ރައީސް ޔާމީންގެ ހުކުމް އިއްވިއިރު، ބެންޗުގައި ހިމެނުނު ފަނޑިޔާރުންގެ އޯޑިއޯ ލީކުވި ތިން ފަނޑިޔާރުން ސަސްޕެންޑް ކުރުމަށް އިދިކޮޅު ކޯލިޝަނުން ގޮވާލައިފިއެވެ.
އިދިކޮޅު ކޯލިޝަނުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި، އިދިކޮޅު ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ރައީސް ޔާމީނަށް ހުކުމް ކުރެއްވި ފެނޑިޔާރުންގެ ބެންޗުގައި ހިމެނޭ ފަނޑިޔާރުންނަކީ ނަޒާހަތްތެރިކަން ގެއްލިފައިވާ ބޭފުޅުންތަކެއް ކަމަށެވެ.
ބެންޗުގައި ހުމެނޭ ފަނޑިޔާރުންގެ ތެރެއިން ތިން ފަނޑިޔާރެއްގެ އޯޑިއޯ ލީކުވެ، އަދި އެފަނޑިޔާރުންގެ އަމަލުތައް ހުރިގޮތް މިއަދު އޮތް ކުރީގެ ފަނޑިޔާރުންގެ ޕްރެސް ކޮންފަރެންސުން ހާމަވެފައިވާކަމަށް އަދުރޭ ވިދާޅުވިއެވެ. އޭނާ ވިދާޅުވީ މިފަނޑިޔާރުންނަކީ މިހާރުން މިހާރަށް ސަސްޕެންޑް ކުރެވްނެހޭ ބައެއްކަމަށެވެ. މިސަރުކާރުންވެސް ބައެއް ވަޒީރުންވެސް މަސައްކަތުން އެކަހެރިކޮށް ސަސްޕެންޑް ކުރާ އުސޫލުން ޖޭއެސްސީން މިރެއިން މިރެއަށްވެސް އެފަނޑިޔާރުން ސަސްޕެންޑް ކުރަންޖެހޭ ކަމަށް އަދުރޭ ވިދާޅުވިއެވެ.
އޭނާ ވިދާޅުވީ މިކަމުގައި އެންމެ ބޮޑަށް ތުހުމަތު ކުރެވޭ ރައީސް އޮފީހުގެ ޗީފް އޮފް ސްޓާފްވެސް މަޤާމުން ވަކިިކުރަންޖެހޭކަމަށެވެ. އަދި މިކަން ތަހުގީގްކޮށް މިކަމުގައި އަޅަންޖެހޭ ފިޔަވަޅު އެޅުމަށް އޭނާވަނީ ސަރުކާރަށް ގޮވާލާފައވެެ.
އަދުރޭ ވިދާޅުވީ ރައީސް ޔާމީނަށް ކުރި ހުކުމަކީ ކަނޑައެޅިގެން ހަރާން ހުކުމެއްކަމަށެވެ. އަދި މިހުކުމަކީ ފާސިގުންގެ ހުކުމުގެ މައްޗަށް ދަމަހައްޓާފައިވާ ހުކުމަކަށްވާއިރު، ހުކުމް ސްޕްރީމް ކޯޓުން ބާތިލް ކުރާނެކަމުގެ ވަރަށް ބޮޑު ޔަގީންކަމެއް އެބައޮތްކަމަށެވެ. އަދި މިހުކުމަކީ އިންސާފުވެރި ޝަރީއަތެއް ހިންގައިފިނަމަ ބާތިލު ހުކުމަކަށް ވާނެކަމަށް އަބްދުއްރަހީމް ވިދާޅުވިއެވެ.
