުފެނެއެވެ.
މަޖިލިސް މެމްބަރަކަށްވެ ހުންނަވައި، ރޯ އަވަގުރާނަ ގޮވުމާއި، މީހުންގެ މުދަލަށް ގެއްލުން ދިނުމާއި، ބޮޑެތި އަދަދުތަކުން ދައްކަންޖެހޭ ދަރަނިތައް އަދާނުކުރާ މައްސަަލަތަކަކީވެސް ޖާބިރާއިމެދު ކުރެވޭ ބޮޑެތި ތުހުމަތުތަކެވެ. މަޖިލީހުން ބޭރުގައާއި، މަޖިލިސް ތެރޭގައިވެސް ޖާބިރު އުޅުއްވަނީ އޭނާ ހިތުހުރި ގޮތަކަށް ކަމުގައި ގިނަ ބަޔަކުދެކެއެވެ. މިކަން އެންމެ ރަނގަޅަށް ހާމަވެގެން ގޮސްފައިވަނީ މިއަދުއެވެ. މިއަދުގެ ޖަލްސާގައި ޖާބިރުވަނީ ދުލަށް އައިހައި އެއްޗެއް ގޮވަމުން ގޮވަމުން ގޮސް، އެންމެފަހުން ރާއްޖޭގައި ދީނީ މިނިވަންކަން ދިނުމަށްވެސް ގޮވާލާފައެވެ.
ރައްޔިތުންގެ މަޖިލީހުގެ މެންބަރުންނަށް މަޖިލީހުގެ ތަޅުމާއި ކޮމިޓީތަކުގައި ވާހަކަދައްކަވާއިރު ހާއްސަ އިމްތިޔާޒުތަކެއް ލިބިގެންވ އެވެ. އެގޮތުން އިސްލާމްދީނުގެ އަސްލަކާ ހިލާފު ނުވާ ގޮތަކަށް މެންބަރަކު ދައްކަވާ ވާހަކަފުޅަކާ ގުޅިގެން ތަހުގީގުކޮށް، ދައުވާ ނުކުރެވޭނެ ކަމަށް ގާނޫނުއަސާސީގެ 90 ވަނަ މާއްދާގެ (ހ)ގައި ބުނެފައިވެއެވެ.
މިއަދު ޖަލްސާގައި ކަނޑައެޅިގެން އިސްލާމީ އުސޫލުތަކާއި، ޤާނޫނު އަސާސީން ބޭރަށް ޖާބިރުގެ ވާހަތައް ދިޔައިރުވެސް އޭނާގެ ވާހަކަ އެއްވެސް ވަރަކަށް ރިޔާސަތުން ހުއްޓުވާފައި ނުވެއެވެ. ބޭނުން ވާހަކައެއް ދެއްކުމަށް އޮތީ ފުރުސަތު ދެއްވާފައެވެ. މަޖިލިސްގެ ރިޔާސަތުގައި އިންނެވި މަޖިލިސްގެ ނާއިބް ރައީސް އިޥާ އަބްދުﷲ ޖާބިރުގެ ވާހަކަ ނުހުއްޓުވިއިރު، ވާހަކަ ނިންމަވާލެއްވުމުންވެސް މިވާހަތަކާއިމެދު އެއްވެސް ވަރަކަށް ކަންބޮޑުވެފައިވެސް ނުވެއެވެ. މަޖިލިސްގެ ރިޔާސަތުން މިއަދު އަމަލު ކޮށްފައިވާ ޒިންމާދާރުކަން ކުޑަ ގޮތާއިމެދު ސޯޝަލް މީޑިއާގައި ގިނަ ބަޔަކު ދަނީ ފާޑުކިޔަމުންނެވެ.
ގިނަ ބައެއްގެ ފާޑުކިތުން މިކަމަށް އަމާޒުވުމުން މަޖިލީހުންވަނީ ރާއްޖޭގައި ދީނީ މިނިވަންކަން ދިނުމަށް ގޮވާލާ ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު ޢަބްދުﷲ ޖާބިރު މިއަދުގެ ޖަލްސާގައި ދެއްކި ވާހަކަތައް މަޖިލީހުގެ އިދާރާއިން ބަލަން ފަށައިފައިވާކަން ހާމަކުރައްވާފައެވެ. ނަމަވެސް މިކަމުގެ އެއްވެސް ތަފްސީލެއް މަޖިލީހުން ދެއްވާފައި ނުވެއެވެ.
