ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް ދިންހަމަލާގާއި ބޮން ގޮއްވާލިކަމަށް އިއުތިރާފް ވެފައިވާ އަހްމަދު ރަޝީދުގެ ޝަރީއަތުގެ ބާކީ އޮތް ބައިތައް ސިއްރުކުރަން ނިންމައިފިއެވެ.
އަދުހަމް ދައުވާތަކަށް އިއުތިރާފްވެފައިވާއިރު، މެއިމަހުގެ 6 ވަނު ދުވަހު ދެވުނު ނިރުބަވެރި ހަމަލާގައި އަމަލީ ގޮތުން ބައިވެރިވި އަހުމަދު އަދުހަމް ރަޝީދާއިއެކު އިޢުތިރާފްގެ އެއްބަސްވުން ހަދައި ކޯޓަށް ހުށަހަޅާފައިވާކަމަށް ޕްރޮސެކިއުޓަރ ޖެނަރަލް ހުސެން ޝަމީމް ކުރިން ވިދާޅުވެފައިވެއެވެ. އޭނާއާއިއެކު ވެފައިވާ އެއްބަސްވުމުގެ ދަށުން 20 އަހަރުގެ ހުކުމަކާއި، 3 އަހަރުގެ ހުކުމަކާއިއެކު ޖުމްލަ 23 އަހަރުގެ ޖަލު ހުކުމެއް އަންނަ ގޮތަށް އެއްބަސްވުމެއް ހަދާފައިވެއެވެ.
އެންމެ ފަހުން ބޭއްވި އަދުހަމްގެ ޝަރީއަތުގެ އަޑުއެހުމުގައި އަދުހަމް އެ ވާހަކަތައް ދައްކައި ނިމުމުން އަޑުއެހުމުގެ ބާކީ ބަޔަށް ނޫސްވެރިން ވައްދާނެ ކަމަށް ބެންޗުގެ ރިޔާސަތުގައި އިންނަވާ ގާޒީ އާދަމް މުހައްމަދު ވިދާޅުވި ނަމަވެސް، އަޑުއެހުން ނިމިގެން ދިޔަ އިރު ވެސް ނޫސްވެރިން ނުވައްދަ އެވެ.
އެދުވަހުގެ އަޑު އެހުމަށްފަހު ނިންމާފައިވަނީ ބާކީހުރި ހުރިހާ ޝަރީއަތުގެ އަޑުއެހުންތަކެއް ސިއްރުން ކުރިއަށް ގެންދިއުމަށެވެ. އަދުހަމްގެ މައްޗަށް އުފުލި ދައުވާތަކުގެ ތެރެއިން އިއުތިރާފް އެއްބަސްވުމުގެ ތެރެއިން ކުރިއަށް ނުގެންދާނީ ޓެރަރިޒަމްގެ އަމަލެއް ކުރަން ރޭވުމުގެ ދައުވާކަމަށް ޕީޖީ ވިދާޅުވިއެވެ.
ޕީޖީ ވިދާޅުވީ އިއުތިރާފް އެއްބަސްވުން ހެދެނީ ޖިނާއީ އިޖުރާތު ޤާނޫގެ ދަށުން ކަމަށެވެ. ޤާނޫނުގެ ތެރެއިން އެއްބަސްވުން ހަދާއިރު، ކުއްވެރިއާއިއެކު ވެވޭނެ އެއްބަސްވުންތައް ބަޔާންކޮށްފައިވަކަމަށެވެ. އަދި އަދުހަމްއާއިއެކު އެއްބަސްވެފައިވަނީ ޤާނޫނުގެ ތެރެއިންކަމަށް ޕީޖީ ވިދާޅުވިއެވެ.
އަދުހަމް ހައްޔަރުކޮށްފައިވަނީ ހަމަލާދިންތާ ދެ ދުވަސް ފަހުން ހުޅުމާލޭގައި އޭނާ ދިރިއުޅޭ އެޕާޓްމަންޓުންނެވެ. އޭނާ ހައްޔަރުކުރިއިރު ވަނީ ސިފަ ބަދަލު ކުރުމަށްވެސް މަސައްކަތް ކޮށްފައެވެ.
