ޅ. އަތޮޅު ކުރެންދޫއަށް ބޮޑެތި ރާޅުތައް އަރައި ގިނަބައެއްގެ ސަމާލުކަން ލިބުނު އެރަށު މަލަތިން ފެންނަ ހިތްގައިމު ދަނޑަށް ލިބުނު ގެއްލުންތަކާއިއެކު ރައްޔިތުންނަށް ބޮޑު މާޔޫސްކަމެއް ކުރިމަތިވެއްޖެއެވެ.

ކުރެންދޫއަށް އުދަ އަރަން ފަަށާފައިވަނީ ރޭ މެންދަމުގެ ވަގުތެއްގައެވެ. ރަށުގެ ވަރަށް ބޮޑު ސަރަހައްދަކަށް އުދަ އަރާ ބޮޑެތި ގެއްލުންތައް ވަނީ ލިބިފައެވެ. އެކަމާއި ގުޅިގެން އާންމު ދިރިއުޅުމަށް ވަނީ ވަރަށް ބޮޑަށް އަސަރު ކޮށްފައެވެ. އުދައިގެ ސަބަބުން އެންމެ ބޮޑު ގެއްލުމެއް ލިބިފައިވަނީ ކުރެންދޫގެ ފަހުރެއް ކަމަށްވާ އެ ރަށުގެ ޓާފް ދަނޑަށެވެ. އެ ދަނޑަށް ވަނީ ވަރަށް ބޮޑެތި ގެއްލުންތަކެއް ލިބިފައެވެ.

ޖުމްލަ 4 މިލިއަން ރުފިޔާ ހަރަދުކުރި ދަނޑުގެ ބޮޑު ބަޔަކަށް ވަނީ އުދައަރާ ގެއްލުންވެފައެވެ. ދަނޑުގެ ދެބައިކުޅަ އެއްބައި ފޮރުވިފައި ވަނީ ވެއްޔާއި ގަލުންނެވެ. އަދި ދަނޑުގެ ވަށައިގެން ރާނާފައިވާ ފާރުން ބޮޑު ބައެއްވެސް ވަނީ ވެއްޓިފައެވެ.

އެ ދަނޑުގެ ހިތްގައިމު މަންޒަރުތައް މިހާރު މީސް މީޑިއާގައި ދައުރުވިިރު، އެ ދަނޑަށް ބައިނަލްއަގްވާާމީ ސަމާލުކަންވެސް މިވަނީ ލިބިފައެވެ. އެގޮތުން ކުޅިވަރާއި އެހެނިހެން މުނިފޫހިފިލުމުގެ ހަބަރުތައް ގެނެސްދޭ މަގުބޫލު "ޔުނިލެޑް" ވެބްސައިޓުގައި ވަނީ އެ ދަނޑުގެ ރީތިކަމާމެދު ޝުއޫރުފާޅުކޮށް ފޮޓޯ ހިއްސާ ކޮށްފައެވެ.

ދައުރުވާ ފޮޓޯތަކުން ދަނޑުމައްޗައް ގަލާއި، ވެލި އަދި ކުނި އެޅިފައި ހުރި މަންޒަރު ފެނިގެން ދެއެވެ. އެ ދަނޑު ތަރައްގީކޮށްފައި ވަނީ ރަށުގެ ރައްޔިތުންގެ އެހީއާއި އެކުގައެވެ. ގާތްގަނޑަކަށް ހަތަރު މިލިއަނެއްހާ ރުފިޔާ ރައްޔިތުންގެ ޖީބުން ހަރަދުކުރިއެވެ. މިއީ އެރަށު ރައްޔިިތުން ހިތާމަ ކުރާނެ ކަމެކެވެ. އެހާ ބުރަ، އެހާ ގިނަ ފައިސާ ހަރަދުކޮށްގެން އެތައް ބައެއްގެ އުއްމީދާއި އެތައް ބަައެއްގެ ހުވަފެނީ ދަނޑަށް ލިބިފައި ހުރި ގެއްލުންތަކުންނެވެ.

ބުރާފަސްތިދުވަހުގެ މެންދުރުން ފަށައިގެން އެރަށަށް ދިޔައީ އުދަ އަރަމުންނެވެ. ނަމަވެސް އާދަޔާ ޚިލާފަ ބޮޑަށް އުދައަރަންފެށީ ދަންވަރު 3:00 ހާއިރުއެވެ. އުދަގެ ސަބަބުން އާންމު ގިނަ ގެތަކަށްވެސް ވަނީ އެކި ވަރުގެ ގެއްލުންތަކެއް ވެފައެވެ.