ބަރުލަމާނީ ނިޒާމު ގެނައުމަށް މަސައްކަތް ކުރަމުންދާ ފަރާތްތަކުން އެނިޒާމު ޕްރޮމޯޓް ކުރުމުގެ މަސައްކަތް ކުރަމުންދަނީ ރައްޔިތުންގެ ވޯޓަކުން ވެރިކަމަށް ނާދެވޭނެކަން ޔަގީންވާ ބޭފުޅުން ކަމުގައި ވެރިކަން ކުރަމުންދާ ކޯލިޝަންގެ އަދާލަތު ޕާޓީގެ އިލްމުވެރިންގެ މަޖިލީހުގެ މެމްބަރު ޝައިޚު އަލީ ޒައިދު ވިދާޅުވެއްޖެއެވެ.

މިއަދު އެމްޑީޕީގެ ދާއިރާތަކުގެ އިންތިޚާބާއި ގުޅިގެން އަލީ ޒައިދު ކުރެއްވި ޓްވީޓެއްގައި ވިދާޅުވީ ބަރުލަމާނީ ނިޒާމަކީ ދިވެހި ރައްޔިތުންގެ ވިސްނުމެއް ނޫންކަމަށެވެ. މިވިސްނުމާއި، މިފިކުރު ގެންގުޅެމުންދަނީ، ރައްޔިތުންގެ ތާއީދު ނެތް ބޭފުޅުންކަމަށެވެ. ބަރުލަމާނީ ނިޒާމު ޕްރޮމޯޓް ކުރާ ފަރާތްތަކުން ކުރާ މަސައްކަތަކީ، ރައްޔިތުންގެ ވޯޓަކުން ވެރިކަމަށް ނާދެވޭނެކަން ޔަގީންވުމުން، އެނޫން ގޮތަކުން ނަމަވެސް ވެރިކަމަށް އާދެވޭނެ ގޮތެއް ފަހިކުުންކަމަށެވެ. ނަމަވެސް އެޖާގަ ދިވެހި ރައްޔިތުން ނުދެއްވާނެކަމަށް އަލީ ޒައިދު ވިދާޅުވިއެވެ.

ބަރުލަމާނީއަކީ ރާއްޖޭގެ ރައްޔިތުންގެ ވިސްނުމެއްނޫން! އަސްލު ބަރުލަމާނީ ޕްރޮމޯޓް ކުރަނީ ރައްޔިތުންގެ ތާއީދާއިއެކު ދެން ބަޔަކަށް ވެރިކަމަށް ނާދެވޭނެކަމަށް ޔަގީންވީމާ. އެވެރިކަން ހޯދަން އޮތް ޝޯޓްކަޓެއް ގޮތުގައި. ޤައުމަށް ހެޔޮ އެދިގެނެއްނޫން! މިއީ އަސްލު މިވާ ގޮތަކީ.

– އަލީ ޒައިދު ވިދާޅުވިއެވެ.

މިއަދު ކުރިއަށްދާ އެމްޑީޕީގެ އެތެރޭގެ އިންތިޚާބުގައި ރައީސް ނަޝީދަށް ތާއީދު ކުރައްވާ ބޭފުޅުންގެ އެންމެ ބޮޑު އަމާޒަކަށް ވެފައިވަނީ ބަރުލަމާނީ ނިޒާމެވެ. އަދި ރައީސް ނަޝީދަށް ތާއީދު ކުރައްވާ ބޭފުޅުން ޕްރޮމޯޓް ކުރަމުންދަނީވެސް ބަރުލަމާނީ ނިޒާމެވެ. ނަމަވެސް ރައީސް ޞާލިހަށް ތާއީދު ކުރައްވާ ކެނޑިޑޭޓުން ބަރުލަމާނީ ނިޒާމަށް ތާއީދެއް ނުކުރައްވައެވެ.

މިއިންތިޚާބުގެ ފޯރި ފަދަވެފައިވާއިރު، އިންތިޚާބު ރައީސް ޞާލިހަށް ތާއީދުކުރައްވާ ކެނޑިޑޭޓުން ބޮޑު ތަފާތަކުން ކާމިޔާބު ކުރާނެކަމަށް ގިނަ ބަޔަކު ދެކެއެވެ. މިއިންތިޚާބަކީ އެމްޑީޕީގެ ރިޔާސީ ޓިކެޓާއިވެސް ގުޅިފައިވާ އިންތިޚާބެވެ.