ކުރީގެ ރައީސް ޢަބްދުﷲ ޔާމީންއަކީ ރާއްޖެއިން ވަރަށް މަދުން ނޫނީ ނުފެންނަ ވަރުގެ ވަރަށް ޢިލްމީ ބޭފުޅެއް ކަމުގައި ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ރައީސް ޔާމީނުގެ ފަރާތުން ހުށައެޅި އިސްތިއުނާފު މައްސަލައިގައި ދައުކަރުގެ ފަރާތުން އިއްޔެ ދެއްކެވި ވާހަތަކަށް އެމަނިކުފާނު ވަނީ ކޯޓުގައި ރައްދު ދެއްވާފައެވެ. ރައީސް ޔާމީންގެ ވާހަތަކަށް އެތައް ބަޔަކު ތައުރީފް ކުރިއިރު، މިހުކުމަކީ ނުފޫޒާއި ބާރުވެރިކަން ފޯރުވައިގެން ކޮށްފައިވާ ހުކުމެއްކަމަށް އިދިކޮޅު ފަރާތްތަކުން ދަނީ ތުހުމަތު ކުރައްވަމުންނެވެ.
ރައީސް ޔާމީން އިއްޔެ ކޯޓުގައި ދެއްކެވި ވާހަތަކަށް ތައުރީފް ކުރައްވައި ޑރ.ޝަހީމް ވިދާޅުވީ ރައީސް ޔާމީނަކީ ރާއްޖޭގައި އުފެދުނު މޮޅު މަދު އިލްމުވެރި ވިސްނުން ތޫނު ބޭފުޅުންގެ ތެރެއިން އެއް ބޭފުޅެއްކަމަށެވެ. ރައީސް ޔާމީންއާއިއެކު މަސައްކަތް ކުރެއްވުމަށް ފުރުސަތުލިބުނު ދުވަސް ވަރު އެކަން ވަރަށް ކައިރިން ތަޖުރިބާ ކުރެވުނު ކަމަށާއި، އެމަނިކުފާނުގެ އިލްމީ ގާބިލްކަމާއި، ވާހަކަ ދެއްކުންތެރިކަމާއި، ހިންގުން ތެރިކަމަކީ ދިވެހި ރައްޔިތުންވެސް ހެކިވާނެ ކަންތައްތަކެއް ކަމަށް ޑރ.ޝަހީމް ވިދާޅުވިއެވެ.
ރައީސް ޔާމީންއަކީ ރާއްޖެއިން ވަރަށް މަދުން ނޫނީ ނުފެންނަ ވަރުގެ ވަރަށް ޢިލްމީ ބޭފުޅެއް. ރައީސް ޔާމީންގެ ދަށުން ކެބިނެޓްގައި މަސައްކަތް ކުރި ދުވަސްވަރު އެކަން ފާހަނގަވި. ރައީސް ޔާމީން އަކީ އުފެއްދުންތެރި ވިސްނުން ހުންނަ ވަރަށް ކުޅަދާނަ ވަރަށް މޮޅު ޤައުމީ ވިސްނުމުގެ ބޭފުޅެއް. ވާހަކަ ދެއްކުންތެރިއެއް. އެމަނިކުފާނަށް އިންސާފު ލިބެންޖެހޭ.
– ޑރ.ޝަހީމް ވިދާޅުވިއެވެ.
RY aki raajjein varah madhun nooni nufenna varuge varah ilmee beyfulheh. RY ge dhashun cabinet ga masakkay kuri dhuvasvaru ekan faahagavi. RY aki ufeddhuntheri visnun hunna v kulhadhaana v molhu Qaumee visnumuge beyfulheh. Vahaka dhekkuntherieh. Emanikufaanah insaafu liben jehey. https://t.co/s39rD3tj24
— Mohamed Shaheem Ali Saeed (@Mohamedshaheem1) September 24, 2021
މަނީ ލޯންޑަރިންގެ މައްސަލައިގައި ރައީސް ޔާމީނަށް ޖަލު އަދަބުގެ އެންމެ ދަށް މިންވަރު ކަނޑައަޅައި ޖޫރިމަނާގެ އެންމެ މަތީ ޢަދަދު ދެއްކުމަށް ކްރިމިނަލް ކޯޓުން ޙުކުމްކުރިގޮތް ރަނގަޅުކަމަށް ވަކާލާތުކުރާ ސަބަބު ސާފުކޮށްދިނުމަށް ސްޕްރީމް ކޯޓުން ދައުލަތުގެ ވަކީލުންނަށް އިއްޔެ ވަނީ އަންގާފައެވެ.
