ރާއްޖޭގައި ދީނީ މިނިވަންކަން ދިނުމަށް ގޮވާލާ މީހުންނަކީ ބުއްދި ހަމަޖެހޭ މީހުންތޯ ބެލުމަށް ހިފާ ހައްޔަރުކޮށް، ޔޫރިން ޓެސްޓް ނަގައި އަދަބު ދެވެންޖެހޭ ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ރާއްޖޭގައި ދީނީ މިނިވަންކަން ދިނުމަށް ކާށިދޫ ދާއިރާގެ މެންބަރު އަދި ޑީއާރްޕީގެ ލީޑަރު އަބްދުﷲ ޖާބިރު ގޮވާލެއްވި މައްސަލަ ރައްޔިތުންގެ މަޖިލީހުން ދަނީ ބަލަމުންނެވެ. ނަމަވެސް މިވާހަކަ މަޖިލީހުގައި ޖާބިރު ދެއްކެވިއިރު، މަޖިލިސްގެ ރިޔާސަތުގައި އިންނެވި މަޖިލީހުގެ ނާއިބް ރައީސް އީވާ އަބްދުﷲ ޖާބިރު ހުއްޓުވައި އޭނާގެ ވާހަކަ ގޯސްކަމަށްވެސް ވިދާޅުވެފައި ނުވެއެވެ.
ޒައިދު ވިދާޅުވީ ރާއްޖޭގައި ދީނީ މިނިވަންކަމަށް ގޮވާލާ މީހުން ވަގުތުން ވަގުތަށް ހިފާ ހައްޔަރު ކުރަންޖެހޭކަމަށެވެ. އެފަދަ މީހުންނަކީ ޤައުމު ފިތުނަ ފަސާދަކޮށް، ރާއްޖޭގެ ހަމަޖެހުން ނަގާލުމަށް މަސައްކަތް ކުރާ މީހުންކަމަށްވެސް އޭނާ ވިދާޅުވިއެވެ. އަދި އެފަދަ މީހުންގެ ބުއްދި ހަމަޖެހޭތޯ ބަލަންޖެހޭކަމަށް ޒައިދު ވަނީ ވިދާޅުވެފައެވެ.
ރާއްޖޭގައި ދީނީ މިނިވަންކަން ދިނުމަށް ގޮވާލާ މީހުން ހިފައި ހައްޔަރު ކުރުމަށް ގޮވާލަން! އެފަދަ ބަޔަކީ ރާއްޖޭގައި ފިތުނަ ފަސާދަ ފެތުރުމަށް އުޅޭބައެއް! އަދި އެފަދަ ނުބައި ގޮވާލުންތައް ގޮވާލާ މީހުންނަކީ ބުއްދި ހަމަ ނުޖެހޭ މީހުންނަމަ ވީ އެންމެ އަވަހަށް އޭގެ މަރުކަޒަށް ފޮނުވުން އެދެން.
– އަލީ ޒައިދު ވިދާޅުވިއެވެ.
މަޖިލިސް މެމްބަރުކަމަކީ އެއްވެސް ހާލެއްގައި ތިމާ ހިތައް އައިހާ އެއްޗެއް ކިޔަން ލިބޭ ލައިސަންސެއް ނޫންކަމަށް ޒައިދު ވިދާޅުވިއެވެ. ރާއްޖޭގެ ދީނީ އެއްބައިވަންތަ ކަމުގެ ޤާނޫނާއި ޚިލާފްވެ ދީނީ އެއްބައިވަންތަކަން ނަގާލަން ގޮވާލާ މީހުންނަކީ ހަމަ ބުއްދި ހުރި މީހުންތޯ ބަލަންޖެހޭކަމަށާއި، އަދި އެފަދަ މީހުންގެ ޔޫރިން ޓެސްޓްވެސް ކުރަންޖެހޭކަމަށް ޒައިދު ވިދާޅުވިއެވެ.
