ރާއްޖޭގެ ސިޔާސީ މަސްރަހުގައި މިވަގުތު ތިއްބެވި ލީޑަރުންގެ ތެރެއިން ރައްޔިތުންގެ ތާއީދު އެންމެބޮޑު ލީޑަރަކީ އިދިކޮޅު ޕްރޮގްރެސިވް ކޯލިޝަންގެ ލީޑަރު ރައީސް އަބްދުﷲ ޔާމީންކަމުގައި ނިލަންދޫ ދާއިރާގެ މެމްބަރު އަބްދުލް މުހުސިން ހަމީދު (ޖޭފޯ) ވިދާޅުވެއްޖެއެވެ.
ސިޔާސީ މަސްރަހުގައި އަލަށް އުފެއްދުމަށް މަސައްކަތް ކުރަމުންދާ އެމްއެންޕީއަށް ސޮއިކުރުން މިވަގުތަށް މަޑުކުރިކަން ހާމަކޮށް، ދިވެހި ޗެނަލްގައި ވާހަކަ ދައްކަވަމުން ޖޭފޯ ވިދާޅުވީ ސިޔާސީ މަސްރަހުގައި ކަންކަން ހިނގާ ގޮތަށްބަލާއިރު، އެއްވެސް ބޭފުޅަކަށް އެއްބުރުން ރިޔާސީ އިންތިޚާބެއް ކާމިޔާބު ނުކުރެއްވޭނެކަމަށެވެ.
ޖޭފޯ އާއި ނަޝީދު (މޮސްޓަރ) ވަނީ ސިޔާސީ ގޮތުން ރާއްޖޭގެ މާޒީއާއި، މިހާރުގެ ހާލަތަށް އަލި އަޅުވާލައި ވާހަކަ ދައްކަވާފައެވެ. ޖޭފޯ ވިދާޅުވީ ސިޔާސީ މަސްރަހުގައި ކަންކަން ހިނގަމުންދާ ގޮތަށް ބަލާއިރު، މިވަގުތު ގަބޫލޫކުރަންޖެހޭ ހަގީގަތްތަކެއް އެބަހުރިކަމަށެވެ. އެގޮތުން ރައީސް ޔާމީންއާއި، ޤާސިމް އިބްރާހިމްއާއި، އަދި މިހާރުގެ ރައީސް އިބްރާހިމް މުހައްމަދު ޞާލިހުއަކީ ރައްޔިތުންގެ ތެރޭގައި މަގުބޫލު ބޭފުޅުންތަކެއްކަށެވެ. އޭގެ ތެރެއިންވެސް ބަޔަކު ގަބޫލު ކުރިޔަސް ނުކުރިޔަސް އެންމެ ތާއީދު ބޮޑު މީހަކީ ރައީސް ޔާމީން ކަމާއިމެދު ގަބޫލު ކުރަންޖެހޭކަމަށް އޭނާ ވިދާޅުވިއެވެ.
ދެބޭފުޅުންވެސް ވިދާޅުވީ ރާއްޖޭގެ ހުރިހާ ކަންކޮޅަކަށް ބަލައިލި ކަމުގައިވީނަމަވެސް ރާއްޖޭގައި އޮތީ ދެ ފިކުރެއްކަން ވަރަށް ބޮޑަށް ސާފުވާކަމަށެވެ. އޭގެ މެދުން ތާއީދު ބޮޑު ފިކުރެއް އުފެއްދޭނީ ވަރަށް މަސައްކަތުން ކަމަށާއި، އެކަން ކުރުމުގައި މަގުބޫލު ލީޑަރުންނާއި ދިމާލަށް ގަދަބަސް ބުނުމަކީ ތާއީދު ކުރައްވާ ކަމެއްނޫންކަމަށެވެ. ސިޔާސީގޮތުން ޤައުމަށް ޚިދުމަތް ކޮށްދެއްވާފައި ބޭފުޅުން އެއްބޭފުޅަކު އަނެއް ބޭފުޅަކަށް ޒާތީ ގޮތުން ދިމާކޮށް އެއްޗެހި ކިޔުމަކީ އެއްވެސް ގޮތަކަށް ތާއީދު ކުރައްވާ ކަމެއް ނޫންކަމަށް މިދެބޭފުޅުންވެސް ވަނީ ވިދާޅުވެފައެވެ.
މިސަރުކާރުން ކޯވިޑްގެ ތެރޭގައި ކުރަމުންދާ ކަންތައްތަކާއި، އަދި ނިމިދިޔަ ރައީސް ޔާމީންގެ ވެރިކަމުގައި ރާޢްޖެއަށް ގެނެސްދިން ތަރައްޤީއަކީވެސް ބަލައި ގަންނަންޖެހޭ ތަރައްޤީކަމަށާއި، ޚިދުމަތްތައް ބަލައި ނުގަނެ ސިޔާސީ ކުރިމަގެއްވެސް އުޖާލާ ނުކުރެވޭނެކަމަށް ޖޭފޯ ވިދާޅުވިއެވެ.
މިދެ މެންބަރުންވެސް ވިދާޅުވީ، އެދެބޭފުޅުން ނިސްބަތްވާ ދާއިރާތަކަކީ ޕީޕީއެމްގެ ފިކުރު ބޮޑު ދާއިރާތަކެއް ކަމަށެވެ. އަދި އެމްއެންޕީއަށް ފޯމް ފުރަން އުޅުނު ކަމުގައި ވީނަމަވެސް އެކަން ކުރުމަކީ ފަސޭހަ ކަމަކަށްވެސް ނުވާނެކަމަށެވެ. އަދި މިވީ މުއްދަތުގައި ކޮންމެވެސް ވަރެއްގެ ފޯމްކޮޅެއް ލިބުނުކަމަށާއި، ނަމަވެސް އެކަށިގެންވާ އަދަދަކަށް ލިބިފައި ނުވަނީވެސް އިތުރު ފިކުރެއް އުފެއްދުމަށް ކުރަންޖެހޭ މަސައްކަތަކީ ބޮޑު އަދި ބުރަ މަސައްކަތަށް ވުމުން ކަމަށެވެ.
