މިއަހަރަށް ލަފާކޮށް ފާސްކޮށްފައިވާ ބަޖެޓުގައި ނުވެސްނެތް ކަންކަން ކުއްލިއަކަށް، ނޫސްތަކުގެ ހެޑްލައިންތަކުން ފެންނާތީ އެކަމާއި ދާއިރާގެ ގިނަ ރައްޔިތުން ސުވާލު ކުރަމުންދާކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.

މާލޭ ރައްޔިތުންގެ ބޯހިޔާވަހިކަން ފޯރުކޮށް ނުދީ ލަސްވާ މައްސަލާގައި މާފަންނު މެދު ދާއިރާގެ މެމްބަރު އިބްރާހިމް ރަޝީދު ހުށަހެޅުއްވި މައްސަލާގައި ވާހަަކަ ދައްކަވަމުން މީކާއިލް ވިދާޅުވީ މާލޭ ރައްޔިތުންގެ ތެރެއިން ވަރަށް ގިނަ ބަޔަކު ވަންނާނެ ތަނެއްނެތި ނިކަމެތި ހާލުގައި ތިބިކަމަށެވެ. މިކަންކަން ހައްލު ކުރުމަށް ބަޖެޓް ކުރެވި ބޯހިޔާވަހިކަމުގެ އެއްވެސް ކަމެއް ނުކޮށްދެވި އޮއްވައި، ބަޖެޓްގައި ނުވެސް ނެތް ޕްރޮޖެކްޓްތަކެއް ކުއްލިއަކަށް އުފަންވެ ބޮޑެތި އަދަދުތަކުގެ ޕްރޮޖެކްޓްތައް އަތޮޅު ތެރޭގައި ފަށާކަމީ ކަންބޮޑުވާ ކަމެއްކަމަށެވެ.

މީކާއިލް ވިދާޅުވީ ކުއްލިއަކަށް މިފައިސާ ލިބުނު ގޮތާއި، ހޯދިތަނެއްވެސް ނޭގި މަޖިލިސް މެމްބަރުންނަށްވެސް ނޫސްތަކުގެ ހެޑްލައިންތަކުން މިފަދަ ޕްރޮޖެކްޓްތަކުގެ ސުރުހީ ފެނުމަކީ ކަންބޮޑުވާކަމެއްކަމަށެވެ. މިއީ މިކަންކަން ހިނގަންޖެހޭ ގޮތެއް ނޫންކަމަށް މީކާއިލް ވިދާޅުވިއެވެ.

މީކާއިލް އިޝާރާތް ކުރައްވާ ޕްރޮޖެކްޓަކީ، ރ.އަލިފުށީ ބިން ހިއްކުމާއި އެއަރޕޯޓު ތަރައްޤީކުރުމުގެ މަޝްރޫޢުގެ ޕްރޮޖެކްޓަށެވެ. މި ޕްރޮޖެކްޓަކީ ދައުލަތުގެ ބެޖުޓުގައި ނެތް ޕްރޮޖެކްޓަކަށްވާއިރު، މިއީ ކުރިއަށް އޮތް އެމްޑީޕީގެ ޤައުމީ މަޖިލިސް އިންތިޚާބަށް އުފަންވި ޕްރޮޖެކްޓެއް ކަމަށް އެމްޑީޕީގެ ބައެއް ބޭފުޅުން ދަނީ ވިދާޅުވަމުންނެވެ.

އަލިފުށީގައި އެއަރޕޯޓު ތަރައްޤީކުރުމަށް ބޭނުންވާ ބިން ހިއްކާ އެއަރޕޯޓު ތަރައްޤީކުރުމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން އެމްޓީސީސީއާއި ޙަވާލުކޮށްފައިވަނީ ދެ އަހަރު ދުވަހުގެ ތެރޭގައި ނިންމާގޮތަށެވެ. މިއީ އެއް ފަހަރާ މިހާ ބޮޑު ސްކޯޕެއްގައި ސަރުކާރު ކުންފުންޏަކަށް ޕްރޮޖެކްޓެއް ޙަވާލުކުރި ފުރަތަމަ ފަހަރެވެ. ޑިޒައިން އެންޑް ބިލްޑް އުސޫލުން ތަރައްޤީކުރާ މިމަޝްރޫޢު އެކުންފުންޏާ ޙަވާލުކޮށްފައިވަނީ 451.6 މިލިއަނަށްވުރެ ގިނަ ރުފިޔާއަށެވެ.