2021 ވަނަ އަހަރު، "ގްރޭޓް ޕްލޭސް ޓު ވާރކް"ގެ ފަރާތުން ހޮވި، މެދު އިރުމަތީގައި ވާ، މަސައްކަތުގެ މާހައުލު އެންމެ ފުރިހަމަ، އަދި މުވައްޒަފުން އެންމެ މަސައްކަތް ކުރާ ހިތްވާ 10 ކުންފުނީގެ ތެރޭގައި ސައުދީ އަރަބިއާގެ ކުންފުނިތައް ހިމެނިއްޖެއެވެ.
މެދުއިރުމަތީގައި މަސައްކަތް މުވައްޒަފުންގެ ތެރެއިން، އެންމެ ގިނަ މުވައްޒަފުންގެ މަސައްކަތުގެ ތަޖުރިބާ ތަކުގެ މައްޗަށް އެކުލަވާ ލެވިފައިވާ މި ސާވޭއިން ވަނީ، މެދުއިރުމަތީގައިވާ މަސައްކަތް ކުރަން އެންމެ ރަގަޅު ކުންފުނިތައް ހޮވާފައެވެ. މި ސާވޭގައި މެދުއިރުމަތީގައި މަސައްކަތް ކުރާ އެތައްހާސް މުވައްޒަފުންނެއް ވަނީ ބައިވެރި ވެފައެވެ.
މިގޮތުން، މިއަހަރުގެ އެންމެ ރަގަޅު ކުންފުނިތަކުގެ ލިސްޓުގައި ހިމެނުމަށް، މެދުއިރުމަތީގެ 450 އަށްވުރެ ގިނަ ކުންފުންޏަކުން ވާދަ ކޮށްފައި ވެއެވެ.
މިސާވޭގައި ބަލާފައިވަނީ، މަސައްކަތް ކުރާ ކުންފުންޏާ ދޭތެރޭ، މުވައްޒަފުން ކޮށްފައިވާ ތަޖުރިބާތަކުގެ ތެރެއިން، ކުރާ އިތުބާރާއި، ކުންފުނީގެ އުފެއްދުންތެރިކަމާއި، ދަމަހައްޓާ އުސޫލުތަކާއި އަދި ލީޑަރޝިޕްގެ ހަރުދަނާ ކަމުގެ މައްޗަށެވެ.
އަދި މީގެ އިތުރުން، ކުންފުނިތަކުން ހުރިހާ މުވައްޒަފުންނަށް ހިންހަމަ ޖެހޭފަދަ މަސައްކަތުގެ މާހައުލެއް، ވަކި ގިންތިއެއްގެ އަދި ވަކި ފެންވަރެއްގެ މުވައްޒިފަކު ތަފާތު ކުރުމެއްނެތި ތަނަވަސްކޮށް ދީފައިވާ މިންވަރުގެ މައްޗަށްވެސް މި ސާވޭގައި ކުންފުނިތައް އިވޭލުއޭޓް ކޮށްފައި ވެއެވެ.
ދުނިޔެއަށް ކުރިމަތި ވެފައިވަ ކޯވިޑް ކާރިސާއާއި ގުޅިގެން، މުވައްޒަފުންގެ ނަފްސާނީ އަދި ޖިސްމާނީ ހާލަތުވެސް، މިސާވޭގެ އެންމެ ކުރިޔަށް ވަނީ އައިސްފައެވެ. އަދި ސާވޭ ކުރުމަށްޓަކާ ކުންފުނިތައް ތިންބަޔަކަށް ބަހާލެވިފައި ވެއެވެ. އެއީ އެންމެ ކުދި ކުންފުނިތަކާއި، މެދުފަންތީގެ ކުންފުނިތަކާއި، އަދި ބޮޑެތި ކުންފުނިތަކެވެ. އަދި މީގެ އިތުރުން މިސާވޭގައި، އެންމެ މަތީ ފަންތީގެ ކުންފުނިތައްވެސް، އެކުންފުނިތަކުން މެދުއިރުމަތީ ތަފާތު ގައުމުތަކުގައި ގާއިމްކޮށްފައިވާ މަސައްކަތު މާހައުލުތަކުގެ ހާލަތު ވަޒަންކުރުމުގެ ގޮތުންވަނީ، މިސާވޭގައި އިވޭލުއޭޓް ކޮށްފައެވެ.
މިގޮތުން އެންމެ މަތީ ފަންތީގެ ގިނަ ކުންފުނިތަކުން، ލިސްޓުގެ ގިނަ މަގާމްތައް ކާމިޔާބު ކޮށްފައިވާއިރު، ސައުދީ އަރަބިއާގައި ހިންގަމުން އަންނަ އެގައުމުގެ ކުދި ކުންފުނިތަކުންވެސް، އެކުންފުނިތަކުން ގެންގުޅެމުން އަންނަ "މުވައްޒަފުން ފުރަތަމަ" މި ސިޔާސަތުގެ ސަބަބުން ވަނީ ރަގަޅު މަގާމްތަކެއް ހާސިލް ކޮށްފައެވެ.
މިގޮތުން ކުދި ކޮންފުނިތަކުގެ ކެޓަގަރީން ސައުދީގެ މިނިސްޓްރީ އޮފް ޓުއަރުޒަމް ހިމެނިގެން ދިޔައީ ލިސްޓު 4 ވަނައިގައެވެ. އަދި ބޮޑެތި ކުންފުނިތަކުގެ ކެޓަގަރީން، ސާވިސް އެންޑް ސޮލިއުޝަންގެ ޚިދުމަތް ފޯރުކޮށްދޭ ކުންފުންޏެއް ކަމުގައިވާ ދާރުލް ރިޔާދު ހިމެނިގެން ދިޔައީ ލިސްޓުގެ 8 ވަނައިގައެވެ.
ކުންފުނިތަކުގެ އެތެރޭގެ މުއާމަލާތްތަކާއި، އަދި ކަންކަން ދެފުށް ފެންނަ ގޮތަށް ހަމަޖެހިގފައިވާ މިންވަރުގެ މައްޗަށް ބިނާކޮށް، ބޮޑެތި ކުންފުނިތަކުގެ ކެޓަގަރީން މިލިސްޓުން އެއްވަން ހޯދާފައިވަނީ ދުބާއި ޕޮލިސްއެވެ. މެދުފަންތީގެ ކުންފުނިތަކުން އެއްވަނަ ހޯދާފައިވަނީ "ދަ ވަން" ކުންފުނިންނެވެ. އަދި ކުދި ކުންފުނިތަކުގެ ބައިން އެއްވަނަ ހޯދާފައިވަނީ، ވެސްޓްފޯޑް ޔުނިވަރސިޓީ ކޮލެޖްއިންނެވެ.