މަޖިލިސް މެމްބަރު ކަމަކީ ތިމާ ހިތައް އައިހާ އެއްޗެއް ކިޔުމަށް އޮތް ލައިސަންސެއްނޫން! ރާއްޖޭގެ ދީނީ އެއްބައިވަންތަކަމުގެ ޤާނޫނާއި ޚިލާފްވާ ފަރާތްތައް ހިފާ ހައްޔަރުކޮށް، ޔޫރިން ޓެސްޓްކޮށް، ހައްގު އަދަބު ދެވެންޖެހޭ! އަދި މޮޔަ ނަމަ ގުރައިދޫ މަރުކަޒަށް ފޮނުވައިގެން ފަރުވާ ކުރަންޖެހޭ.
– ޒައިދު ވިދާޅުވިއެވެ.
ފަހަކަށް އައިސް ވާހަކަ ގިނަ ކުރައްވާ އަދި ތަފާތު ހާލަތްތައް މެދުވެރި ކުރުވައި ސަމާލުކަން ހޯއްދަވަމުން ގެންދަވާ ޖާބިރު ދީނީ މިނިވަން ކަމަށް ގޮވާލެއްވީ މަޖިލީހުގެ މިއަދުގެ ޖަލްސާގައި ހެއްކާ ބެހޭ ބިލުގެ ބަހުސްގެ ތެރެއިން ފުރުސަތު ހޯއްދަވައިގެނެވެ. އޭނާގެ އެ ވާހަކައިގައި ދުނިޔޭގެ އެހެން ގިނަ ގައުމުތަކެކޭ އެެއްފަދައިން ދީނީ މިިނިވަން ކަމުގައި "ޔުނިވާސަލް ޕްރެކްޓިސް" އެއް ގެންގުޅެން ޖެހޭ ވިދާޅުވި އެވެ. ޖާބިރު އެ ވާހަކަތައް ދެއްކެވީ ސޫރަތުލް ކާފިރޫންގައިވާ ހަތަރުވަނަ އާޔަތް ވެސް ވިދާޅުވަމުންނެވެ.
އަޅުގަނޑުމެންނަކީ ސުންނީ މުސްލިމުން. މި ރާއްޖޭގައި މާ މޮޅު ދީންވެރިއަކު ނެތް. އެންމެން ނަމާދު ކުރޭ. އެހެން ދީންތަކަށް، މި ރާއްޖޭގައި ނަމާދުކޮށް އުޅެވޭނޭ ގޮތުގެ މައްޗަށް. އެހެން ދީންތަކުގެ މީހުން ނަމާދުކޮށް މިތާގައި އުޅެވެން ވާނެ. މި ރާއްޖެ މިއީ ޔުނިވާސަލް ޕްރެކްޓިސްއެއް އޮންނަން ޖެހޭ.
– ޖާބިރު ވިދާޅުވިއެވެ.
ރައްޔިތުންގެ މަޖިލީހުގެ ޖަލްސާއެއްގައި ނުވަތަ އެ މަޖިލީހުގެ ކޮމިޓީއެއްގައި މަޖިލީހުގެ މެންބަރަކު ނުވަތަ އެނޫންވެސް މީހަކު އިސްލާމްދީނުގެ އަސްލަކާ ހިލާފު ނުވާ ގޮތުގެ މަތިން ދެއްކި ވާހަކައެއް ނުވަތަ ހުށަހެޅި ހުށަހެޅުމެއްގެ ސަބަބުން ނުވަތަ ވޯޓު ދިނުމުގައި އަމަލުކުރި ގޮތެއްގެ ސަބަބުން، ކޯޓަކަށް އެމީހަކު ހާޒިރުކޮށް ނުވަތަ އެމީހަކާ މެދު އެއްވެސް ތަހުގީގެއް ހިންގާ ނުވަތަ ހައްޔަރުކޮށް ނުވަތަ ބަންދެއްކޮށް ނުވަތަ އެމީހަކާ މެދު ދައުވާއެއްކޮށް ހަދައިގެނެއް ނުވާނެއެވެ.
މިއީ ރާއްޖޭގެ ރައްޔިތުންގެ މަޖިލީހުގައި މެންބަރަކު މި މޭރުމުން ވާހަކަ ދެއްކެވި ފުރަތަމަ ފަހަރެވެ. ރާއްޖޭގެ ގާނޫނު އަސާސީގައިވާ ގޮތުން ރާއްޖޭގެ ދީނަކީ މާތްވެގެންވާ އިސްލާމް ދީނެވެ.