ދައުލަތުން ވިދާޅުވީ ރައީސް ޔާމީނުގެ ފަރާތުން އެނުކުތާ ފާހަގަކޮސްފައިވަނީ މިހާރު އަމަލުކުރަމުންދާ ޤާނޫނުލް އުޤޫބާތުގެ ދަށުންކަމަށާ، ނަމަވެސް މީހެއްގެ މައްޗަށް ކުރެވޭ ދަޢުވާއާ ގުޅިގެން އެކުށެއްގެ އަދަދު ލުއިކުރެވޭނެގޮތާއި މަތިކުރެވޭނެގޮތް އެ ޤާނޫނުގައި ބަޔާންކޮށްފައިވާކަމަށެވެ.
މިހިސާބުން މިމައްސަލަ ބައްލަވާ ބެންޗުގެ ރިޔާސަތުގައި އިންނެވި ފަނޑިޔާރު އަލްއުސްތާޛު މަޙާޒު ޢަލީ ޒާހިރުވަނީ މައްސަލަ އިސްތިއުނާފުކުރި ފަރާތުން ހުށައެޅި ނުކުތާގައި ފާހަގަކުރިގޮތަށް ޖަލު ޙުކުމުގެ އެންމެ ދަށް، އަދި ޖޫރިމަނާގެ އެންމެ މަތިއައީ ކިހިނެއްތޯ ސާފުކޮށްދޭން އެދިވަޑައިގެންފައެވެ. މިއާއެދު ދައުލަތުގެ ވަކީލު ވިދާޅުވީ ޖަލު އަދަބު 5 އަހަރާއި 15 އަހަރާ ދެމެދުން ކަނޑައެޅުމާއި، ލޯންޑަރކުރި ފައިސާގެ އަދަދު 5 ގުނައަށްވުރެ އިތުރު ނުވާގޮތަށް ޖޫރިމަނާގެ އަދަބު ކަނދައެޅުމަކީ މައްސަލަ ބައްލަވާ ފަނޑިޔާރަށް ލިބިފައިވާ އިޚްތިޔާރެއްކަމަށެވެ.
އަދި މިމައްސަލައިގެ އަދަބާގުޅޭގޮތުން ދެފަރާތުންވެސް ދަށުކޯޓުގައި ވާހަކަދައްކާފައިވާކަމަށާއި، ދައުލަތުން އެދުނީ އަދަބުގެ އެންމެ ލުއި މިންވަރު ކަމަށާއި، ޖޫރިމަނާގެ މިންވަރު އިތުރުކުރަން އެދުނީ ކުށްވެރިވި ފަރާތް އޭރު ހުރި މަޤާމުގައި ހުރެ ބޭނުންކުރީ އެމްއެމްޕީއާރުސީ މެދުވެރިކޮށް ދަޢުލަތައް ލިބެންޖެހޭ ފައިސާއަކަށްވުމުންކަމަށެވެ. އެއާއެކުވެސް ފަނޑިޔާރު ވަނީ ޖަލު ޙުކުމުގެ އެންމެ ދަށް އަދި ޖޫރިމަނާގެ އެންމެ މަތިކުރަން ކްރިމިނަލް ކޯޓުން ޙުކުމްކުރިގޮތް ރަނގަޅުކަމަށް ވަކާލާތުކުރާ ސަބަބު ޖަސްޓިފައިކޮށްދިނުމަށް އެދިވަޑައިގެންފައެވެ. ނަމަވެސް އެހިސާބުން މިއަދުގެ ޝަރީއަތުގެ އަޑުއެހުންވަނީ ނިންމާލައްވާފައެވެ.
އަދި ދެން ޝަރީއަތް އޮންނަދުވަހު އެކަމުގެ ތަފްސީލާއި އިސްތިއުނާފު ނުކުތާތަކާ ގުޅިގެން ދަޢުލަތުންދޭ ރައްދުތައް ހުށައެޅުން އޮންނާއެވެ.
